ବାହା ହେଲେ ଅଷ୍ଟ୍ରେଲିଆ ପ୍ରଧାନମନ୍ତ୍ରୀ ଆନ୍ଥୋନୀ ଆଲବାନିଜ। ପଦବୀରେ ଥାଇ ବିବାହ କରିବାରେ ପ୍ରଥମ ଅଷ୍ଟ୍ରେଲୀୟ ପ୍ରଧାନମନ୍ତ୍ରୀ । ଆନ୍ଥୋନୀ ଆଲବାନିଜ ୬୨ ବର୍ଷ ବୟସରେ ବିବାହ କରିଛନ୍ତି । ତାଙ୍କ ଦୀର୍ଘ ଦିନର ବାନ୍ଧବୀ ୪୫ ବର୍ଷିୟା ଜୋଡି ହେଡନ ଙ୍କ ସହ ବିବାହ ବନ୍ଧନରେ ଆବଦ୍ଧ ହୋଇଛନ୍ତି । କାନବେରାର ‘ଦ ଲଜ୍’ ଠାରେ ଆୟୋଜିତ ଏକ ଘରୋଇ ଉତ୍ସବରେ ଏହି ବିବାହ ସମ୍ପନ୍ନ ହୋଇଛି ।
ଅଷ୍ଟ୍ରେଲିଆ ଇତିହାସରେ ଏହା ପ୍ରଥମ ଘଟଣା । ଯେଉଁଠାରେ ଜଣେ ପ୍ରଧାନମନ୍ତ୍ରୀ ନିଜ କାର୍ଯ୍ୟକାଳ ମଧ୍ୟରେ ବିବାହ କରିଛନ୍ତି । ତେବେ ଏହି ବାହାଘର ଉତ୍ସବରେ ମାତ୍ର ୨୦ରୁ ୩୦ ଜଣ ଘନିଷ୍ଠ ବନ୍ଧୁ ଓ ପରିବାର ସଦସ୍ୟ ଯୋଗ ଦେଇଥିଲେ । ଜୋଡି ହେଡନ୍ ସିଡନୀର ଡିଜାଇନର୍ ‘ରୋମାନ୍ସ ୱାଜ୍ ବର୍ନ’ ଙ୍କ ଦ୍ୱାରା ପ୍ରସ୍ତୁତ ଧଳା ଗାଉନ୍ ପିନ୍ଧିଥିଲେ। ଆଲବାନିଜ ଏକ ସୁଟ୍ ପିନ୍ଧିଥିଲେ। ପ୍ରଧାନମନ୍ତ୍ରୀଙ୍କ ପୋଷା କୁକୁର ‘ଟୋଟୋ’ ମୁଦି ବାହକ ସାଜି ସମସ୍ତଙ୍କ ମନ ଜିଣି ନେଇଥିଲା । ସୁରକ୍ଷା କାରଣରୁ ବିବାହ ଯୋଜନାକୁ ଗୋପନ ରଖାଯାଇଥିଲା । କୌଣସି ଅନ୍ତର୍ଜାତୀୟ ଅତିଥିଙ୍କୁ ନିମନ୍ତ୍ରଣ କରାଯାଇ ନଥିଲା । ୨୦୨୦ ମସିହାରେ ଏକ ମେସେଜ୍ ଜରିଆରେ ଉଭୟଙ୍କ ସମ୍ପର୍କ ଆରମ୍ଭ ହୋଇଥିଲା । ୨୦୨୪ ‘ଭାଲେଣ୍ଟାଇନ୍ସ ଡେ’ରେ ଆଲବାନିଜ ଜୋଡିଙ୍କୁ ବିବାହ ପ୍ରସ୍ତାବ ଦେଇଥିଲେ । ବିବାହ ପରେ ଆଲବାନିଜ ସୋସିଆଲ ମିଡିଆ ‘ଏକ୍ସ’ ରେ ଏକ ଫଟୋ ପୋଷ୍ଟ କରି ନିଜର ଖୁସି ବ୍ୟକ୍ତ କରିଛନ୍ତି ।