ଭଦ୍ରକ ଜିଲ୍ଲାରେ ଶାସକ ଦଳ ବିଜୁ ଜନତା ଦଳ (ବିଜେଡି) ପାଇଁ ଏକ ବଡ଼ ରାଜନୈତିକ କମ୍ପନ ସୃଷ୍ଟି ହୋଇଛି। ଗୋଟିଏ ଦିନରେ ବିଜେଡି ସମର୍ଥିତ ତିନି ଜଣ ବ୍ଲକ୍ ଅଧ୍ୟକ୍ଷ ଦଳରୁ ଇସ୍ତଫା ଦେବା ଘଟଣା ଜିଲ୍ଲାର ରାଜନୀତିକୁ ସରଗରମ କରିଛି ଏବଂ ଦଳ ପାଇଁ ଏହା ଏକ ଶକ୍ତ ଝଟକା ବୋଲି ବିବେଚନା କରାଯାଉଛି। ଫଳରେ, ଏହି ଜିଲ୍ଲାରେ ବିଜେଡିର ଗଡ଼ ଭାଙ୍ଗିବା ନେଇ ରାଜନୈତିକ ମହଲରେ ଚର୍ଚ୍ଚା ଜୋର ଧରିଛି।
ପ୍ରଥମେ ଶନିବାର ଦିନ ବନ୍ତ ବ୍ଲକ୍ ଅଧ୍ୟକ୍ଷ ମନୋରଞ୍ଜନ ଘଡ଼େଇ ଦଳର ପ୍ରାଥମିକ ସଦସ୍ୟ ପଦରୁ ନିଜର ଇସ୍ତଫାପତ୍ର ଭଦ୍ରକ ଜିଲ୍ଲା ସଭାପତି ଜଗନ୍ନାଥ ସ୍ୱାଇଁଙ୍କ ନିକଟକୁ ପଠାଇଥିଲେ। ସେ ବ୍ୟକ୍ତିଗତ କାରଣ ଦର୍ଶାଇ ଇସ୍ତଫା ଦେଇଥିବା କହିଛନ୍ତି। ଅନ୍ୟପଟେ, ଦଳ ବିରୋଧୀ କାର୍ଯ୍ୟ ପାଇଁ ବିଜେଡି ରାଜ୍ୟ ସଭାପତି ନବୀନ ପଟ୍ଟନାୟକଙ୍କ ନିର୍ଦ୍ଦେଶକ୍ରମେ ମନୋରଞ୍ଜନ ଘଡ଼େଇଙ୍କୁ ଦଳରୁ ନିଲମ୍ବନ କରାଯାଇଥିବା ଦଳର ରାଜ୍ୟ ଉପସଭାପତି ପ୍ରତାପ ଜେନା ଏକ ପ୍ରେସ୍ ବିବୃତିରେ ସୂଚନା ଦେଇଛନ୍ତି। ତେବେ ଇସ୍ତଫା ନା ନିଲମ୍ବନ-କିଏ ଆଗ ତାହାକୁ ନେଇ ଦିନତମାମ ଚର୍ଚ୍ଚା ଜାରି ରହିଥିଲା।
ଏହି ଚର୍ଚ୍ଚା ଥମି ନ ଥିବା ବେଳେ ସନ୍ଧ୍ୟା ସୁଦ୍ଧା ଆଉ ଦୁଇଜଣ ବ୍ଲକ୍ ଅଧ୍ୟକ୍ଷା ଦଳରୁ ଇସ୍ତଫା ଦେଇ ବିଜେଡି ଶିବିରକୁ ଦୋହଲାଇ ଦେଇଛନ୍ତି। ଭଣ୍ଡାରିପୋଖରୀ ବ୍ଲକ୍ ଅଧ୍ୟକ୍ଷା ସୁମତୀ ସେଠୀ ଏବଂ ଭଦ୍ରକ ବ୍ଲକ୍ ଅଧ୍ୟକ୍ଷା ଊର୍ମିଳା ନାୟକ ଏକାବେଳକେ ବିଜେଡିରୁ ଇସ୍ତଫା ଦେଇ ନିଜ ନିଜର ଇସ୍ତଫାପତ୍ର ଦଳର ଜିଲ୍ଲା ସଭାପତିଙ୍କ ନିକଟକୁ ପଠାଇଛନ୍ତି।
କିଛି ଦିନ ହେଲା ଭଦ୍ରକ ଜିଲ୍ଲାର ବନ୍ତ, ଭଣ୍ଡାରିପୋଖରୀ, ବାସୁଦେବପୁର, ଏବଂ ଭଦ୍ରକ ବ୍ଲକର ଅଧ୍ୟକ୍ଷମାନେ ବିଜେଡି ଛାଡି ବିଜେପିରେ ମିଶିବା ନେଇ ଚର୍ଚ୍ଚା ହୋଇଆସୁଥିଲା। ଆଜିର ଏହି ତିନିଜଣଙ୍କ ଇସ୍ତଫା ପରେ ଏହି ଚର୍ଚ୍ଚା ଏକପ୍ରକାର ସତ ହୋଇଛି। ସମ୍ଭବତଃ ଆସନ୍ତା ଡିସେମ୍ବର ୭ ତାରିଖରେ ଏହି ସମସ୍ତ ନେତା ବିଜେପିରେ ମିଶିବା ପାଇଁ ଯୋଜନା ପ୍ରସ୍ତୁତ ହୋଇଥିବା କୁହାଯାଉଛି। ଏହି ଘଟଣା ଭଣ୍ଡାରିପୋଖରୀ ବିଧାୟକ ସଞ୍ଜୀବ ମଲ୍ଲିକ ଓ ପୂର୍ବତନ ମନ୍ତ୍ରୀ ପ୍ରଫୁଲ୍ଲ ସାମଲଙ୍କ ରାଜନୈତିକ ପତିଆରାକୁ ମଧ୍ୟ କାଠଗଡ଼ାକୁ ଠେଲି ଦେଇଛି। ଆଗାମୀ ଦିନରେ ଏହି ସଂଖ୍ୟା ବଢିବା ନେଇ ଅନୁମାନ କରାଯାଉଛି, ଯାହା ବିଜେଡି ପାଇଁ ବଡ଼ ଚ୍ୟାଲେଞ୍ଜ ସୃଷ୍ଟି କରିଛି।
