ବଜାର ସମେତ ବିଭିନ୍ନ ଅଞ୍ଚଳରେ ନକଲି ପନିର, ଛେନା, ଦହି ଅପମିଶ୍ରିତ କ୍ଷୀର ସହିତ ଅନେକ ଦୁଗ୍ଧ ଜାତୀୟ ଖାଦ୍ୟ ପଦାର୍ଥ ବହୁଳ ମାତ୍ରାରେ ବିକ୍ରି ହେଉଥିବାର ଖବର ଖାଉଟିଙ୍କୁ ଚିନ୍ତାରେ ପକାଇଛି । ଯେତିକି ଗାଈ ଓ ମଇଁଷି ଅଛନ୍ତି ସେମାନଙ୍କ ଠାରୁ ଦୈନନ୍ଦିନ ଉତ୍ପାଦନ ହେଉଥିବା ଦୁଗ୍ଧରେ ଖାଉଟିଙ୍କ ଆବଶ୍ୟକତା ମେଣ୍ଟାଇ ପାରୁନାହିଁ । ଏହାର ସୁଯୋଗ ନେଇ ଅସାଧୁ ବ୍ୟବସାୟୀ ଅପମିଶ୍ରଣ କରୁଛନ୍ତି ।
ସୂଚନା ଥାଉ କି, ବଡ଼ ବଡ଼ ଗୋଦାମରେ ନିମ୍ନମାନର ଦୁଗ୍ଧ ପାଉଡର୍ ସହିତ ଭେଜିଟେବଲ୍ ଫ୍ୟାଟ୍ ମିଶ୍ରଣ କରି ଛେନା, ପନିର ପ୍ରସ୍ତୁତ କରି ବଜାରକୁ ଛାଡୁଛନ୍ତି। ଏପରିକି ଏହି ନିମ୍ନମାନର ପାଉଡ଼ରକୁ ପ୍ରକ୍ରିୟାକରଣ କରି ଦହି, ମିଠା ଦହି, ରାବିଡ଼ି ଭଳି ଅନେକ ଦୁଗ୍ଧ ଜାତୀୟ ଖାଦ୍ୟ ଓ ପାନୀୟ ଖାଦ୍ୟ ବଜାରକୁ ଛାଡୁଛନ୍ତି । ବିଶେଷ କରି ବଜାରକୁ ସିନ୍ଥେଟିକ୍ ପନିର ଓ ଅପମିଶ୍ରିତ କ୍ଷୀର କବଜା କରି ନେଇଥିବା ଅଭିଯୋଗ ହେଉଛି । ଏହି ଅପମିଶ୍ରିତ କ୍ଷୀର, ଛେନା, ପନିର ବଜାରକୁ ଆସିବା ପଛରେ ଅନ୍ତଃରାଜ୍ୟ ଦଲାଲ କାମ କରୁଛନ୍ତି । ଯେଉଁମାନେ କି ରାଜଧାନୀ ସମେତ ରାଜ୍ୟ ବାହାରୁ କ୍ଷୀର ପାଉଡର୍ ଆଣି ବ୍ୟବସାୟୀ ମାନଙ୍କୁ ବିକ୍ରି କରୁଛନ୍ତି । କ୍ଷୀର ବ୍ୟବସାୟୀମାନେ ଏହି ପାଉଡର୍କୁ ନେଇ ଦୁଗ୍ଧ ଜାତୀୟ ଖାଦ୍ୟ ଦ୍ରବ୍ୟ ବିକ୍ରି କରୁଛନ୍ତି । ଗୋରୁ ଓ ମଇଁଷି ଦୁଗ୍ଧରୁ ତିଆରି ବିଭିନ୍ନ ଖାଦ୍ୟ ସାମଗ୍ରୀ ଅପେକ୍ଷା ପାଉଡର୍ରୁ ତିଆରି ହେଉଥିବା ଜିନିଷ ଶସ୍ତା ଓ ଲାଭଜନକ ହେଉଥିବାରୁ ଲୋକଙ୍କ ସ୍ୱାସ୍ଥ୍ୟ ପ୍ରତି ଧ୍ୟାନ ନଦେଇ ଅଧିକ ଲାଭ ଆଶାରେ ବୃତ୍ତି କରିସାରିଲେଣି । ବଜାରରେ ଏହି କୃତ୍ରିମ କ୍ଷୀର ପାଉଡର୍ ଶହ ଶହ ବସ୍ତା ଖୁଲମ ଖୁଲା ବିକ୍ରି ହେଉଛି । ଏହି ପାଉଡର୍ରେ ମିଲ୍କ ଫ୍ୟାଟ୍ ବଦଳରେ ଭେଜିଟେବଲ୍ ଫ୍ୟାଟ ମିଶାଯାଉଛି । ନକଲି ଛେନା, ପନିର ପ୍ରସ୍ତୁତ ପାଇଁ ନାଇଟ୍ରିକ୍ ଏସିଡ୍ ବ୍ୟବହାର ହେଉଛି । ଏହାକୁ ଖାଇଲେ ମନୁଷ୍ୟ ବିଭିନ୍ନ ରୋଗରେ ଆକ୍ରାନ୍ତ ହେବ ।
ବଜାରରେ ବିକ୍ରି ହେଉଥିବା ଛେନା, ପନିର ଓ ମିଠା ଦହି ଭଳି ବିଭିନ୍ନ ଖାଦ୍ୟ ଦ୍ରବ୍ୟର ନିୟମିତ ଯାଞ୍ଚ ଓ କଳାବଜାର କରୁଥିବା ବ୍ୟବସାୟୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ବଦଳରେ ଖାଦ୍ୟ ନିରାପତ୍ତା ବିଭାଗ ନିଷ୍କ୍ରିୟ ହୋଇପଡ଼ିଛି । ଫଳରେ ବଜାରରେ ମିଳୁଥିବା ଦୁଗ୍ଧ ଜାତୀୟ ଜିନିଷ ଅସଲି ନା ନକଲି ଲୋକ ସନ୍ଦେହରେ ପଡୁଛନ୍ତି ।