ଖୋର୍ଦ୍ଧା ଜିଲ୍ଲାରେ ଗତବର୍ଷ ତୁଳନାରେ ଚଳିତବର୍ଷ ୧୧.୦୧ ପ୍ରତିଶତ ଅଧିକ ଦୁର୍ଘଟଣା ଘଟିଛି । ୬ଜଣଙ୍କ ଜୀବନ ଗଲାଣି । ଜାତୀୟ ରାଜପଥରେ ହିଁ ସର୍ବାଧିକ ମୁଣ୍ଡ ଗଡି଼ଛି । ଖୋର୍ଦ୍ଧା ଜିଲ୍ଲାପାଳଙ୍କ ଅଧ୍ୟକ୍ଷତାରେ ଆୟୋଜିତ ଜିଲ୍ଲାସ୍ତରୀୟ ସଡ଼କ ସୁରକ୍ଷା ବୈଠକରେ ଏହି ତଥ୍ୟ ଉପସ୍ଥାପନ କରାଯାଇଛି । ଶୀତଋତୁ ଆରମ୍ଭ ହୋଇଗଲାଣି । ନଭେମ୍ବରରୁ ଫେବ୍ରୁଆରୀ ଭିତରେ ପିକ୍ନିକ୍ ଓ କୁହୁଡ଼ି ଯୋଗୁ ଦୁର୍ଘଟଣା ବଢ଼ିବା ଆଶଙ୍କା ରହିଛି । ବର୍ଷକ ଭିତରେ ଦୁର୍ଘଟଣାର ଏହି ବର୍ଦ୍ଧିତ ତଥ୍ୟ ଜିଲ୍ଲା ପ୍ରଶାସନ ସହ ପରିବହନ ବିଭାଗର ଚିନ୍ତା ବଢାଇ ଦେଇଛି ।
ଗତବର୍ଷ ଜାନୁଆରୀରୁ ସେପ୍ଟେମ୍ବର ଭିତରେ ମୋଟ ୮୪୯ଟି ଦୁର୍ଘଟଣା ଘଟିଥିଲା । ଚଳିତବର୍ଷ ଏହି ସଂଖ୍ୟା ବଢ଼ିକି ୯୫୪ରେ ପହଞ୍ଚିଛି । ଦୁର୍ଘଟଣା ଯୋଗୁ ଗତବର୍ଷ ୨୭୦ଜଣଙ୍କ ମୃତ୍ୟୁ ଘଟିଥିଲା । ଚଳିତଥର ୨୭୬ଜଣଙ୍କ ଜୀବନ ଗଲାଣି । ଯାହାକି, ଗତବର୍ଷ ତୁଳନାରେ ୨.୧୭ ପ୍ରତିଶତ ଅଧିକ । ଅବଶ୍ୟ, ଦୁର୍ଘଟଣାରେ ଗୁରୁତର ଆହତଙ୍କ ଗ୍ରାଫ୍ ସାମାନ୍ୟ ଖସିଛି । ଗତବର୍ଷ ୯ ମାସରେ ୫୪୭ଜଣ ଗୁରୁତର ହୋଇଥିବା ବେଳେ ଚଳିତ ଥର ମୋଟ ୫୩୪ଜଣ ଗୁରୁତର ଆହତ ହୋଇଛନ୍ତି । ପୂର୍ବରୁ ନଂ-୧୬ ଜାତୀୟ ରାଜପଥରେ ଓଭରବ୍ରିଜ୍ ନଥିବାରୁ ଅଧିକାଂଶ ଦୁର୍ଘଟଣା ଘଟୁଥିଲା। କେଉଁଠି ପଥଚାରୀ କିମ୍ବା ଗାଡି଼ଚାଳକଙ୍କୁ ଭାରୀଯାନ ଧକ୍କା ଦେଇ ଖସି ପଳାଉଥିଲା । କେଉଁଠି ଚାଲିକରି ଏନ୍ଏଚ୍ ପାର୍ ବେଳେ ଗାଡି଼ ଚକା ତଳେ ଲୋକଙ୍କ ଜୀବନ ଯାଉଥିଲା । କିନ୍ତୁ ବର୍ତ୍ତମାନ ଭୁବନେଶ୍ୱର ପାହାଳଠାରୁ ଖୋର୍ଦ୍ଧା ସୀମା ଶେଷ ଯାଏ ଓଭରବ୍ରିଜ୍ ନିର୍ମାଣ ସରିଛି । ଏଥିଯୋଗୁ ଏନ୍ଏଚ୍ରେ ବ୍ଲାକ୍ ସ୍ପଟ୍ର ସଂଖ୍ୟାରେ ବି ହ୍ରାସ ପାଇଛି । ଏନ୍ଏଚ୍ରେ ଓଭରବ୍ରିଜ୍ ନିର୍ମାଣ ସତ୍ତେ୍ୱ ସଡ଼କ ସୁରକ୍ଷା ବଢ଼ିବାକୁ ନେଇ ସଡ଼କ ସୁରକ୍ଷା ବିଶେଷଜ୍ଞ ଚିନ୍ତାପ୍ରକଟ କରିଛନ୍ତି ।
ସେ କହିଛନ୍ତି, ସହରାଞ୍ଚଳରେ ମଧ୍ୟ ଦୁର୍ଘଟଣା ଥମିବାର ନାଁ ନେଉନି । ଟ୍ରାଫିକ୍ ଚେକିଂରେ ଢିଲା ଯୋଗୁ ଅମାନିଆଙ୍କ ବିପଥଗାମୀ ଗାଡି଼ ଚାଳନା ଦୁର୍ଘଟଣାର ମୁଖ୍ୟ କାରଣ ପାଲଟିଛି ।