ବାଲେଶ୍ୱର ସହରର ଏକ ହୋଟେଲରେ ଯୁବକଙ୍କ ମୃତ୍ୟୁ ଘଟଣା ଏବେ ନୂଆ ମୋଡ଼ ନେଇଛି। ସହଦେବଖୁଣ୍ଟା ସ୍ଥିତ ‘ହୋଟେଲ ସୁରଜ’ରୁ ଆକାଶ ମହାନ୍ତ ନାମକ ଜଣେ ଯୁବକଙ୍କ ମୃତଦେହ ଉଦ୍ଧାର ହେବା ପରେ, ଘଟଣାସ୍ଥଳରୁ ଜଣେ ମହିଳା ନିଖୋଜ ଥିବା ଜଣାପଡ଼ିଛି। ସେହି ରହସ୍ୟମୟୀ ମହିଳା ଜଣକ କିଏ ଏବଂ ଆକାଶଙ୍କ ମୃତ୍ୟୁ ସହ ତାଙ୍କର କି ସମ୍ପର୍କ ରହିଛି, ସେ ନେଇ ପୋଲିସ ତନାଘନା ତଦନ୍ତ ଜାରି ରଖିଛି।
ସୂଚନା ଅନୁଯାୟୀ, ମୟୂରଭଞ୍ଜ ବେତନଟୀ ଅଞ୍ଚଳର ଆକାଶ ମହାନ୍ତ ନିଜ ସାଙ୍ଗ ରାମଚନ୍ଦ୍ର ସିଂଙ୍କ ସହ ହୋମଗାର୍ଡ ପରୀକ୍ଷା ପାଇଁ ଆଡମିଟ୍ କାର୍ଡ ନେବାକୁ ବାଲେଶ୍ୱର ଆସିଥିଲେ। ସେମାନେ ସହଦେବଖୁଣ୍ଟା ଅଞ୍ଚଳରେ ଥିବା ହୋଟେଲ ସୁରଜରେ ରୁମ୍ ଭଡ଼ା ନେଇ ରହିଥିଲେ। ତେବେ ପରଦିନ ସକାଳେ ହୋଟେଲ ରୁମ୍ ଭିତରୁ ଆକାଶଙ୍କ ମୃତଦେହ ମିଳିବା ପରେ ସ୍ଥାନୀୟ ଅଞ୍ଚଳରେ ଚାଞ୍ଚଲ୍ୟ ଖେଳିଯାଇଥିଲା।
ତଦନ୍ତ ସମୟରେ ପୋଲିସ ଜାଣିବାକୁ ପାଇଛି ଯେ, ସେହିଦିନ ରାତିରେ ଦୁଇ ଯୁବକଙ୍କ ସହ ଜଣେ ମହିଳା ମଧ୍ୟ ହୋଟେଲରେ ରାତ୍ରୀ ଯାପନ କରିଥିଲେ। ସେ ମଧ୍ୟ ବେତନଟୀ ଅଞ୍ଚଳର ବୋଲି ସନ୍ଦେହ କରାଯାଉଛି। କିନ୍ତୁ ଆକାଶଙ୍କ ମୃତ୍ୟୁ ପରେ ସେହି ମହିଳା ଜଣକ ସେଠାରୁ ଫେରାର ହୋଇଯାଇଛନ୍ତି। ସେହି ମହିଳାଙ୍କ ସହ ଆକାଶ ଓ ରାମଚନ୍ଦ୍ରଙ୍କର କି ସମ୍ପର୍କ ଥିଲା ଏବଂ କେଉଁ ପରିସ୍ଥିତିରେ ସେମାନେ ଏକାଠି ରହିଥିଲେ, ତାହା ଏବେ ବଡ଼ ପ୍ରଶ୍ନବାଚୀ ସୃଷ୍ଟି କରିଛି।
ଘଟଣାର ଗୁରୁତ୍ୱକୁ ଦୃଷ୍ଟିରେ ରଖି ବାଲେଶ୍ୱର ପୋଲିସ ମୃତ ଆକାଶଙ୍କ ବନ୍ଧୁ ରାମଚନ୍ଦ୍ର ସିଂଙ୍କୁ ଅଟକ ରଖି ପଚରାଉଚୁରା କରୁଛି। ହୋଟେଲର ସିସିଟିଭି ଫୁଟେଜ୍ ଏବଂ ରେଜିଷ୍ଟର ଯାଞ୍ଚ କରି ପୋଲିସ ଫେରାର ମହିଳାଙ୍କ ଟେର ପାଇବାକୁ ଚେଷ୍ଟା କରୁଛି। ଆକାଶଙ୍କୁ ହତ୍ୟା କରାଯାଇଛି ନା ଏହା ଆତ୍ମହତ୍ୟା, ତାହା ଶବ ବ୍ୟବଚ୍ଛେଦ ରିପୋର୍ଟ ଆସିବା ପରେ ସ୍ପଷ୍ଟ ହେବ ବୋଲି ପୋଲିସ କହିଛି।