ପଞ୍ଚକ ଅବସରରେ ଆଜି ଶ୍ରୀମନ୍ଦିରରେ ପ୍ରବଳ ଭିଡ଼ ଦେଖାଦେଇଛି। ଆଜି ଶ୍ରୀଜଗନ୍ନାଥ, ବଳଭଦ୍ର ଓ ସୁଭଦ୍ରାଙ୍କ ଆଡ଼ିକିଆ ବା ତ୍ରିବିକ୍ରମ ବେଶ ଅନୁଷ୍ଠିତ ହେବ। ମହାପ୍ରଭୁଙ୍କ ଅବକାଶ ନୀତି ଶେଷ ହେବା ପରେ ପୁଷ୍ପାଳକ ସେବକମାନେ ଏହି ବେଶ କରିଥାନ୍ତି।
ଏହି ବେଶରେ ଶ୍ରୀଜୀଉ ଓ ପ୍ରଭୁ ବଳଭଦ୍ରଙ୍କ ମସ୍ତକରେ ସୋଲ, କନା, ବେତ, ଜରି ଇତ୍ୟାଦିରେ ନିର୍ମିତ ଚୂଳ ଲାଗାଯାଏ, ଯାହାରେ ସ୍ୱର୍ଣ୍ଣ ନିର୍ମିତ କିଆ ଓ ଚନ୍ଦ୍ରିକା ଖଞ୍ଜାଯାଇଥାଏ। ଏହି ବେଶ ଦର୍ଶନ କଲେ ଅଶେଷ ପୁଣ୍ୟ ମିଳିଥାଏ ବୋଲି ବିଶ୍ୱାସ ଅଛି, ଯାହା ପାଇଁ ଭକ୍ତମାନେ ମହାପ୍ରଭୁଙ୍କ ଦର୍ଶନ ପାଇଁ ଭିଡ଼ ଜମାଇଛନ୍ତି।
ଗତକାଲି ପଞ୍ଚକର ପ୍ରଥମ ଦିନରେ ଠେଲାପେଲା ହେବାରୁ ଅନେକ ଭକ୍ତ ତଳେ ପଡ଼ିଯାଇଥିଲେ। ଏହି ପରିସ୍ଥିତି ନିୟନ୍ତ୍ରଣ ପାଇଁ ଶ୍ରୀମନ୍ଦିର ଓ ଜିଲ୍ଲା ପ୍ରଶାସନ ପକ୍ଷରୁ ବିଶେଷ ବ୍ୟବସ୍ଥା ଗ୍ରହଣ ହୋଇଛି। ପୋଲିସ ଡିଜି ୱାଇ.ବି. ଖୁରାନିଆ ସ୍ୱୟଂ ପୁରୀ ପହଞ୍ଚି ସୁରକ୍ଷା ବ୍ୟବସ୍ଥା ଓ ଭକ୍ତ ଦର୍ଶନ ବ୍ୟବସ୍ଥା ଯାଞ୍ଚ କରିଛନ୍ତି।