ସୁନ୍ଦରଗଡ଼ ଜିଲ୍ଲା ବଣାଇଁ ଅଞ୍ଚଳରେ ଦିନକୁ ଦିନ ଚୋରି ବଢିବାରେ ଲାଗିଛି । ଗତ ୨୬ ତାରିଖରେ ବଣାଇଁ ହାଟପଦା ଠାରେ ଥିବା ବ୍ୟବସାୟୀ ରଶ୍ମି ଇଲେକ୍ଟ୍ରିକାଲସଙ୍କ ଘରୁ ଏକ ବଡ଼ ଧରଣର ଡକାୟତି ହୋଇଥିଲା । ଦୁର୍ବୃତ୍ତମାନେ ଘରୁ ଟଙ୍କା ସହ ସୁନା ଅଳଙ୍କାର ଲୁଟି ନେଇଥିଲେ । ସେହିପରି ଗତ ୨୭ ତାରିଖ ରାତିରେ ବଣାଇଁ ଥାନା ଛତିଆଢିପାର ନିକୁଞ୍ଜ ବେହେରାଙ୍କ ଘରେ ଚୋରି ହୋଇଥିବା ଜଣାପଡିଛି।
ସୂଚନା ମୁତାବକ, ନିକୁଞ୍ଜ ବେହେରା ନିଜ ପୁଅ ବାହାଘର ପ୍ରସ୍ତୁତି ପାଇଁ ସପରିବାରେ ଅନୁଗୁଳକୁ ଯାଇଥିଲେ। ଘରେ କେହି ନଥିବାର ସୁଯୋଗ ନେଇ ଚୋର ତାଙ୍କ ଘରେ ପଶି ଆଲମିରା ତାଡ଼ି ୫୨ ଗ୍ରାମ ସୁନା, ୨୦ ଗ୍ରାମ ରୁପା ସହିତ ନଗଦ ୨ ଲକ୍ଷ ଟଙ୍କା ଲୁଟି ନେଇଥିଲେ । ଏହା ସହ ଘରେ ଫ୍ରିଜ୍ରେ ରନ୍ଧା ହୋଇ ରହିଥିବା ମାଂସକୁ ଖାଇ ଚାଲି ଯାଇଥିଲେ।
ସେହିପରି ମଙ୍ଗଳବାର ବିଳମ୍ବିତ ରାତିରେ ବଣାଇଁ ସହରର ମୁଖ୍ୟ ରାସ୍ତା କଡ଼ରେ ଥିବା ଚନ୍ଦନ ସାହୁଙ୍କ ଚା’ ଦୋକାନକୁ ତାଡି ଦୋକାନରେ ଥିବା ଏକ ଟିଭି, ସାଉଣ୍ଡ ସିଷ୍ଟମ, ବିକ୍ରି ପାଇଁ ଥିବା ପ୍ରାୟ ୩୨ଟି ବିସ୍କୁଟ ଡବା, କ୍ଷୀର ଇତ୍ୟାଦି ସାମଗ୍ରୀ ଚୋରି କରି ନେଇଯାଇଛନ୍ତି । ପୁଲିସ ରାତିରେ ପାଟ୍ରୋଲିଂ କରୁଥିବା କହିଥିଲେ ହେଁ ମୁଖ୍ୟ ରାସ୍ତା କଡ଼ରେ ଥିବା ଦୋକାନରୁ ଚୋରି ଘଟଣାକୁ ନେଇ ଲୋକଙ୍କ ମନରେ ଅସନ୍ତୋଷ ଦେଖାଦେଇଛି । ଦିନକୁ ଦିନ ବଣାଇଁରେ ବାଂଲାଦେଶୀଙ୍କ ସଂଖ୍ୟା ବଢିବାରେ ଲାଗିଥିବା ବେଳେ ଚୋରି ଘଟଣା ବି ସେହି ହାରରେ ବଢ଼ୁଥିବାରୁ ପୁଲିସ ଏ ଦିଗରେ ଶୀଘ୍ର ପଦକ୍ଷେପ ନେବାକୁ ଜନସାଧାରଣରେ ଦାବି ହେଉଛି ।