ଜାପାନରେ ଶକ୍ତିଶାଳୀ ଭୂମିକମ୍ପ । ଜାପାନର ଉତ୍ତର ପ୍ରାନ୍ତରେ ଭୂମିକମ୍ପ ଝଟକା ଲାଗିଛି । ରିକ୍ଟର ସ୍କେଲରେ ଏହାର ତୀବ୍ରତା ୬.୭ ରେକର୍ଡ କରାଯାଇଛି । ଏହାର କେନ୍ଦ୍ରସ୍ଥଳ ସନ୍ରିକୋ ହୋଇଥିବା ବେଳେ ପ୍ରଶାନ୍ତ ମହାସାଗରର ୧୦ କି.ମି. ଗଭୀରତାରେ ରହିଛି । ଭୂକମ୍ପ ପରେ ପାଣିପାଗ ବିଭାଗ ପକ୍ଷରୁ ସୁନାମି ଆଶଙ୍କା ଦିଆଯାଇଛି । ଜାପାନ ଉପକୂଳ ସମୁଦ୍ରରେ ୧ ମିଟର ଉଚ୍ଚ ଜୁଆର ଉଠିବାର ସମ୍ଭାବନା ରହିଛି । ତେବେ ଭୂମିକମ୍ପ ପରେ କ୍ଷୟକ୍ଷତିର କୌଣସି ସୂଚନା ନାହିଁ …
ସୂଚନା ମୁତାବକ, ରବିବାର ଜାପାନରେ ଭୂମିକମ୍ପ ଝଟକା ଲାଗିଛି । ସ୍ଥାନୀୟ ସମୟ ପ୍ରାୟ ୫ଟା ୩ ମିନିଟରେ ଶକ୍ତିଶାଳୀ ଭୂମିକମ୍ପ ଅନୁଭୂତ ହୋଇଥିଲା । ଜାପାନ ପାଣିପାଗ ବିଭାଗ ଅନୁଯାୟୀ, ରିକ୍ଟର ସ୍କେଲରେ ଭୂମିକମ୍ପର ତୀବ୍ରତା ୬.୭ ରହିଛି । ଭୂକମ୍ପ ପରେ ଉପକୂଳବର୍ତ୍ତୀ ଅଞ୍ଚଳକୁ ସୁନାମି ଆଲର୍ଟ ଜାରି କରାଯାଇଛି । ସମୁଦ୍ରରେ ୧ ମିଟର ଅର୍ଥାତ୍ ୩ ଫୁଟ୍ ଉଚ୍ଚ ଜୁଆର ଉଠିବାର ଆଶଙ୍କା କରାଯାଇଛି । ଏନେଇ ସ୍ଥାନୀୟ ଲୋକଙ୍କୁ ପ୍ରଶାସନ ସତର୍କ କରାଇବା ସହ ସେଠାରୁ ଲୋକଙ୍କୁ ସ୍ଥାନାନ୍ତର କରାଯାଇଛି । ତେବେ ଖବର ଲେଖା ହେବା ଯାଏ, କୌଣସି କ୍ଷୟକ୍ଷତିର ସୂଚନା ମିଳିନାହିଁ ।