ଗତ ତିନି ବର୍ଷ ଧରି ଋଷ ଏବଂ ୟୁକ୍ରେନ ମଧ୍ୟରେ ଯୁଦ୍ଧ ଜାରି ରହିଛି । ଆଉ ଏହାରି ମଧ୍ୟରେ ଉଭୟ ଦେଶର ସେନା ପରସ୍ପର ଉପରେ ଲଗାତାର ଆକ୍ରମଣ କରି ଆସୁଛନ୍ତି। ସେହିଭଳି ଶୁକ୍ରବାର ରାତି ଠାରୁ ଶନିବାର ସକାଳ ପର୍ଯ୍ୟନ୍ତ ଡ୍ରୋନ୍ ଏବଂ କ୍ଷେପଣାସ୍ତ୍ର ବ୍ୟବହାର କରି ରୁଷ ଏକ ବଡ଼ ଆକ୍ରମଣ ଆରମ୍ଭ କରିଥିଲା। ରଏଟର୍ସର ଏକ ରିପୋର୍ଟ ଅନୁଯାୟୀ, ରୁଷ ଦୁଇଟି ପରମାଣୁ ଶକ୍ତି କେନ୍ଦ୍ର, ଖମେଲନିଟସ୍କି ଏବଂ ରିଭନେକୁ ବିଦ୍ୟୁତ୍ ଯୋଗାଣ କରୁଥିବା ସବଷ୍ଟେସନକୁ ଟାର୍ଗେଟ କରିଥିଲା।
ୟୁକ୍ରେନର ବୈଦେଶିକ ମନ୍ତ୍ରୀ ଆଣ୍ଡ୍ରେ ସିବିହା କହିଛନ୍ତି, “ଏହି ଆକ୍ରମଣ ଭୁଲରେ କରାଯାଇ ନଥିଲା। ରୁଷ ଜାଣିଶୁଣି ୟୁରୋପରେ ପରମାଣୁ ସୁରକ୍ଷାକୁ ବିପଦରେ ପକାଇଥିଲା।” ଆକ୍ରମଣରେ ଅତି କମରେ ୭ ଜଣ ଲୋକ ପ୍ରାଣ ହରାଇଥିଲେ ଏବଂ ଅନେକ ଆହତ ହୋଇଛନ୍ତି। ଡିନିପର ସହରରେ ଏକ ଆବାସିକ କୋଠାରେ ଡ୍ରୋନ୍ ଆକ୍ରମଣ କରିବା ଫଳରେ ତିନି ଜଣଙ୍କର ମୃତ୍ୟୁ ହୋଇଥିଲା, ଯେତେବେଳେ ଜାପୋରିଝିଆରେ ତିନି ଜଣଙ୍କ ଏବଂ ଖାରକିଭରେ ଜଣଙ୍କର ମୃତ୍ୟୁ ନିଶ୍ଚିତ ହୋଇଛି।
ପ୍ରଧାନମନ୍ତ୍ରୀ ୟୁଲିଆ ସ୍ୱିରିଡେଙ୍କୋ କହିଛନ୍ତି ଯେ, ଆକ୍ରମଣ ଯୋଗୁଁ କିଭ୍, ପୋଲ୍ଟାଭା ଏବଂ ଖାରକିଭ୍ ଅଞ୍ଚଳରେ ଶକ୍ତି ଭିତ୍ତିଭୂମିକୁ ବହୁତ କ୍ଷତି ପହଞ୍ଚାଇଛି। ହଜାର ହଜାର ଘରକୁ ବିଦ୍ୟୁତ୍ ଏବଂ ପାଣି ଯୋଗାଣ ବାଧାପ୍ରାପ୍ତ ହୋଇଛି। ପୋଲ୍ଟାଭା ଅଧିକାରୀମାନେ କହିଛନ୍ତି ଯେ, ପାଣି ଯୋଗାଇବା ପାଇଁ ପାୱାର ଜେନେରେଟର ବ୍ୟବହାର କରାଯାଉଛି। ରାଷ୍ଟ୍ରାୟତ୍ତ ଶକ୍ତି କମ୍ପାନୀ ସେଣ୍ଟରେନର୍ଗୋ ଫେବୃଆରୀ ୨୦୨୨ରେ ଯୁଦ୍ଧ ଆରମ୍ଭ ହେବା ପରଠାରୁ ଏହି ଆକ୍ରମଣକୁ ସବୁଠାରୁ ବଡ଼ ବୋଲି ବର୍ଣ୍ଣନା କରିଛି। କମ୍ପାନୀ କହିଛି ଯେ, ଶତ୍ରୁ ଦେଶ ଏହାର ସମସ୍ତ ଉତ୍ପାଦନ କ୍ଷମତା ଉପରେ ଏକକାଳୀନ ଆକ୍ରମଣ କରିଛି। “ଆମର ପ୍ଲାଣ୍ଟଗୁଡ଼ିକରେ ନିଆଁ ଲାଗିଛି,” କମ୍ପାନୀ କହିଛି। “ବିଦ୍ୟୁତ୍ ଉତ୍ପାଦନ ଶୂନ୍ୟକୁ ଖସି ଆସିଛି।” ସେଣ୍ଟରେନର୍ଗୋ ୟୁକ୍ରେନର ମୋଟ ବିଦ୍ୟୁତ୍ ର ପ୍ରାୟ ୮% ଉତ୍ପାଦନ କରେ, ତେଣୁ ଏହି ଆକ୍ରମଣ ଜାତୀୟ ପାୱାର ଗ୍ରୀଡ୍ ଉପରେ ଗୁରୁତର ପ୍ରଭାବ ପକାଇଛି। ସେପଟେ ବୈଦେଶିକ ମନ୍ତ୍ରୀ ଆଣ୍ଡ୍ରେ ସିବିହା ଅନ୍ତର୍ଜାତୀୟ ପରମାଣୁ ଶକ୍ତି ଏଜେନ୍ସିର ବୋର୍ଡ ଅଫ୍ ଗଭର୍ଣ୍ଣର୍ସର ଏକ ଜରୁରୀ ବୈଠକ ଡାକିଛନ୍ତି। ସେ ଚୀନ୍ ଏବଂ ଭାରତକୁ ଋଷ ଉପରେ ଚାପ ପକାଇବାକୁ ନିବେଦନ କରିଛନ୍ତି। ଯାହା ଯେ କୌଣସି ସମୟରେ ଏକ ଭୟଙ୍କର ପରମାଣୁ ଦୁର୍ଘଟଣାର କାରଣ ହୋଇପାରେ। ପ୍ରକାଶ ଥାଉକି, ରୁଷ ପୂର୍ବରୁ ଜାପୋରିଝିଆ ପରମାଣୁ ପ୍ଲାଣ୍ଟ ନିକଟରେ ଗୁଳିବର୍ଷା କରିଥିଲା, ଯାହା ୟୁରୋପରେ ବିକିରଣ ବିପଦ ସୃଷ୍ଟି କରିଥିଲା।