ଯାଜପୁର ଜିଲ୍ଲା ଅଳକୁଣ୍ଡ ଥାନାରେ ଥାନାଧିକାରୀ ଓ ଏଏସ୍ଆଇଙ୍କ ମଧ୍ୟରେ ହାତାହାତି ଘଟଣାର ଭିଡିଓ ଭାଇରାଲ ପରେ ଦୁଇ ଅଧିକାରୀଙ୍କୁ ଜିଲ୍ଲା ପୁଲିସ ମୁଖ୍ୟାଳୟକୁ ବଦଳି କରାଯାଇଛି । ଏସ୍ପି ୟଶପ୍ରତାପ ଶ୍ରୀମାଲ ପତ୍ର ସଂଖ୍ୟା ୨୫୯୭/୪.୧୨.୨୫ରେ ଥାନାଧିକାରୀ ଇନ୍ସପେକ୍ଟର ଦେବାଶିଷଳ ଶତପଥୀ ଓ ଏଏସ୍ଆଇ ପ୍ରକାଶ କୁମାର ସିଂଙ୍କୁ ତୁରନ୍ତ ମୁଖ୍ୟାଳୟରେ ଯୋଗ ଦେବାକୁ ନିର୍ଦ୍ଦେଶ ଦେଇଛନ୍ତି । ବିଞ୍ଝାରପୁର ଥାନାଧିକାରୀ ରଂଜନ କୁମାର ମଲ୍ଲିକଙ୍କୁ ଅଳକୁଣ୍ଡ ଥାନା ଅଧିକାରୀଭାବେ ଅତିରିକ୍ତ ଦାୟିତ୍ୱ ପ୍ରଦାନ କରାଯାଇଛି । ଏହି ଘଟଣାରେ ଏସ୍ଡିପିଓ ପ୍ରଶାନ୍ତ କୁମାର ମାଝି ତଦନ୍ତ କରୁଥିଲା ବେଳେ ଏହାର ସବିଶେଷ ତଥ୍ୟ ଗୁରୁବାର ସନ୍ଧ୍ୟାରେ ପ୍ରଦାନ କରିବା ପରେ ଦୁଇ ଅଧିକାରୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଏସ୍ପି ଶ୍ରୀମାଲ ସୂଚନା ଦେଇଛନ୍ତି ।
ବଡ଼ଚଣା ଥାନା ନଛିପୁର ଅଞ୍ଚଳର ଜଣେ ପୁରୁଷ ଓ ଅଳକୁଣ୍ଡ ଥାନା ଅଞ୍ଚଳର ଜଣେ ମହିଳାଙ୍କ ମଧ୍ୟରେ ବିବାଦ ହୋଇଥିଲା । ମହିଳାଙ୍କ ଅଭିଯୋଗ କ୍ରମେ ଅଳକୁଣ୍ଡ ଥାନାରେ କେସ ନଂ ୧୩୩/୨୫ ଓ ଭାରତୀୟ ନ୍ୟାୟ ସଂହିତାର ଧାରା ୪୯୮ରେ ଏକ ମାମଲା ରୁଜୁ ହୋଇଥିଲା । ଏହି ମାମଲାର ତଦନ୍ତଭାର ଏଏସ୍ଆଇ ଶ୍ରୀ ସିଂ ଏହି କେସର ଚାର୍ଜସିଟ୍ କରିଥିଲେ । ମଙ୍ଗଳବାର ଉକ୍ତ ମହିଳା ଓ ତାଙ୍କ ମା’ ଆଇଆଇସିଙ୍କୁ ଭେଟିଥିଲେ ।
ଏହା ପରେ ଆଇଆଇସି ଶ୍ରୀ ଶତପଥୀ ଶ୍ରୀ ସିଂଙ୍କୁ ଡାକି ମାମଲାର ଚାର୍ଜସିଟ୍ ସଂପର୍କରେ ଆଲୋଚନା ବେଳେ ଉଭୟଙ୍କ ମଧ୍ୟରେ କୌଣସି କାରଣକୁ ନେଇ ଯୁକ୍ତିତର୍କ ହୋଇଥିଲା । ଏଥିରେ ଉତ୍ତ୍ୟକ୍ତ ହୋଇ ଥାନାଧିକାରୀ ଶ୍ରୀ ଶତପଥୀ ଏଏସ୍ଆଇ ଶ୍ରୀ ସିଂଙ୍କୁ ମାଡ଼ ମାରିଥିଲେ । ଏହି ଘଟଣା ସିସିଟିଭିରେ କଏଦ୍ ହୋଇଥିଲା । ଘଟଣାକୁ ନେଇ ଏଏସ୍ଆଇ ଶ୍ରୀ ସିଂ ଏସ୍ଡିପିଓଙ୍କ ନିକଟରେ ଅଭିଯୋଗ କରିବା ପରେ ଏସ୍ଡିପିଓ ଶ୍ରୀ ମାଝୀ ଥାନାରେ ପହଞ୍ଚି ସିସିଟିଭି ଯାଞ୍ଚ କରିବା ସହ ଦୁଇ ଅଧିକାରୀଙ୍କୁ ପଚରାଉଚୁରା କରିଥିଲେ । ଦୁଇ ଅଧିକାରୀଙ୍କୁ ଜିଲ୍ଲା ମୁଖ୍ୟାଳୟକୁ ବଦଳି କରାଯାଇଛି ।