ଇଟାଲିର ଏକ ପାହାଡ଼ିଆ ଗାଁରେ ଏକ ସନ୍ତାନ ଜନ୍ମ ପରେ ସ୍ଥାନୀୟ ଅଞ୍ଚଳରେ ଖୁସିର ଲହରି ଖେଳିଯାଇଛି । ଅବ୍ରୁଜୋ ଅଞ୍ଚଳରେ ସ୍ଥିତ ମାଉଣ୍ଟ୍ ଗିରିଫାଲ୍କୋର ପାଦଦେଶରେ ରହିଛି ଛୋଟ ଗାଁ ପଗ୍ଲିଆରା ଦେଇ ମାର୍ସି । ଅନେକ ବର୍ଷ ହେଲା ଲୋକେ ଗାଁ ଛାଡ଼ି ଚାଲିଯିବା ଯୋଗୁ ଏହାର ଜନସଂଖ୍ୟା ଖୁବ୍ କମିଯାଇଛି । ଆଜି ଗାଁର ଗଳିକନ୍ଦିରେ ମାଳ ମାଳ ବିଲେଇ ସ୍ୱାଧୀନ ଭାବେ ବିଚରଣ କରୁଛନ୍ତି । ବିନା ଦ୍ୱିଧାରେ ଲୋକଙ୍କ ଘରେ ପଶିଯାଉଛନ୍ତି । ମନ ଇଚ୍ଛା କାନ୍ଥ ବାଡ଼ରେ ଆରାମ କରୁଛନ୍ତି । ସେମାନଙ୍କ ଉପସ୍ଥିତି ଜନସଂଖ୍ୟା ଅଭାବ ଜନିତ ନିରବତାକୁ ଦୂର କରୁଛି ।
ଗତ ମାର୍ଚ୍ଚରେ ଗାଁରେ ପ୍ରାୟ ୩୦ ବର୍ଷ ପରେ ପ୍ରଥମ ଥର ଏକ ଶିଶୁ ଜନ୍ମ ହେଲା, ଯାହା ଗାଁ ପାଇଁ ଉତ୍ସବର ମୁହୂର୍ତ୍ତ ଥିଲା । ୩ ଦଶନ୍ଧି ପରେ ଜନ୍ମ ହୋଇଥିବା ଏହି ଶିଶୁର ନାଁ ଲାରା ବୁସି ଟ୍ରାବୁକୋ । ଏହି ଶିଶୁ କନ୍ୟାର ଜନ୍ମ ପରେ ଗାଁର ଜନସଂଖ୍ୟା ୨୦ ହେଲା । ତାଙ୍କ ଘର ଆରପଟେ ଥିବା ଚର୍ଚ୍ଚରେ ଲାରାର ଜନ୍ମୋତ୍ସବ ପାଳିତ ହୋଇଥିଲା, ଯେଉଁଥିରେ ପୂରା ଗାଁ ସାମିଲ ହୋଇଥିଲା । ଗାଁର ବିଲେଇ ବି ଉତ୍ସବରେ ଯୋଗ ଦେଇଥିଲେ । ଗାଁରେ ସନ୍ତାନ ଜନ୍ମ ବିରଳ ହୋଇଥିବାରୁ ଲାରା ମୁଖ୍ୟ ଆକର୍ଷଣ ପାଲଟିଛି । ଲାରାର ମା’ ସିନଜିୟା ଟ୍ରାବୁକୋ କହିଛନ୍ତି, ଏପର୍ଯ୍ୟନ୍ତ ପଗ୍ଲିଆରା ଦେଇ ମାର୍ସି ବିଷୟରେ କେବେ ଶୁଣିନଥିବା ଲୋକେ ଏବେ ଲାରା ପାଇଁ ଗାଁକୁ ବୁଲିବାକୁ ଆସୁଛନ୍ତି । ମାତ୍ର ୯ ମାସରେ ତାଙ୍କ ଝିଅ ଖୁବ୍ ଲୋକପ୍ରିୟ ହୋଇଛି । ଲାରାର ଜନ୍ମ ଗାଁ ପାଇଁ ଖୁସି ଆଣିଥିବା ବେଳେ ଇଟାଲିର ଗମ୍ଭୀର ଜନସଂଖ୍ୟା ସମସ୍ୟା ବିଶ୍ୱର ଦୃଷ୍ଟି ଆକର୍ଷଣ କରିଛି ।