ବ୍ରହ୍ମପୁର : ବହୁ ଚର୍ଚ୍ଚିତ ଆଇନଜୀବୀ ପୀତବାସ ପଣ୍ଡା ହତ୍ୟା ମାମଲାରେ ପୋଲିସ ମୋଟ ୧୬ ଜଣଙ୍କୁ ୪ ପର୍ଯ୍ୟାୟରେ ଗିରଫ କରିଥିଲା । ଗିରଫ ଅଭିଯୁକ୍ତମାନଙ୍କ ଠାରୁ ପୁଲିସ ଦୁଇଟି ବନ୍ଧୁକ ମଧ୍ୟ ଜବତ କରିଥିଲା । ମଙ୍ଗଳବାର ଜବତ ବନ୍ଧୁକର ତଥ୍ୟକୁ ପୋଲିସ ଏସଡ଼ିଜେଏମ କୋର୍ଟରେ ଦାଖଲ କରିଛି । ଏହାସହ ଏହାର ବାଲିଷ୍ଟିକ ଟେଷ୍ଟ ପାଇଁ ଜବତ ଦୁଇ ବନ୍ଧୁକକୁ ଭୁବନେଶ୍ୱରରେ ଥିବା ଷ୍ଟେଟ ଫରେନସିକ ଲାବକୁ ପଠାଇଥିବା ଜଣାପଡିଛି । ଜବତ ବନ୍ଧୁକ ଓ ଗୁଳିକୁ ପୋଷ୍ଟମୋର୍ଟମ ପରେ ବାଲେଷ୍ଟିକ ଏକ୍ସପର୍ଟ ପାଖକୁ ପଠାଯାଇଛି । ରିପୋର୍ଟ ଆସିବା ପରେ ଗୁଳିର ଗତିକୁ ନେଇ କିଛି ତଥ୍ୟ ମିଳିପାରେ ବୋଲି କୁହାଯାଉଛି ।
ତେବେ ଜବତ ହୋଇଥିବା ଦୁଇ ବନ୍ଧୁକ ୯-ଏମ ଏମ ବୋଲି ଜଣାପଡ଼ିଛି । ପୀତବାସ ହତ୍ୟା ମାମଲାରେ ମୋଟ ୧୬ଜଣ ଗିରଫ ହୋଇଛନ୍ତି । ସେମାନଙ୍କ ମଧ୍ୟରୁ ପୂର୍ବତନ ବିଧାୟକ ବିକ୍ରମ କୁମାର ପଣ୍ଡା, ପୂର୍ବତନ ମେୟର୍ ଶିବଶଙ୍କର ଦାଶ ଓରଫ ପିଣ୍ଟୁ ,କର୍ପୋରେଟର ମଳୟ ବିଷୋୟୀ, ଆଇନଜୀବୀ ମଦନ ଦଳାଇ ଓ ସୁନିଲ ହୋତାଙ୍କ ପାଇଁ ଆଇନଜୀବୀମାନେ କୋର୍ଟରେ ୱାକାଲତନାମା ଦାଖଲ କରିଛନ୍ତି । ପୀତବାସ ହତ୍ୟା ମାମଲାରେ ଗିରଫ ଅଭିଯୁକ୍ତ ବିକ୍ରମ କୁମାର ପଣ୍ଡା,ମଳୟ ବିଷୋୟୀ ଘରର ରନ୍ଧା ଖାଦ୍ୟ ପାଇଁ ନିଜ ଓକିଲଙ୍କ ଦ୍ଵାରା କିଛିଦିନ ପୂର୍ବେ ସ୍ଥାନୀୟ ଏସଡ଼ିଜେଏମଙ୍କ ଅଦାଲତରେ ଏକ ପିଟିସନ ଦାଖଲ କରିଥିଲେ । ଏସଡ଼ିଜେଏମ କୁମାର ସ୍ପନ୍ଦନ ପିଟିସନର ଶୁଣାଣି କରି ବିକ୍ରମ ଓ ମଳୟକୁ ଜେଲ ଭିତରେ ଆବଶ୍ୟକ ସ୍ଥଳରେ ଘର ରନ୍ଧା ଖାଦ୍ୟ ଯୋଗାଇଦେବାକୁ ଜେଲ କର୍ତ୍ତୃପକ୍ଷଙ୍କୁ ନିର୍ଦ୍ଦେଶ ଦେଇଥିଲେ ।