କାରିବିୟାନ ଦେଶ ଜାମାଇକାରେ ମଙ୍ଗଳବାର ରାତିରେ ତାଣ୍ଡବ ରଚିଛି ଶକ୍ତିଶାଳୀ ବାତ୍ୟା ‘ମେଲିସା’ । ରାତି ପ୍ରାୟ ୧୦ଟା ୪୦ରେ ଏହା ଲ୍ୟାଣ୍ଡଫଲ୍ କରିବା କ୍ଷଣି ଧ୍ୱଂସ ଲୀଳା ରଚିଥିଲା । ଘରଦ୍ୱାର ଭାଙ୍ଗିବା ସହ ଗଛ ଓ ବିଦ୍ୟୁତ୍ ଖୁଣ୍ଟ ଆଦି ଉପୁଡ଼ିଥିଲା । ବାତ୍ୟା ମେଲିସାର ଘଣ୍ଟା ପିଛା ବେଗ ୧୮୫ ମାଇଲ୍ ବା ପାଖାପାଖି ୩୦୦ କିଲୋମିଟର ରହିଥିଲା । ଶତାବ୍ଦୀ ମଧ୍ୟରେ ଏହା ସବୁଠୁ ଶକ୍ତିଶାଳୀ ବାତ୍ୟା ବୋଲି କୁହାଯାଉଛି ।
ଖବର ଲେଖାହେବା ସୁଦ୍ଧା ଜାମାଇକାରେ ୩, ହାଇତିରେ ୩ ଓ ଡୋମିନିକାନ ରିପବ୍ଲିକରେ ଜଣଙ୍କର ମୃତ୍ୟୁ ଘଟିଥିଲା । ଏହାର ପ୍ରଭାବରେ କ୍ୟୁବାରେ ୬ ଲକ୍ଷ ଓ ଜାମାଇକାରେ ୨୮ ହଜାରରୁ ଅଧିକ ଲୋକଙ୍କୁ ସୁରକ୍ଷିତ ଜାଗାକୁ ସ୍ଥାନାନ୍ତର କରାଯାଇଛି । ଜାତିସଂଘ ମେଲିସାକୁ ଶତାବ୍ଦୀର ସବୁଠୁ ଶକ୍ତିଶାଳୀ ବାତ୍ୟା ଅଭିହିତ କରିଛି । ଜାମାଇକାରେ ତାଣ୍ଡବ ରଚିବା ପୂର୍ବରୁ ଏହା ପ୍ରଥମେ ହାଇତି ଓ ଡୋମିନିକାନ ରିପବ୍ଲିକରେ ଧ୍ୱଂସଲୀଳା ରଚିଥିଲା । ଏହି ପ୍ରଚଣ୍ଡ ବାତ୍ୟା ସମଗ୍ର ଜାମାଇକାକୁ ଧ୍ୱଂସ କରିଦେବା ନେଇ ଆଶଙ୍କା ଉପୁଜିଥିଲା । ଖବର ଲେଖାହେବା ବେଳକୁ ସେଠାରେ ପବନ ସାଙ୍ଗକୁ ପ୍ରବଳ ବର୍ଷା ବି ହେଉଥିଲା । ଜାମାଇକାରେ ମୋଟ ୭୦ ସେମି ବର୍ଷା ହେବା ନେଇ ଆଶଙ୍କା ରହିଛି ।
ମେଲିସା ଶନିବାର ଘଣ୍ଟା ପିଛା ୧୨୦ କିମି ବେଗରେ ବହିବା ଆରମ୍ଭ କରିଥିଲା । ୨୪ ଘଣ୍ଟାରେ ଏହାର ଗତି ଘଣ୍ଟା ପ୍ରତି ୨୨୫ କିମିକୁ ବଢ଼ିଥିଲା । ସୋମବାର ଏହାର ଗତି ୨୬୦ କିମି ହୋଇଥିଲା । ଫଳରେ ଏହା କାଟେଗୋରି-୫ ବାତ୍ୟାରେ ପରିଣତ ହୋଇଥିଲା । କାଟେଗୋରି-୫ ବାତ୍ୟାରେ ଏହା ସର୍ବାଧିକ କ୍ଷତିକାରକ ସାବ୍ୟସ୍ତ ହୋଇଥାଏ । ଏହାର ପ୍ରଭାବ ଏତେ ପ୍ରଚଣ୍ଡ ହୋଇଥାଏ ଯେ ଏହା କଂକ୍ରିଟ କୋଠାକୁ ବି କ୍ଷତି ପହଞ୍ଚାଇପାରେ । ଗଛ, ବିଦ୍ୟୁତ୍ ଖୁଣ୍ଟ ଉପୁଡ଼ିବା ସହ ଯୋଗାଯୋଗ ବ୍ୟବସ୍ଥା ଠପ୍ ହୋଇଯାଏ । ତଟବର୍ତ୍ତୀ ଅଞ୍ଚଳରେ ଏହାଯୋଗୁ ସୁନାମି ଉଠି ଭୟଙ୍କର ବନ୍ୟାର କାରଣ ସାଜିଥାଏ । ଜାମାଇକାରେ ବାତ୍ୟା ମେଲିସା ଯୋଗୁ ୧୫ ଲକ୍ଷ ପର୍ଯ୍ୟନ୍ତ ଲୋକ ସିଧାସଳଖ ପ୍ରଭାବିତ ହେବା ନେଇ ଇଣ୍ଟରନ୍ୟାସନାଲ ଫେଡେରେସନ ଅଫ୍ ଦ ରେଡ୍ କ୍ରସ୍ ପକ୍ଷରୁ ଆକଳନ କରାଯାଇଛି ।