ଆଜିଠାରୁ ଶ୍ରୀଜଗନ୍ନାଥ ମହାପ୍ରଭୁଙ୍କର କାର୍ତ୍ତିକ ନୀତି ଆରମ୍ଭ ହୋଇଛି । ପୂର୍ଣ୍ଣ ଏକ ମାସ ଧରି ମହାପ୍ରଭୁଙ୍କର ସ୍ବତନ୍ତ୍ର ବାଳଧୂପ ଏବଂ ରାଧା-ଦାମୋଦର ବେଶ ଅନୁଷ୍ଠିତ ହେବ । କାର୍ତ୍ତିକ ମାସରେ ବିଷ୍ଣୁଙ୍କର ଦାମୋଦର ରୂପରେ ଶ୍ରୀଜୀଉଙ୍କୁ ବେଶ କରାଯାଇଥାଏ ।
ସକାଳ ଧୂପ ପରେ ବାଳଧୂପ ନୀତିରେ ବିଶେଷ ଭୋଗ ଲାଗିଥାଏ । ଏଥିରେ କୋରା, ଦୋଭଜା, ଲିଆ, ଅଦା, ଖଇ, ନଡିଆ, ଖୁଦ, ଚାଉଳିଆ, ସେଓ, କମଳା, କଦଳୀ, କାକୁଡ଼ି, ପଇଡ଼ ଆଦି ବିଭିନ୍ନ ପଦାର୍ଥ ସମାବେଶ ହୋଇଥାଏ ।
ଏହି ମାସରେ ରାଧା-ଦାମୋଦର ବେଶ ଅତ୍ୟନ୍ତ ସୁନ୍ଦର ଓ ଆକର୍ଷଣୀୟ ରୂପରେ ପ୍ରକାଶ ପାଏ । ମହାପ୍ରଭୁଙ୍କୁ ଫୁଲର ଗୁଣା, ଚିତା, ଅଧରମାଳା ସହ ବିଭିନ୍ନ ପ୍ରକାର ସୁବର୍ଣ୍ଣ ଅଳଙ୍କାରରେ ଭୂଷଣ କରାଯାଏ । ଶ୍ରୀଜଗନ୍ନାଥ ଓ ବଳଭଦ୍ରଙ୍କୁ ତ୍ରିକଚ୍ଛ, ସୁବର୍ଣ୍ଣ ନଳୀ ଭୁଜ, ବାଉଁଶ ପାତିଆ, ଚୂଳରେ ରୂପା ଚନ୍ଦ୍ରିକା, କର୍ଣ୍ଣରେ କୁଣ୍ଡଳ, କଟିଦେଶରେ କମରପଟି, କଣ୍ଠରେ ସୁବର୍ଣ୍ଣ ଘାଗଡ଼ା ମାଳି, କପାଳରେ ତିଳକ ଓ ଚିତା ସହ ଅଳଙ୍କୃତ କରାଯାଇଥାଏ ।
ଭକ୍ତଙ୍କ ସୁନିୟୋଜିତ ଦର୍ଶନ ଓ ନୀତିକାନ୍ତି ସୁଚାରୁରୂପେ ଚାଲିଥିବା ପାଇଁ ପୁରୀ ଶ୍ରୀମନ୍ଦିର ପ୍ରଶାସନ ପକ୍ଷରୁ ବ୍ୟାପକ ବ୍ୟବସ୍ଥା କରାଯାଇଛି ।