ରାଜ୍ୟସ୍ତରୀୟ ୭୭ତମ ସାଧାରଣତନ୍ତ୍ର ଦିବସ ପାଇଁ ଜୋର୍ଦାର ପ୍ରସ୍ତୁତି ଚାଲିଛି । ମହତ୍ମାଗାନ୍ଧୀ ମାର୍ଗରେ ପରେଡ୍ ଅଭ୍ୟାସ ଆରମ୍ଭ ହୋଇଛି । ଦେଶାତ୍ମବୋଧକ ଗୀତ ତାଳେ ତାଳେ ସାମରିକ ଓ ଅର୍ଦ୍ଧସାମରିକ ବାହିନୀ ସହ ସ୍କୁଲ କଲେଜ ଛାତ୍ରଛାତ୍ରୀମାନେ ପରେଡ୍ର କରିବେ । ଏଥିପାଇଁ କମିଶନରେଟ୍ ପୁଲିସ ପକ୍ଷରୁ ଟ୍ରାଫିକ୍ ବ୍ୟବସ୍ଥା ଉପରେ କଟକଣା ଲାଗୁ ହୋଇଛି ।
ପରେଡ୍ ଅଭ୍ୟାସ୍ ପାଇଁ ୨୩ ତାରିଖ ଅଭ୍ୟାସ ପରେଡ୍, ୨୪ ତାରିଖ ପୂର୍ଣ୍ଣ ଅଭ୍ୟାସ ପରେଡ ଏବଂ ୨୬ ତାରିଖ ସକାଳ ରାଜ୍ୟସ୍ତରୀୟ ସାଧାରଣତନ୍ତ୍ର ଦିବସ ପରେଡ ସକାଳ ୬ଟାରୁ ଆରମ୍ଭ ହୋଇ ପରେଡ ସରିବା ପର୍ଯ୍ୟନ୍ତ ସର୍ବସାଧାରଣଙ୍କ ସୁଗମନାଗମନ ଓ ପାର୍କିଂ ନିମନ୍ତେ ବିଭିନ୍ନ ରାସ୍ତାକୁ ବନ୍ଦ କରି ଦିଆଯିବ । ଗାନ୍ଧୀମାର୍ଗକୁ କୌଣସି ଗାଡ଼ିକୁ ଆସିବାକୁ ଦିଆଯିବନି । ଜନପଥ ଟ୍ରାଫିକ୍ ସ୍ୱାଭାବିକ ଭାବେ ଚଳାଚଳ କରିବ । କିନ୍ତୁ ମାଷ୍ଟର କ୍ୟାଣ୍ଟିନ୍ଠାରୁ ଗାନ୍ଧୀମାର୍ଗକୁ କୌଣସି ଗାଡ଼ି ଗଡ଼ିବାକୁ ଯିବାକୁ ଅନୁମତି ଦିଆଯିବ ନାହିଁ । ସଚିବାଳୟ ମାର୍ଗରେ ହାଉସିଂ ବୋର୍ଡରୁ ପିଏମ୍ଜି ପଟକୁ ଆସୁଥିବା ଗାଡ଼ି ଗୁଡ଼ିକ ରବୀନ୍ଦ୍ର ମଣ୍ଡପ ପୂର୍ବରୁ ବାମ ପଟକୁ ମୋଡ଼ କରିବେ । ଏଜି ଛକରୁ ପିଏମ୍ଜି ଛକ ଆଡକୁ ଆସୁଥିବା ଗାଡ଼ିଗୁଡ଼ିକ ଇନ୍ଦିରାଗାନ୍ଧୀ ପାର୍କ ପୂର୍ବରୁ ଡାହଣକୁ ମୋଡ କରିବେ । ୧୨୦ ବାଟାଲିୟନରୁ ରବୀନ୍ଦ୍ର ମଣ୍ଡପ ଆଡକୁ ଆସୁଥିବା ଗାଡ଼ି ଗୁଡ଼ିକ ଏମ୍ଏଲ୍ଏ କଲୋନୀ ମୋଡରେ ବାମକୁ ଯିବେ ।
୨୪ ଓ ୨୬ ତାରିଖ ଦିନ ସକାଳ ୬ରୁ ସାଢ଼େ ୧୧ଟା ପର୍ଯ୍ୟନ୍ତ ଏହି ରାସ୍ତାରେ ଗାଡ଼ିମୋଟର ଚଳାଚଳ ବନ୍ଦ ରହିବ । ଏହି ସବୁ ନିୟମ ଯଦି କେହି ଉଲ୍ଲଙ୍ଘନ କରିବ ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯିବ । ୨୬ ତାରିଖ ଦିନ ଯେଉଁମାନେ ରାଜ୍ୟସ୍ତରୀୟ ପରେଡ୍ ଦେଖିବାକୁ ଯିବେ ସେମାନଙ୍କ ପାଇଁ ପୁଲିସ୍ ପାର୍କିଂ ବ୍ୟବସ୍ଥା କରିଛି । ରେଲୱେ ଷ୍ଟେସନ୍ ପାଖ ବିଡିଏ ବସ୍ଷ୍ଟାଣ୍ଡ, କଂଗ୍ରେସ୍ ଭବନ ସମ୍ମୁଖରେ ଥିବା ଖାଲି ସ୍ଥାନ, ଇଡକଲ ଅଡିଟୋରିୟମ ପାଖ ଖୋଲା ସ୍ଥାନ, ଜୟଦେବଭବନ ସାମ୍ନା, ୟୁନିଟ୍-୩ ଏସ୍ବିଆଇ ସାମ୍ନା, ରବୀନ୍ଦ୍ର ମଣ୍ଡପ ସାମ୍ନା ଓ ୟୁନିଟ୍-୧ ବାଳିକା ଉଚ୍ଚ ବିଦ୍ୟାଳୟରେ କାର୍ ଓ ବାଇକ୍ ରଖି ପାରିବେ ।