ରୁଷ୍ର ୟାକୁତିଆରେ ଥଣ୍ଡା ରେକର୍ଡ ଭାଙ୍ଗିଛି । ଏଠାରେ ତାପମାତ୍ରା ବିଯୁକ୍ତ ୫୬ ଡିଗ୍ରୀ ସେଲ୍ସିୟସ୍କୁ ଖସିଛି, ଯାହା ବର୍ତ୍ତମାନ ପୃଥିବୀର ସବୁଠୁ କମ୍ ତାପମାତ୍ରା । ଏଭଳି ଥଣ୍ଡାରେ ଖୋଲା ସ୍ଥାନରେ ମାତ୍ର କିଛି ମିନିଟ୍ରେ ଶରୀର ଜଡ଼ ହେବାର ଆଶଙ୍କା ରହିଛି । ୟାକୁତିଆର ଟିକସୀ ଗାଁରେ ଗତ ୩ ଦିନ ହେଲା ଭୀଷଣ ବରଫ ଝଡ଼ ହେଉଛି । ଚତୁର୍ଦ୍ଦିଗ ବରଫ ହିଁ ବରଫ । ଦ୍ରୁତ ପବନ ସାଙ୍ଗକୁ ବରଫ ମାଡ଼ ଲୋକଙ୍କୁ ଘରୁ ବାହାରିବାକୁ ଦେଉନାହିଁ । ସ୍ଥିତିକୁ ଦୃଷ୍ଟିରେ ରଖି ପ୍ରଶାସନ ସମସ୍ତ ସ୍କୁଲ ବନ୍ଦ କରିଦେଇଛି ।
ଲଗାତାର ବରଫପାତ ଯୋଗୁ ଅନେକ ଲୋକଙ୍କ ଘରର ମୁଖ୍ୟ ଦ୍ୱାର ବରଫରେ ଜମିଯାଇଛି । କିଛି ସ୍ଥାନରେ ବରଫ ଏତେ ମାତ୍ରାରେ ଜମା ହୋଇଛି ଯେ ଲୋକେ ଘରୁ ବାହାରି ପାରୁନାହାନ୍ତି । ଆବଶ୍ୟକ ଜିନିଷ ଆଣିବା ମଧ୍ୟ ଲୋକଙ୍କ ପାଇଁ ସମ୍ଭବ ହେଉନାହିଁ । ପାଣିପାଗ ବିଭାଗ ଚେତାବନୀ ଦେଇଛି, ଆଗାମି ଦିନରେ ଥଣ୍ଡା ଆହୁରି ବଢ଼ିପାରେ । ତାପମାତ୍ରା ବିଯୁକ୍ତ ୬୦ ଡିଗ୍ରୀ ସେଲ୍ସିୟସ୍ରେ ପହଞ୍ଚିପାରେ । ପ୍ରଶାସନ ସ୍ଥିତି ଉପରେ ନଜର ରଖିଛି ଏବଂ ଆବଶ୍ୟକ ହେଲେ ସାହାଯ୍ୟ ପହଞ୍ଚାଇବା ଲାଗି ପ୍ରସ୍ତୁତି ଚଳାଇଛି । ଗୁଜବ ଉପରେ ଧ୍ୟାନ ନ ଦେଇ ପ୍ରଶାସନର ନିର୍ଦ୍ଦେଶ ପାଳନ କରିବାକୁ ସରକାର ଅପିଲ କରିଛନ୍ତି ।