ଉତ୍ତରପ୍ରଦେଶର ଆଗ୍ରାରେ ବଡ଼ ଅଘଟଣ ଘଟିଛି । ମୃତ୍ୟ କେତେ ବେଳେ କିପରି ଆସେ ତାର ଏକ ଭୟଙ୍କର ଉଦାହରଣ ଦେଖିବାକୁ ମିଳିଛି । ଆଖି ପିଛୁଳାକେ ସବୁ କିଛି ଛାର୍ଖାର ହୋଇଛି । ଏକ ଦ୍ରୁତଗାମୀ କାର୍ ଆତଙ୍କ ଖେଳାଇ ଦେଇଛି । ଘର ବାହାରେ ବସିଥିବା କିଛି ଲୋକଙ୍କ ଉପରେ ଦ୍ରୁତ ଗତିରେ ଆସୁଥିବା କାର୍ଟି ଚଢି ଯାଇଛି । ପ୍ରାୟ ୫୦ ମିଟର ସେମାନଙ୍କୁ ଘୋଷାଡି ନେଇଥିବା ଜଣାପଡିଛି । ୭ଜଣଙ୍କ ଉପରେ ମାଡିଯାଇଛି କାର୍ । ୫ ଜଣଙ୍କର ମୃତ୍ୟୁ ହୋଇଥିବା ବେଳେ ୨ ଜଣ ଗୁରୁତର ଆହତ ହୋଇଛି । ମୃତକଙ୍କ ମଧ୍ୟରେ ୪ ଜଣ ପୁରୁଷ ଓ ଜଣେ ମହିଳା ଅଛନ୍ତି ।
ନ୍ୟୁ ଆଗ୍ରାର ନଗଲା ବୁଢୀ ଅଞ୍ଚଳରେ ଏହି ଅଘଟଣ ଘଟିଛି । ପ୍ରତ୍ୟକ୍ଷଦର୍ଶୀଙ୍କ କହିବା ଅନୁସାରେ, ଏକ କାର୍ ଦ୍ରୁତଗତିରେ ଆସି ନିୟନ୍ତ୍ରଣ ହରାଇ ଘର ବାହାରେ ବସିଥିବା ଲୋକଙ୍କ ଉପରେ ଚଢିଗଲା । ୭ ଜଣଙ୍କୁ ଚାପି ଦେଲା । କାର୍ର ସିପ୍ଡ ଏତେ ଥିଲା ଯେ ନିୟନ୍ତ୍ରଣ ରଖିପାରିଲେ ନାହିଁ ଡ୍ରାଇଭର । ଘର ବାହାରେ ବସିଥିବା ଲୋକଙ୍କ ଉପରେ ମାଡି ଯାଇ ୫୦ ମିଟର ଯାଏ ଘୋଷାଡି ନେଇଥିଲା । ଏହାପରେ କାନ୍ଥରେ ପିଟି ହୋଇଥିଲା । କାର୍ ଚାଳକଙ୍କୁ ଧରି ପୁଲିସ୍କୁ ହସ୍ତାନ୍ତର କରିଛନ୍ତି ସ୍ଥାନୀୟ ଲୋକ । ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ଉତ୍ତେଜନା ଦେଖିବାକୁ ମିଳିଛି । ଲୋକଙ୍କ ମଧ୍ୟରେ ଆକ୍ରୋଶ ଦେଖାଯାଇଛି । ଏହାକୁ ନେଇ ସେଠାରେ ପୁଲିସ୍ ଫୋର୍ସ ମୁତୟନ କରାଯାଇଛି । ଆହତଙ୍କୁ ଉଦ୍ଧାର କରାଯାଇ ଏସ୍ଏମ୍ ମେଡିକାଲରେ ଭର୍ତ୍ତି କରାଯାଇଥିଲା । ଡାକ୍ତର ୫ ଜଣଙ୍କୁ ମୃତ ଘୋଷଣା କରିଛନ୍ତି ।
ଅଘଟଣକୁ ନେଇ ଦୁଃଖ ପ୍ରକାଶ କରିଛନ୍ତି ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ । ଆହତଙ୍କ ଆଶୁ ଆରୋଗ୍ୟ କାମନା କରିବା ସହ ଉତ୍ତମ ଚିକିତ୍ସା ନେଇ ଅଧିକାରୀଙ୍କୁ ନିର୍ଦ୍ଦେଶ ଦେଇଛନ୍ତି ।