ଏଥର ଉତ୍ତର ଭାରତରେ ପ୍ରବଳ ଶୀତ ହେବ ବୋଲି ବିଭିନ୍ନ ପାଣିପାଗ ମଡେଲ ଆକଳନ କରିଛନ୍ତି । ଲା-ନିନା ପ୍ରଭାବରେ ଭାରତରେ ପ୍ରଚଣ୍ଡ ଶୀତ ହେବ ବୋଲି ସ୍କାଏ ମେଟ୍ ପୂର୍ବାନୁମାନ କରିଛି । ଏ ବର୍ଷ ଡିସେମ୍ବରରୁ ଫେବ୍ରୁଆରୀ ମାସ ଯାଏ ପୂର୍ବ ଭାରତରେ ଶୀତର ପ୍ରକୋପ ବିଶେଷ ରହିବନି ବୋଲି କଲମ୍ବିଆର ଏକ ବିଶ୍ୱବିଦ୍ୟାଳୟ ପୂର୍ବରୁ ଆକଳନ କରିଥିଲା । ଲା- ନିନା ପ୍ରଭାବ ସତ୍ତେ୍ୱ ବିଶ୍ୱର ଅଧିକାଂଶ ସ୍ଥାନରେ ତାପମାତ୍ରା ସ୍ୱାଭାବିକଠାରୁ ଅଧିକ ରହିବ ବୋଲି ବିଶ୍ୱ ପାଣିପାଗ ସଂସ୍ଥା କହିଥିଲା । ଏଣୁ ଆଗକୁ ଦେଶ ଓ ରାଜ୍ୟରେ ଶୀତ ପୂର୍ବାନୁମାନକୁ ନେଇ ଦ୍ୱନ୍ଦ୍ୱ ସୃଷ୍ଟି ହୋଇଛି ।
ଏହି ଦ୍ୱନ୍ଦ୍ୱ ଭିତରେ ବରିଷ୍ଠ କୃଷି ପାଣିପାଗବିତ୍ ପ୍ରଫେସର ସୁରେନ୍ଦ୍ରନାଥ ପଶୁପାଳକ କହିଛନ୍ତି, ଡିସେମ୍ବର ଓ ଜାନୁୟାରୀ ମାସରେ କିଛି ଦିନ ପାଇଁ ସ୍ୱଳ୍ପ ଅବଧିର ଅବଧିର ଶୀତ ଲହରି ଅନୁଭୂତ ହୋଇପାରେ । । ଉପକୂଳରେ ଶୀତ କମିବ । କିନ୍ତୁ ଆଭ୍ୟନ୍ତରୀଣ ଓଡ଼ିଶା ସମେତ ଶୀତପ୍ରବଣ ଅଞ୍ଚଳରେ ଥଣ୍ଡା ସ୍ୱାଭାବିକ ରହିବ । ଏ ବର୍ଷ ରାଜ୍ୟରେ କମ୍ ଶୀତ ହୋଇପାରେ ବୋଲି ସେ ପୂର୍ବାନୁମାନ କରିଛନ୍ତି । ରାଜ୍ୟକୁ ବିଳମ୍ବରେ ଶୀତ ଆସିବ ଓ କମ୍ ଶୀତ ଅନୁଭୂତ ହେବ । ଡିସେମ୍ବର ମାସ ଆରମ୍ଭ ଯାଏ ତାପମାତ୍ରା ସ୍ୱାଭାବିକଠାରୁ ଅଧିକ ରହିବ ।
ଶୀତ କମିବାର କାରଣ ଦର୍ଶାଇ ସେ କହିଛନ୍ତି, ଉତ୍ତର-ପୂର୍ବ ପବନ ବହିବାରୁ ଆର୍ଦ୍ରତା ଅଧିକ ରହିବ । ମେଘୁଆ ପାଗ ବଢ଼ିବ । ଉତ୍ତର ଭାରତରୁ ଥଣ୍ଡା ପବନ ଆସିବା ବାଧାପ୍ରାପ୍ତ ହୋଇପାରେ । ପୁଣି ପଶ୍ଚିମା ଝଡ଼ର ପ୍ରଭାବ ଅଧିକ ରହିବା ଯୋଗୁ ପାଗ ମେଘୁଆ ରହିବା ସହ ବର୍ଷା ହେବ । ଦିନ ସମୟର ତାପମାତ୍ରା ସ୍ୱାଭାବିକ ଭାବେ କମ୍ ରହିବ । କୋହଲା ପାଗ ଅଧିକ ରହିବା ସହ ଶୀତ କମ୍ ରହିବ ବୋଲି ସେ କହିଛନ୍ତି । ଅକ୍ଟୋବରରୁ ଇଏନଏସଓ ଲା- ନିନା ଅବସ୍ଥାକୁ ଆସିଯାଇଛି । ବିଷୁବ ମଣ୍ଡଳୀୟ କେନ୍ଦ୍ରୀୟ ପ୍ରଶାନ୍ତ ମହାସାଗରରେ ଜଳପତ୍ତନ ତାପମାତ୍ରା ସ୍ୱାଭାବିକଠାରୁ ୦.୫ ଡିଗ୍ରୀରୁ ଅଧିକ କମିଛି । ଏଥରର ଶୀତ ଚାରି ମାସ ଲା- ନିନା ଅବସ୍ଥାରେ ରହିବ । ଏହା ଦୁର୍ବଳ ରହିବା ସହିତ ଆସନ୍ତା ଫେବ୍ରୁଆରୀ ମାସରେ ପୁଣି ସ୍ୱାଭାବିକ ଅବସ୍ଥାକୁ ଫେରିବ ବୋଲି ସେ ଆକଳନ କରିଛନ୍ତି ।
ଲା- ନିନା ବର୍ଷରେ ଶୀତ ସ୍ୱାଭାବିକ ଭାବେ ଅଧିକ ହୁଏ । କିନ୍ତୁ ସବୁଆଡ଼େ ଶୀତର ପ୍ରଭାବ ରହେନି । ଅଧିକ ଥଣ୍ଡା ଅଞ୍ଚଳରେ ଶୀତର ପ୍ରକୋପ ସ୍ୱାଭାବିକଠାରୁ ଅଧିକ ରହିପାରେ । ନଭେମ୍ବର ଓ ଡିସେମ୍ବର ମାସରେ ପଶ୍ଚିମ ହିମାଳୟ ଓ ସଂଲଗ୍ନ ଗଞ୍ଜାମ, ଜାମ୍ମୁକଶ୍ମୀର, ଉତ୍ତରାଖଣ୍ଡ, ହିମାଚଳ ପ୍ରଦେଶ, ପାକିସ୍ତାନ ଓ ସଂଲଗ୍ନ ଅଞ୍ଚଳରେ ତାପମାତ୍ରା ବହୁତ କମିପାରେ ।