ଜାତୀୟ ରାଜଧାନୀ ଦିଲ୍ଲୀରେ ବାୟୁ ପ୍ରଦୂଷଣ ସାଂଘାତିକ ସ୍ତରରେ ପହଞ୍ଚିଛି । ପ୍ରଦୂଷଣ ସ୍ତର ଏତେ ବଢ଼ିଯାଇଛି ଯେ ଲୋକମାନେ ଶ୍ୱାସପ୍ରଶ୍ୱାସ ନେବାରେ ସମସ୍ୟା ସୃଷ୍ଟି ହୋଇଛି । ପରିସ୍ଥିତିକୁ ଦୃଷ୍ଟିରେ ରଖି ବାୟୁ ଗୁଣବତ୍ତା ପ୍ରବନ୍ଧନ ଆୟୋଗ (ସିଏକ୍ୟୁଏମ୍) ଆଜି ସନ୍ଧ୍ୟାରେ ସବୁଠୁ କଠୋର ଗ୍ରାପ-୪ କଟକଣା ଲାଗୁ କରିଛନ୍ତି । ଏହା ପୂର୍ବରୁ ସିଏକ୍ୟୁଏମ୍ ଶନିବାର ସକାଳେ ପ୍ରଦୂଷଣ ସ୍ତର ବୃଦ୍ଧିର ମୁକାବିଲା କରିବା ଲାଗି ଗ୍ରାପ୍-୩ ଲାଗୁ କରିଥିଲେ । କିନ୍ତୁ ସନ୍ଧ୍ୟାରେ ପ୍ରଦୂଷଣ ବଢ଼ିବା ପରେ ତତ୍କାଳ ଗ୍ରାପ-୪ ଲାଗୁ କରିବାକୁ ନିର୍ଦ୍ଦେଶ ଦେଇଛନ୍ତି ।
ଦିଲ୍ଲୀରେ ଶନିବାର ଅପରାହ୍ନରେ ଏକ୍ୟୁଆଇ (ବାୟୁ ଗୁଣବତ୍ତା ସୂଚକାଙ୍କ) ସ୍ତର ୪୩୧ ଥିଲା । କିନ୍ତୁ ସନ୍ଧ୍ୟା ୬ଟା ବେଳକୁ ତାହା ବୃଦ୍ଧି ପାଇ ୪୪୧ରେ ପହଞ୍ଚିଥିଲା । ଆଜି ସକାଳୁ ସମଗ୍ର ଦିଲ୍ଲୀ ଧୂଆଁ ଓ ଘନ କୁହୁଡିର ମୋଟା ଚାଦରରେ ଘୋଡ଼େଇ ହୋଇ ରହିଥିଲା । ଦୃଶ୍ୟମାନ ଦୂରତା ମଧ୍ୟ ହ୍ରାସ ପାଇଥିଲା । ୱାଜିରପୁରରେ ଏକ୍ୟୁଆଇ ସ୍ତର ସର୍ବାଧିକ ୪୪୫ ରହିଥିଲା ବେଳେ ବିବେକ ବିହାରରେ ୪୪୪, ଜାହାଙ୍ଗୀରପୁରୀରେ ୪୪୨, ଆନନ୍ଦ ବିହାରରେ ୪୩୯ ଓ ଅଶୋକ ବିହାରରେ ୪୩୭ ଏକ୍ୟୁଆଇ ସ୍ତର ପହଞ୍ଚିଥିବା ରେକର୍ଡ କରାଯାଇଛି । ସେହିଭଳି ନରେଲାରେ ଏକ୍ୟୁଆଇ ସ୍ତର ୪୩୨ ରେକର୍ଡ କରାଯାଇଥିଲା ବେଳେ ପଟପଡଗଞ୍ଜରେ ୪୩୧, ମୁଣ୍ଡକାରେ ୪୩୦, ଆଇଟିଓ ଓ ନେହରୁ ନଗରରେ ୪୨୯, ଚାନ୍ଦିନୀ ଚୌକ ଓ ପଞ୍ଜାବି ବାଗରେ ୪୨୩, ସିରି ଫୋର୍ଟ ଓ ସୋନିଆ ବିହାରରେ ୪୨୪, ବୁରାରୀରେ ୪୧୪, ନର୍ଥ କ୍ୟାମ୍ପସ ଓ ଆରକେ ପୁରମରେ ୪୦୮ ଏବଂ ଓଖଲାରେ ଏକ୍ୟୁଆଇ ସ୍ତର ୪୦୪ ରହିଛି ।
ଗ୍ରାପ-୪ କଟକଣା ଅନ୍ତର୍ଗତ ଜାତୀୟ ରାଜପଥ, ଅନ୍ୟାନ୍ୟ ସଡକ, ଫ୍ଲାଇଓଭର, ଓଭରବ୍ରିଜ ଓ ବିଦ୍ୟୁତ ବିତରଣ ପରିଯୋଜନା ସହ ଜଡିତ ସମସ୍ତ କାର୍ଯ୍ୟକୁ ଛାଡି ଅନ୍ୟ ସମସ୍ତ ନିର୍ମାଣ କାର୍ଯ୍ୟ ବନ୍ଦ ରହିବ । ଦିଲ୍ଲୀରେ ଟ୍ରକ ଓ ଅନ୍ୟ ଭାରୀଯାନର ପ୍ରବେଶ ଉପରେ କଟକଣା ରହିବ । କେବଳ ଅତ୍ୟାବଶ୍ୟକ ସାମଗ୍ରୀ ଧରି ଆସୁଥିବା ଯାନ, ସିଏନ୍ଜି ଓ ବୈଦ୍ୟୁତିକ ଟ୍ରକ ଏବଂ ବିଏସ୍-୬ ଇଞ୍ଜିନ ଥିବା ଟ୍ରକକୁ କଟକଣାରୁ ବାଦ୍ ଦିଆଯାଇଛି । ବାହାର ଗାଡି ପ୍ରବେଶ ଉପରେ ରୋକ୍ ଲାଗିବ । ଦିଲ୍ଲୀରେ ପଞ୍ଜିକୃତ ବିଏସ୍-୪ କିମ୍ବା ତାଠାରୁ ପୁରୁଣା ଭାରୀଯାନ ଚଳାଚଳ ବନ୍ଦ ରହିବ । ଷଷ୍ଠରୁ ଦ୍ୱାଦଶ ଶ୍ରେଣୀ ପର୍ଯ୍ୟନ୍ତ ପିଲାଙ୍କର ପାଠପଢ଼ା ଅନ୍ଲାଇନ କିମ୍ବା ହାଇବ୍ରିଡ ମୋଡ୍ରେ କରାଯିବ । ସରକାରୀ ଓ ବେସରକାରୀ କାର୍ଯ୍ୟାଳୟ ୫୦ ପ୍ରତିଶତ କର୍ମଚାରୀରେ ଚାଲିବ।