ସରିଲା ଶ୍ରୀମନ୍ଦିର ସବ୍ କମିଟି ବୈଠକ। ଶ୍ରୀମନ୍ଦିର ସୁରକ୍ଷାକୁ ନେଇ ଡ. ଗିରିଶ ଚନ୍ଦ୍ର ମୁର୍ମୁଙ୍କୁ ଅଧ୍ୟକ୍ଷତାରେ ବସିଥିବା ବୈଠକରେ ନିଆଗଲା ଗୁରୁତ୍ବପୂର୍ଣ୍ଣ ନିଷ୍ପତ୍ତି। ଏଣିକି ଶ୍ରୀମନ୍ଦିରକୁ ମୋବାଇଲ୍ ଫୋନ୍ ବ୍ୟବହାର ଉପରେ ସମ୍ପୂର୍ଣ୍ଣ ବାରଣ କରାଯିବ। କୌଣସି ପୁଲିସ କିମ୍ବା ସେବାୟତ ମନ୍ଦିରକୁ ମୋବଇଲ୍ ନେଇପାରିବେନି। ଆଗକୁ ୱାକିଟକି ବ୍ୟବସ୍ଥା ହେବ କହିଲେ ସୁରକ୍ଷା ସବ-କମିଟି ମୁଖ୍ୟ ଡ. ଗିରିଶ ଚନ୍ଦ୍ର ମୁର୍ମୁ। ଏହି ସମୟରେ ପୁରୀ ଜିଲ୍ଲାପାଳ ଦିବ୍ୟଜ୍ୟୋତି ପରିଡ଼ା, ଏସପି ପ୍ରତୀକ ସିଂଙ୍କ ସହିତ ଅନ୍ୟାନ୍ୟ ଅଧିକାରୀ ମାନେ ଉପସ୍ଥିତ ଥିଲେ।
ମଙ୍ଗଳବାର ନିଳାଦ୍ରୀ ଭକ୍ତ ନିବାସରେ ଶ୍ରୀମନ୍ଦିର ସୁରକ୍ଷା ପାଇଁ ପ୍ରଥମ ସବ୍-କମିଟି ବୈଠକରେ ମନ୍ଦିର ଭିତର ଓ ବାହାର ସୁରକ୍ଷା ନେଇ ଆଲୋଚନା ହୋଇଛି । ଏନେଇ ସୁରକ୍ଷା ସବ୍-କମିଟି ମୁଖ୍ୟ କହିଛନ୍ତି ଯେ, ବଡ଼ଦେଳର ସୁରକ୍ଷା ପ୍ରଣାଳୀକୁ ଆହୁରି ସୁଦୃଢ଼ ହେବ। ସୁରକ୍ଷା ପାଇଁ ଭିତ୍ତିଭୂମି ପ୍ରସ୍ତୁତ କରାଯାଇ ଅଧିକ ସୁରକ୍ଷା କର୍ମୀ ନିୟୋଜିତ କରାଯିବ।ଅତ୍ୟାଧୁନିକ ସରଞ୍ଜାମ,ସିକ୍ୟୁରିଟି ଡ୍ରିଲ୍ ପ୍ରୋଟୋକଲ ସର୍ଭେଲାନ କ୍ଷମତାକୁ ବଢ଼ାଯିବା ନେଇ ନିଷ୍ପତ୍ତି ହୋଇଛି । ଏଥି ସହିତ ଶ୍ରୀକ୍ଷେତ୍ରକୁ ଆସୁଥିବା ଯାତ୍ରୀମାନଙ୍କୁ ସଚେତନ କରାଯିବ। ପୂର୍ବରୁ ଶ୍ରୀମନ୍ଦିର ଚତୁଃପାର୍ଶ୍ବ ରେଡ୍ ଜୋନ୍ ଘୋଷଣା ହୋଇଥିବା ବେଳେ ନୋ ଫ୍ଲାଇଂ ଜୋନ୍ କରାଯାଇଛି। ଆଗକୁ ଶ୍ରୀମନ୍ଦିର ସୁରକ୍ଷା ଦାୟିତ୍ବରେ ନିୟୋଜ ଥିବା ସୁରକ୍ଷାକର୍ମୀଙ୍କ ପାଇଁ ଓ୍ବାକିଟକି ବ୍ୟବସ୍ଥା କରାଯିବ । କେତେକ ଜିନିଷ ଶ୍ରୀମନ୍ଦିର ପ୍ରଶାସନ କରିବ, ବାକି କିଛି ସରକାର କରିବେ। କାହାକୁ ହଇରାଣ କରିବାକୁ ନୁହେଁ, ଶ୍ରୀମନ୍ଦିର ସୁରକ୍ଷା ପାଇଁ ସବୁ ବ୍ୟବସ୍ଥା ହେବ। ଦେଶର ଅନ୍ୟ ବଡ଼ ବଡ଼ ମନ୍ଦିରର ସୁରକ୍ଷା ଅନୁଧ୍ୟାନ କରି ନିଷ୍ପତ୍ତି ନିଆଯିବ ବୋଲି ଡ. ଗିରିଶ୍ ଚନ୍ଦ୍ର ମୁର୍ମୁ କହିଛନ୍ତି ।