କେନ୍ଦ୍ର ରେଳମନ୍ତ୍ରୀ ଅଶ୍ୱିନୀ ବୈଷ୍ଣବଙ୍କ ବଡ଼ ଘୋଷଣା । ଜାନୁଆରୀ ୧୭ରୁ କୋଲକାତା ଏବଂ ଗୌହାଟି ମଧ୍ୟରେ ଚାଲିବ ପ୍ରଥମ ବନ୍ଦେ ଭାରତ ସ୍ଲିପର ଟ୍ରେନ୍ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ପଶ୍ଚିମବଙ୍ଗର ମାଲଦା ଟାଉନରେ ଏହାର ଉଦ୍ଘାଟନ କରିବେ । କାମାକ୍ଷା ଏବଂ ହାୱଡ଼ା ଜଙ୍କସନ ମଧ୍ୟରେ ସପ୍ତାହରେ ୬ ଦିନ ଏହି ଟ୍ରେନ୍ ଚାଲିବ । ରେଳମନ୍ତ୍ରୀଙ୍କ କହିବାନୁଯାୟୀ, ୬ଟି ନୂତନ ଅମୃତ ଭାରତ ଏକ୍ସପ୍ରେସ୍ ମଧ୍ୟ ଆରମ୍ଭ ହେବ । ଗୁରୁବାର ଦିଲ୍ଲୀରେ ଅନୁଷ୍ଠିତ ବିଶିଷ୍ଟ ରେଳ ସେବା ପୁରସ୍କାର ଉତ୍ସବରେ ଯୋଗଦେଇ ଅଶ୍ୱିନୀ ବୈଷ୍ଣବ କହିଛନ୍ତି ଯେ, ୨୦୨୬ରେ ଭାରତୀୟ ରେଳବାଇ ଏକ ବଡ଼ ପରିବର୍ତ୍ତନ ଆଣିବ । ଏଥିରେ ସମସ୍ତ ପ୍ରକାରର ସଂସ୍କାର ପାଇଁ AIର ବ୍ୟାପକ ବ୍ୟବହାର ଅନ୍ତର୍ଭୁକ୍ତ ।
ରେଳମନ୍ତ୍ରୀ କହିଛନ୍ତି, ରେଳବାଇରେ ପ୍ରଯୁକ୍ତିବିଦ୍ୟା ଏବଂ ନବସୃଜନକୁ ପ୍ରୋତ୍ସାହିତ କରିବା ପାଇଁ ଏକ ନୂତନ ସଂରଚନାତ୍ମକ ପଦ୍ଧତି ଗ୍ରହଣ କରାଯିବ । ଏହି ଉଦ୍ଦେଶ୍ୟରେ ଏକ ପ୍ରଯୁକ୍ତିବିଦ୍ୟା ନବସୃଜନ ପୋର୍ଟାଲ୍ ଆରମ୍ଭ କରାଯିବ । ରକ୍ଷଣାବେକ୍ଷଣ କାର୍ଯ୍ୟକଳାପ ପାଇଁ ଏଆଇକୁ ବ୍ୟାପକ ଭାବରେ ବ୍ୟବହାର କରାଯିବ । ଥାର୍ଡ ଏସି ବନ୍ଦେ ଭାରତ ସ୍ଲିପର୍ ଟ୍ରେନ୍ ପାଇଁ ଭଡ଼ା ୨, ୩୦୦ ସ୍ଥିର କରାଯାଇଛି । ସେକେଣ୍ଡ ଏସି ଭଡ଼ା ୩,୦୦୦ ରହିବ । ଫାଷ୍ଟ ଏସି ଭଡ଼ା ପ୍ରାୟ ୩,୬୦୦ ଧାର୍ଯ୍ୟ କରାଯିବାର ପ୍ରସ୍ତାବ ଅଛି । ଏହି ସ୍ଲିପର ଟ୍ରେନ୍ ୧,୦୦୦ କିଲୋମିଟରରୁ ଅଧିକ ଦୂରତା ଯାତ୍ରା ପାଇଁ ଡିଜାଇନ୍ କରାଯାଇଛି । ଚଳିତ ବର୍ଷ ଶେଷ ସୁଦ୍ଧା ପ୍ରାୟ ୧୨ଟି ବନ୍ଦେ ଭାରତ ସ୍ଲିପର ଟ୍ରେନ୍ ପ୍ରସ୍ତୁତ ହେବ । ଡିସେମ୍ବର ୩୦ ତାରିଖରେ ଏହି ଟ୍ରେନର ଏକ ପରୀକ୍ଷାମୂଳକ ପ୍ରଦର୍ଶନ କରାଯାଇଥିଲା । କୋଟା-ନାଗଦା ରେଳ ଟ୍ରାକରେ ଟ୍ରେନଟି ଘଣ୍ଟା ପ୍ରତି ୧୮୦ କିଲୋମିଟର ବେଗରେ ଗତି କରିଥିଲା । ଲୋକୋ ପାଇଲଟ୍ ଟ୍ରେନ୍ ଭିତରେ ଚାରି ଗ୍ଲାସ୍ ପାଣି ରଖିଥିଲେ ଏବଂ ଟ୍ରେନ୍ଟି ଦ୍ରୁତ ବେଗରେ ଚାଲିଥିଲେ ମଧ୍ୟ ଗ୍ଲାସରୁ ତଳେ ପାଣି ପଡ଼ିନଥିଲା ।
ବନ୍ଦେ ଭାରତ ସ୍ଲିପରରେ ଉନ୍ନତ ସୁରକ୍ଷା ବୈଶିଷ୍ଟ୍ୟ, ଉନ୍ନତ ସସପେନସନ୍ ସିଷ୍ଟମ ଏବଂ ବିଶ୍ୱସ୍ତରୀୟ ସ୍ଲିପର କୋଚ୍ ରହିଛି । ରେଳମନ୍ତ୍ରୀ କହିଛନ୍ତି ଯେ, ଗୌହାଟୀ-ହାଓଡ଼ା ରୁଟ୍ରେ ବିମାନ ଭଡ଼ା ସାଧାରଣତଃ ୬ ହଜାରରୁ ୮ ହଜାର ପର୍ଯ୍ୟନ୍ତ ହୋଇଥାଏ । କେତେକ ସମୟରେ ୧୦ ହଜାର ପର୍ଯ୍ୟନ୍ତ ପହଞ୍ଚିଥାଏ। ଏହି ସମୟରେ, ଗୌହାଟୀରୁ ହାଓଡ଼ା ପର୍ଯ୍ୟନ୍ତ ବନ୍ଦେ ଭାରତ ସ୍ଲିପରର ଥାର୍ଡ ଏସି ଭଡ଼ା ୨୩୦୦ ରଖାଯାଇଛି ।