କର୍ଣ୍ଣାଟକର ବେଙ୍ଗାଲୁରୁ ସହରରେ ଘଟିଛି ଏକ ହୃଦୟ ବିଦାରକ ଘଟଣା । ଚର୍ମ ବିଶେଷଜ୍ଞ ଡାକ୍ତର କ୍ରିଥିକା ଏମ୍. ରେଡ୍ଡିଙ୍କ ମୃତ୍ୟୁ ଘଟଣା ନେଇ ସମଗ୍ର ରାଜ୍ୟରେ ଚର୍ଚ୍ଚା ଚାଲିଛି । ମୃତକଙ୍କ ସ୍ୱାମୀ ଡାକ୍ତର ମହେନ୍ଦ୍ର ରେଡ୍ଡି ଜିଏସଙ୍କୁ ପୋଲିସ ଗିରଫ କରିଛି ।
ସୂତ୍ର ଅନୁସାରେ, ୨୮ ବର୍ଷୀୟ ଡାକ୍ତର କ୍ରିଥିକା ଗତବର୍ଷ ହିଁ ଡାକ୍ତର ମହେନ୍ଦ୍ର ରେଡ୍ଡିଙ୍କ ସହ ବିବାହ କରିଥିଲେ । ୨୪ ଏପ୍ରିଲ୍ ୨୦୨୫ରେ ତାଙ୍କ ଘରେ ସନ୍ଦେହଜନକ ପରିସ୍ଥିତିରେ ତାଙ୍କ ମୃତଦେହ ମିଳିଥିଲା । ବ୍ୟବଚ୍ଛେଦ ରିପୋର୍ଟରେ ତାଙ୍କ ଶରୀରରେ ପ୍ରୋପୋଫଲ (Propofol) ନାମକ ଡ୍ରଗ୍ସର ଚିହ୍ନ ମିଳିଥିଲା, ଯାହା ସାଧାରଣତଃ ଅପରେସନ ସମୟରେ ନିଦ୍ରାଦାୟକ ଭାବେ ବ୍ୟବହାର ହୁଏ । ଏହି ତଥ୍ୟ ଆସିବାପରେ ପୋଲିସ ହତ୍ୟା ସନ୍ଦେହରେ ତଦନ୍ତ ଆରମ୍ଭ କରିଥିଲା ଏବଂ ୧୪ ଅକ୍ଟୋବରରେ ଡାକ୍ତର ସ୍ବାମୀଙ୍କୁ ଗିରଫ କରିଥିଲା ।
ବେଙ୍ଗାଲୁରୁ ପୋଲିସ କମିଶନର ସୀମାନ୍ତ କୁମାର ସିଂହ କହିଛନ୍ତି ଯେ, ଅଭିଯୁକ୍ତ ଡାକ୍ତର ମହେନ୍ଦ୍ର ନିଜ ହସ୍ପିଟାଲ ମାଧ୍ୟମରେ ବେଆଇନ ଭାବରେ ଏହି ଡ୍ରଗ୍ସ ପାଇଥିଲେ ଏବଂ ସାବଧାନତାର ସହ ଯୋଜନାବଦ୍ଧ ଭାବେ ପତ୍ନୀଙ୍କୁ ହତ୍ୟା କରିଥିଲେ । ସେ ତାଙ୍କ ପତ୍ନୀଙ୍କ ସ୍ୱାସ୍ଥ୍ୟ ସମସ୍ୟା ସମ୍ପର୍କରେ ସଚେତନ ଥିଲେ ଏବଂ ତାହାର ଅବସ୍ଥାର ଫାଇଦା ଉଠାଇ ଏହି ଅପରାଧ କରିଥିଲେ ।
ପୋଲିସ ତଦନ୍ତରେ ଆହୁରି ଜଣାପଡିଛି ଯେ ଡାକ୍ତର ମହେନ୍ଦ୍ରଙ୍କ ଅପରାଧିକ ପୃଷ୍ଠଭୂମି ଥିଲା — ତାଙ୍କ ବିରୁଦ୍ଧରେ ଠକେଇ ଏବଂ ଧମକ ସମ୍ପର୍କୀୟ ଅନେକ ମାମଲା ରୁଜୁ ହୋଇଥିଲା । ବର୍ତ୍ତମାନ ବେଙ୍ଗାଲୁରୁ ପୋଲିସ ତାଙ୍କୁ ରିମାଣ୍ଡରେ ନେଇ ଅଧିକ ତଦନ୍ତ କରୁଛି ।