ଭୀଷଣ ଥଣ୍ଡାରେ ଥରୁଛି ଉତ୍ତର ଭାରତ । ପାରଦ ଖସିବା ସହ ଘନ କୁହୁଡ଼ି କଲବଲ କରୁଛି । ପୂରା ଉତ୍ତର ଭାରତରେ ଜନଜୀବନ ପ୍ରଭାବିତ । ଦିଲ୍ଲୀରେ ଶୀତ ଲହରୀ ସାଙ୍ଗକୁ ବାୟୁ ପ୍ରଦୂଷଣ ଯନ୍ତ୍ରଣା ବଢ଼ାଇଛି । ଗତ କିଛି ଦିନ ହେଲା ଭୟଙ୍କର ବାୟୁ ପ୍ରଦୂଷଣ ସହ ଲଢ଼ୁଛି ଦେଶର ରାଜଧାନୀ । ଆଜି ମଧ୍ୟ କିଛି ସ୍ଥାନରେ ୪୦୦ ଉପରେ ରହିଛି ଏୟାର କ୍ବାଲିଟି ଇଣ୍ଡେକ୍ସ । ତେବେ କିଛି ସ୍ଥାନରେ ସିଭିୟର କାଟାଗୋରିରୁ ଭେରି ପୋର୍ କାଟାଗୋରିକୁ ଖସିଛି ପ୍ରଦୂଷଣ ହାର । ବାୟୁ ପ୍ରଦୂଷଣ ଏବଂ ଘନ କୁହୁଡ଼ି ଯୋଗୁଁ ଗତ କିଛି ଦିନ ହେବ ଦିଲ୍ଲୀରେ ଯାତାୟାତ ପ୍ରଭାବିତ ହେଉଛି । ବିମାନ ଏବଂ ଟ୍ରେନ ଚଳାଚଳ ମଧ୍ୟ ଗଭୀର ଭାବେ ପ୍ରଭାବିତ ହେଉଛି ।
ଏହାରି ମଧ୍ୟରେ ବିମାନ କମ୍ପାନୀ କହିଛି ଯାତ୍ରୀମାନେ ସେମାନଙ୍କର ଉଡ଼ାଣ ଯାଞ୍ଚ କରିବାକୁ ଦିଆଯାଇଥିବା ଲିଙ୍କର ବ୍ୟବହାର କରନ୍ତୁ । କୁହୁଡ଼ି ଯୋଗୁଁ ବିମାନ ଚଳାଚଳରେ ବିଳମ୍ବ ହେଉଛି । ଯଦି ପାଗ ଯୋଗୁଁ କୌଣସି ଯାତ୍ରୀଙ୍କ ଉଡ଼ାଣ ବିଳମ୍ବ ହୁଏ କିମ୍ବା ପ୍ରଭାବିତ ହୁଏ ତେବେ ଯାତ୍ରୀମାନେ ବିକଳ୍ପ ଉଡ଼ାଣ କିମ୍ବା ଫେରସ୍ତ ଦାବି କରିପାରିବେ । ଗତକାଲି ଅଧିକ ଥଣ୍ଡା ଏବଂ କୁହୁଡ଼ି ପାଇଁ ୧୨୯ ଟି ବିମାନ ବାତିଲ ହୋଇଥିଲା । ଦୂରଗାମୀ ଟ୍ରେନଗୁଡିକ ମଧ୍ୟ ୧୩ ଘଣ୍ଟା ପର୍ଯ୍ୟନ୍ତ ବିଳମ୍ବରେ ପହଞ୍ଚିଥିଲେ ।
ଅନ୍ୟପଟେ ଆଜି ମଧ୍ୟ ଦିଲ୍ଲୀରେ ପ୍ରବଳ ଥଣ୍ଡା ଅନୁଭୂତ ହୋଇପାରେ ବୋଲି ଅନୁମାନ କରାଯାଉଛି । ଘନ କୁହୁଡ଼ିକୁ ଦୃଷ୍ଟିରେ ରଖି ପାଣିପାଗ ବିଭାଗ ଦିଲ୍ଲୀରେ ଅରେଞ୍ଜ ଆଲର୍ଟ ଜାରି କରିଛି ।