ରାଜଧାନୀରେ ଗତ ୨୨ ବର୍ଷର ସର୍ବକାଳୀନ ନିମ୍ନ ତାପମାତ୍ରା ରେକର୍ଡ ହୋଇଛି । ତାପମାତ୍ରା ୯.୨ ଡିଗ୍ରୀକୁ ଖସିଛି । ହାଡ଼ଭଙ୍ଗା ଶୀତରେ ଥରିଛି ରାଜଧାନୀ । ଭୁବନେଶ୍ୱରକୁ ୟୋଲୋ ୱାର୍ଣ୍ଣିଂ ଜାରି କରାଯାଇଛି । ରାତିରେ ସାମାନ୍ୟ ଝିପିଝିପି ବର୍ଷା ହୋଇଛି । ପାଣିପାଗ ବିଭାଗ ତଥ୍ୟ ଅନୁସାରେ ରାଜଧାନୀ ଭୁବନେଶ୍ୱରରେ ୨୦୦୪ ମସିହା ଜାନୁଆରୀ ମାସରେ ୯.୨ ଡିଗ୍ରୀ ରେକର୍ଡ କରାଯାଇଥିଲା । ଏହା ପରେ ଗତକାଲି ୯.୨ ଡିଗ୍ରୀ ତଳକୁ ପାରଦ ଖସିଛି । ଜାନୁଆରୀ ମାସରେ ଏହା ତୃତୀୟ ସର୍ବନିମ୍ନ ତାପମାତ୍ରା ରେକର୍ଡ କରାଯାଇଛି ।
ଦୀର୍ଘବର୍ଷ ପରେ ଏଭଳି ଶୀତକୁ ଅନୁଭବ କରିଛନ୍ତି ଭୁବନେଶ୍ୱରବାସୀ । ରାତି ତାପମାତ୍ରା ତଳକୁ ଖସିବା ପରେ ପ୍ରବଳ ଥଣ୍ଡା ହୋଇଥିଲା । ସକାଳୁ ପାଣି ବରଫ ଭଳି ପାଲଟିଯାଇଥିଲା । ଥଣ୍ଡା ଏପରି ଅନୁଭୁତି ହୋଇଥିଲା, ସକାଳୁ ଅଘୋଷିତ କର୍ଫୁ ପରି ଲାଗୁଥିଲା । ସ୍ୱାଭାବିକ ଦିନରେ ପ୍ରାତଃ ଭ୍ରମଣ ପାଇଁ ପାର୍କଠୁ ଆରମ୍ଭ କରି ରାସ୍ତାରେ ଭିଡ଼ ଜମେ । ହେଲେ ଗତ ସପ୍ତାହେ ହେବ ପାର୍କରେ ଲୋକସଂଖ୍ୟା କମିଛି । ପ୍ରବଳ ଶୀତ ପାଇଁ ଲୋକେ ଘରୁ ବାହାରୁନାହାନ୍ତି । ଦିନ ବେଳା ବି ଥଣ୍ଡା କମୁନି । ଦିନ ବେଳା ବାହାର ତାପମାତ୍ରା ୨୭.୫ ଡିଗ୍ରୀ ରହୁଛି । ଘରେ ଏହି ତାପମାତ୍ରା ଆହୁରି ୨ରୁ ୩ ଡିଗ୍ରୀ କମ । କମ୍ବଳ ତଳେ ଦିନ କାଟୁଛନ୍ତି ।
ସର୍ବାଧିକ ଅସୁବିଧାର ସମ୍ମୁଖୀନ ହେଉଛନ୍ତି ବାହାରେ ଶୋଉଥିବା ଭିକ୍ଷୁକ ଶ୍ରେଣୀର ଲୋକେ । ରେଳଷ୍ଟେସନ, ରାଜମହଲ, ଲକ୍ଷ୍ମୀସାଗର ଓ ବାଣୀବିହାର ଅଞ୍ଚଳରେ ଲୋକେ ବାହାରେ ଶୋଉଛନ୍ତି । ବରିଷ୍ଠ ପାଣିପାଗ ବିଶେଷଜ୍ଞ ଶରତ ସାହୁ କହିଛନ୍ତି, ବର୍ତ୍ତମାନ ସହର ମେଘ ମୁକ୍ତ ରହିଛି । ବାୟୁ ମଣ୍ଡଳର ପ୍ରଦୂଷଣ ମାତ୍ରା କମିଛି । ହିମାଳୟ ପଟୁ ଥଣ୍ଡା ପବନ ଘଣ୍ଟା ପ୍ରତି ୩୦ କିମି ବେଗ ରହିଛି । ତେଣୁ ଶୀତ ଅନୁଭୂତ ହେଉଛି ।