BMCରେ କ୍ଷମତା ଦଖଲ ପାଇଁ ଯାଦୁକରୀ ସଂଖ୍ୟା ହେଉଛି ୧୧୪। ନିକଟରେ ଶେଷ ହୋଇଥିବା ନିର୍ବାଚନରେ ବିଜେପି ୮୯ଟି ଆସନ ସହ ସବୁଠାରୁ ବଡ଼ ଦଳ ଭାବେ ଉଭା ହୋଇଛି। ଅନ୍ୟପଟେ ଠାକରେ ଗୋଷ୍ଠୀ ୬୫ଟି ଏବଂ MNS ୬ଟି ଆସନ ହାସଲ କରିଛନ୍ତି। କିନ୍ତୁ ବିଜେପି ପାଖରେ ମେୟର ପଦ ପାଇଁ ଆବଶ୍ୟକ ସଂଖ୍ୟା ନାହିଁ। ଏହି ସ୍ଥିତିରେ ଏକନାଥ ସିନ୍ଦେଙ୍କ ନେତୃତ୍ୱାଧୀନ ଶିବସେନାର ୨୯ ଜଣ କାଉନସିଲରଙ୍କ ସମର୍ଥନ ବିଜେପି ପାଇଁ ଅତ୍ୟନ୍ତ ଜରୁରୀ ହୋଇପଡ଼ିଛି।
ମିଳିଥିବା ସୂଚନା ଅନୁସାରେ, ଏକନାଥ ସିନ୍ଦେ ଏବେ ବିଜେପି ଉପରେ ଚାପ ପକାଇବା ଆରମ୍ଭ କରିଛନ୍ତି। ଚଳିତ ବର୍ଷ ବାଲାସାହେବ ଠାକରେଙ୍କ ଜନ୍ମ ଶତବାର୍ଷିକୀ ହୋଇଥିବାରୁ, ତାଙ୍କ ସ୍ମୃତିରେ ସିନ୍ଦେ ଗୋଷ୍ଠୀ ମୁମ୍ବାଇର ମେୟର ପଦବୀ ଦାବି କରୁଛି। ଚର୍ଚ୍ଚା ହେଉଛି ଯେ, ସିନ୍ଦେ ସେନା ଅଢ଼େଇ ବର୍ଷ ପାଇଁ ମେୟର ପଦ ସହ ଗୁରୁତ୍ୱପୂର୍ଣ୍ଣ ସ୍ଥାୟୀ କମିଟି ଅଧ୍ୟକ୍ଷ ପଦବୀ ମଧ୍ୟ ହାତେଇବାକୁ ଯୋଜନା କରୁଛି। ବିଜେପିର ବାଧ୍ୟବାଧକତାକୁ ଅସ୍ତ୍ର କରି ସିନ୍ଦେ ନିଜ ଦଳ ପାଇଁ ବଡ଼ ଭାଗ ମାଗୁଛନ୍ତି।
ନିଜର ବିଧାୟକମାନଙ୍କୁ ସୁରକ୍ଷିତ ରଖିବା ପାଇଁ ଏକନାଥ ସିନ୍ଦେ ପୁଣିଥରେ ‘ହୋଟେଲ ରାଜନୀତି’ର ସହାରା ନେଇଛନ୍ତି। ସେ ତାଙ୍କର ସମସ୍ତ ୨୯ ଜଣ କାଉନସିଲରଙ୍କୁ ବାନ୍ଦ୍ରାର ‘ତାଜ ଲ୍ୟାଣ୍ଡସ୍ ଏଣ୍ଡ୍’ ହୋଟେଲକୁ ସ୍ଥାନାନ୍ତରିତ କରିଛନ୍ତି। ମେୟର ନିର୍ବାଚନ ସରିବା ଯାଏଁ ସେମାନେ ସେଠାରେ ରହିବେ। ଏହାକୁ ନେଇ ବିଜେପି ଶିବିରରେ କିଛିଟା ଅସ୍ୱାଭାବିକ ପରିସ୍ଥିତି ସୃଷ୍ଟି ହୋଇଛି।
ତେବେ ଏହି ଟାଣପୋଟରା ଭିତରେ ଉପ-ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭିସ୍ ସକାରାତ୍ମକ ମନ୍ତବ୍ୟ ଦେଇଛନ୍ତି। ସେ କହିଛନ୍ତି ଯେ, ମହାୟୁତି (ମେଣ୍ଟ) ପାଖରେ ସମ୍ପୂର୍ଣ୍ଣ ବହୁମତ ଅଛି ଏବଂ ମୁମ୍ବାଇର ପରବର୍ତ୍ତୀ ମେୟର ମହାୟୁତିରୁ ହିଁ ହେବେ। ସିନ୍ଦେଙ୍କ ସହ ଆଲୋଚନା କରି ସମସ୍ତ ନିଷ୍ପତ୍ତି ନିଆଯିବ ବୋଲି ସେ ସ୍ପଷ୍ଟ କରିଛନ୍ତି। ହୋଟେଲରେ ରଖିବା ପ୍ରସଙ୍ଗକୁ ସେ ଏକ ସାଧାରଣ ପ୍ରକ୍ରିୟା ବୋଲି କହିବା ସହ ଏଥିରେ କୌଣସି ବିବାଦ ନଥିବା ଦର୍ଶାଇଛନ୍ତି।
ବର୍ତ୍ତମାନ ସମସ୍ତଙ୍କ ନଜର ବିଜେପିର ହାଇକମାଣ୍ଡଙ୍କ ଉପରେ। ସିନ୍ଦେଙ୍କ ଦାବିକୁ ବିଜେପି ଗ୍ରହଣ କରିବ ନା ନିଜର ମେୟର କରିବା ପାଇଁ ଅନ୍ୟ କୌଣସି ରଣନୀତି ଆପଣେଇବ, ତାହା ସମୟ କହିବ।