ମ୍ୟାଁମାର ସେନା ଗତ ରାତିରେ ରଖାଇନ ପ୍ରଦେଶ ଅନ୍ତର୍ଗତ ବିଦ୍ରୋହୀ ଆରାକାନ ସେନା କବଜରେ ଥିବା ମାରୁକ-ୟୁ ସହରରେ ଏୟାର ଷ୍ଟ୍ରାଇକ୍ କରିଛି । ସହରର ଏକ ହସ୍ପିଟାଲ ଉପରେ ଯୁଦ୍ଧବିମାନରୁ ଦୁଇଟି ବୋମା ମାଡ଼ କରାଯାଇଛି । ଫଳରେ ୩୪ ଜଣ ରୋଗୀ ଓ ସ୍ୱାସ୍ଥ୍ୟକର୍ମୀଙ୍କ ମୃତ୍ୟୁ ଘଟିଛି । ଏହି ବୋମା ମାଡ଼ରେ ଅନ୍ୟ ୮୦ ଜଣ ଆହତ ହୋଇଛନ୍ତି । ବୋମା ମାଡ଼ ଯୋଗୁ ହସ୍ପିଟାଲ ଛାରଖାର ହୋଇଯାଇଛି । ସେନାର ଏଭଳି କାର୍ଯ୍ୟକୁ ବିଭିନ୍ନ ଦେଶ ପକ୍ଷରୁ ନିନ୍ଦା କରାଯାଇଛି ।
ସୂଚନା ଅନୁସାରେ ବୁଧବାର ରାତି ପ୍ରାୟ ୯ଟା ୧୩ରେ ମ୍ୟାଁମାର ସେନା ଯୁଦ୍ଧବିମାନରେ ଆସି ହସ୍ପିଟାଲ ଉପରେ ଦୁଇଟି ବୋମା ପକାଇଥିଲେ । ପ୍ରଥମ ବୋମାଟି ଚିକିତ୍ସିତ ହେଉଥିବା ରୋଗୀଙ୍କ ୱାର୍ଡରେ ପଡିଥିଲା ବେଳେ ଦ୍ୱିତୀୟଟି ହସ୍ପିଟାଲର ମୁଖ୍ୟ ବିଲ୍ଡିଂ ନିକଟରେ ପଡିଥିଲା । ଯାହାଫଳରେ ବ୍ୟାପକ କ୍ଷୟକ୍ଷତି ଘଟିଛି । ମୃତକଙ୍କ ମଧ୍ୟରେ ୧୭ ଜଣ ପୁରୁଷ ଓ ୧୭ ଜଣ ମହିଳା ଅଛନ୍ତି । ହସ୍ପିଟାଲ ନିକଟରେ ଥିବା ଟ୍ୟାକ୍ସି ଓ ବାଇକ୍ଗୁଡିକ ନଷ୍ଟ ହୋଇଯାଇଛି । ହସ୍ପିଟାଲର ଆସବାବପତ୍ର ଓ ଚିକିତ୍ସା ଉପକରଣଗୁଡିକ ବିଲ୍ଡିଂର ଭଗ୍ନାବଶେଷ ଭିତରେ ପୋତି ହୋଇପଡିଛି । ଦେଶରେ ସରକାରୀ ସେନା ଓ ବିଦ୍ରୋହୀଙ୍କ ମଧ୍ୟରେ ସଂଘର୍ଷ ଯୋଗୁ ଏହି ପ୍ରଦେଶର ଅଧିକାଂଶ ହସ୍ପିଟାଲ ବନ୍ଦ ହୋଇଯାଇଛି । ବୋମାମାଡ଼ ହୋଇଥିବା ହସ୍ପିଟାଲଟି ମୁଖ୍ୟ ଚିକିତ୍ସାଳୟ ହୋଇଥିବାରୁ ଏଠାକୁ ପ୍ରତିଦିନ ଶହ ଶହ ରୋଗୀ ଆସିଥାନ୍ତି ।
ଗତବର୍ଷ ଫେବ୍ରୁଆରୀରେ ଆରାକାନ ଆର୍ମି ଏହି ସହର ଦଖଲ କରିବା ପରେ ଉକ୍ତ ହସ୍ପିଟାଲକୁ ଖୋଲାଯାଇଥିଲା । ରାଜଧାନୀ ଠାରୁ ପ୍ରାୟ ୫୩୦ କି.ମି. ଦୂରରେ ଏହି ସହର ଅବସ୍ଥିତ । ୨୦୧୭ରୁ ଆରାକାନ ଆର୍ମି ନିଜର ଉପସ୍ଥିତି ଜାହିର କରିଆସିଛି । ରଖାଇନ ପ୍ରଦେଶର ୧୭ଟି ସହର ମଧ୍ୟରୁ ୧୪ଟିକୁ ଆରାକାନ ଆର୍ମି କବଜା କରିଛି ।