କେନ୍ଦ୍ରାପଡ଼ା ଜିଲ୍ଲା ପଟ୍ଟାମୁଣ୍ଡାଇ ଥାନା ଅନ୍ତର୍ଗତ ଦାମରପୁର ଗ୍ରାମରେ ଏକ ଚାଞ୍ଚଲ୍ୟକର ଘଟଣା ଘଟିଛି। କେବଳ ପୁଅ ଜନ୍ମ ନହେବା କାରଣରୁ ଜଣେ ନବଜାତ ଶିଶୁ କନ୍ୟା ଓ ତାଙ୍କ ମା’ଙ୍କୁ ଜୀଅନ୍ତା ଜାଳି ମାରିଦେବାକୁ ଉଦ୍ୟମ କରିଛନ୍ତି ନିଜ ଶ୍ୱଶୁର। ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି।
ଅଭିଯୋଗ ଅନୁଯାୟୀ, ଗୁରୁବାର ବିଳମ୍ବିତ ରାତିରେ ସସ୍ମିତା ଦାସ ନିଜ ନବଜାତ କନ୍ୟା ସନ୍ତାନ ସହ ଶୋଇଥିବା ଅବସ୍ଥାରେ ତାଙ୍କ ଶ୍ୱଶୁର ଅତର୍କିତ ଭାବେ ଶେଯ ଉପରେ ପେଟ୍ରୋଲ ଢାଳି ନିଆଁ ଲଗାଇ ଦେଇଥିଲେ। ମୃତ୍ୟୁ ମୁଖରୁ ବଞ୍ଚିବା ପାଇଁ ସସ୍ମିତା ନିଜ ଶିଶୁ କନ୍ୟାକୁ ଧରି ଘରୁ ବାହାରକୁ ଦୌଡ଼ି ପଳାଇଥିଲେ। ନିଆଁର ଭୟାବହତାରେ ଘରର ସମସ୍ତ ଆସବାବପତ୍ର ପୋଡ଼ି ପାଉଁଶ ହୋଇଯାଇଥିବା ବେଳେ, ସସ୍ମିତା ନିଜ ଶିଶୁକୁ ଧରି ସାରା ରାତି ବାହାରେ ଅତିବାହିତ କରି ସୌଭାଗ୍ୟବଶତଃ ଜୀବନ ବଞ୍ଚାଇଛନ୍ତି।
ସୂଚନାଯୋଗ୍ୟ ଯେ, ୮ ବର୍ଷ ପୂର୍ବେ ଦାମରପୁର ଗ୍ରାମର ସୁଶାନ୍ତ ରାୟଙ୍କୁ ବିବାହ କରିଥିଲେ ସସ୍ମିତା। ସୁଶାନ୍ତଙ୍କ ପୂର୍ବ ବିବାହରୁ ଦୁଇଟି ଝିଅ ଥିବା ବେଳେ ସସ୍ମିତାଙ୍କର ମଧ୍ୟ ଏକ କନ୍ୟା ସନ୍ତାନ ଜନ୍ମ ହୋଇଥିଲା। ପୁଅ ଜନ୍ମ ନହେବାରୁ ସ୍ୱାମୀ, ଶ୍ୱଶୁର ଓ ଶାଶୂ ସସ୍ମିତାଙ୍କୁ ଦୀର୍ଘ ଦିନ ଧରି ଶାରୀରିକ ଓ ମାନସିକ ନିର୍ଯାତନା ଦେଇ ଆସୁଥିଲେ। ଏହି ଘୃଣ୍ୟ ମାନସିକତା ଶେଷରେ ଜୀବନ ନେବା ଭଳି ଏକ ଚରମ ସୀମାରେ ପହଞ୍ଚିଛି।
ଏହି ଅମାନୁଷିକ ଘଟଣା ପରେ ପଟ୍ଟାମୁଣ୍ଡାଇ ଗ୍ରାମାଞ୍ଚଳ ଥାନା ପୋଲିସ ତଦନ୍ତ ଆରମ୍ଭ କରିଛି। ପୋଲିସ ଘଟଣାସ୍ଥଳରୁ ପ୍ରମାଣ ସଂଗ୍ରହ କରିବା ସହ ଅଭିଯୁକ୍ତ ଶ୍ୱଶୁର ଓ ଅନ୍ୟମାନଙ୍କ ବିରୋଧରେ କଡ଼ା ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ପ୍ରତିଶ୍ରୁତି ଦେଇଛି।