ବାଘ ଛାଲ ଡିଲ୍ ବେଳେ ମାଡ଼ି ବସିଲା ବନ ବିଭାଗ। କଲରାପତରିଆ ବାଘ ଛାଲ ଜବତ। ଶଳା-ଭିଣୋଇ ଗିରଫ। କେନ୍ଦୁଝର ବନ ବିଭାଗ ଓ ପୁଲିସ ମିଳିତ ଭାବେ ଚଢଉ କରି ଏକ କଲରାପତରିଆ ବାଘ ଛାଲ ଜବତ କରିବା ସହ ୨ ଜଣଙ୍କୁ ଗିରଫ କରିଛି।
ସୂଚନାନୁଯାୟୀ, ଠାକୁରମୁଣ୍ଡା ଅଞ୍ଚଳରୁ ବାଘ ଶିକାର କରିବାପରେ କେନ୍ଦୁଝର ନିକଟସ୍ଥ ଜୁଡ଼ିଆ ଘାଟି ନିକଟରେ ବାଘ ଛାଲ ବିକ୍ରି ପାଇଁ ଡିଲ୍ ଚାଲିଥିଲା। ଏହାର ଖବର ପାଇ କେନ୍ଦୁଝର ବନ ବିଭାଗ ଓ ପୁଲିସ ମିଳିତ ଭାବେ ଚଢଉ କରିଥିଲା। ଚଢଉ ବେଳେ ଏକ କଲରାପତରିଆ ବାଘ ଛାଲ ଜବତ ହୋଇଛି। ଏହା ସହ ବନ ବିଭାଗ ୨ ଜଣଙ୍କୁ ଗିରଫ କରିଛି। ଗିରଫ ହୋଇଥିବା ୨ ଅଭିଯୁକ୍ତ ରବୀନ୍ଦ୍ର ଟୁଡ଼ୁ ଓ ମନୂଆ ହେମ୍ରମ ସମ୍ପର୍କରେ ଶଳା ଭିଣୋଇ ବୋଲି ଜଣାପଡ଼ିଛି। ବନ ବିଭାଗ ଉଭୟଙ୍କୁ କୋର୍ଟ ଚାଲାଣ କରିଛି।