ଚାଲିଛି ପୂଜାର୍ଚ୍ଚନା । ପ୍ରଭୁଙ୍କୁ ବନ୍ଦାପନା କରୁଛନ୍ତି ମହିଳାମାନେ । ସଂକୀର୍ତ୍ତନରେ କମ୍ପୁଛି ପରିବେଶ । ସମସ୍ତଙ୍କ ତୁଣ୍ଡରେ ହରିନାମ । କାହିଁକି ନା ସୁଦୂର କୋଲକାତାରୁ କାକଟପୁର ଆସିଛନ୍ତି ରାଧାକୃଷ୍ଣ । ପାରମ୍ପରିକ ଶଗଡ ଗାଡିକୁ ଦୁଇଟି ବଳଦ ଟାଣି ନେଉଥିବା ବେଳେ ଶଗଡ ଗାଡି ଉପରେ ବିମାନରେ ରାଧାକୃଷ୍ଣଙ୍କ ସହିତ ପ୍ରଭୁପାଦ ବସିଥିବା ଦୃଶ୍ୟ କେମିତି ନିଆରା ଆଧ୍ୟାତ୍ମିକ ପରିବେଶ ସୃଷ୍ଟି କରୁଛି ।
ପୌରାଣିକ କିମ୍ବଦନ୍ତୀ ଅନୁଯାୟୀ ଭାରତ ମାଟିରେ ଭଗବାନ ଯୁଗକୁ ଯୁଗ ଅବତାରିତ ହୋଇ ସତ୍ୟର ପ୍ରତିଷ୍ଠା କରି ଅସତ୍ୟର ବିନାଶ କରିଛନ୍ତି । ସେହି ସତ୍ୟ ଧର୍ମକୁ ଅନୁସରଣ କରି ଆଜି ଭାରତ ମାଟିରେ ହିନ୍ଦୁ ଧର୍ମର ବିଭିନ୍ନ ଧର୍ମାନୁଷ୍ଠାନମାନ ଗଢି ଉଠିଛି । ସେହିଭଳି ଏକ ଧର୍ମାନୁଷ୍ଠାନ ହେଉଛି ଇସ୍କନ ବା ଅନ୍ତର୍ଜାତୀୟ ଶ୍ରୀକୃଷ୍ଣ ପ୍ରଚାର ସମିତି । ଏହି ସଂସ୍ଥା ବିଭିନ୍ନ ସ୍ଥାନରେ ଶ୍ରୀକୃଷ୍ଣ ଚେତନାକୁ ପ୍ରଦର୍ଶନ କରିଥାନ୍ତି । ଦୀର୍ଘ ଦଶନ୍ଧି ଧରି ଧାର୍ମିକ ଅନୁଷ୍ଠାନ ଇସ୍କନ, ବିଶ୍ବର ବିଭିନ୍ନ ଦେଶମାନଙ୍କରେ ଭଗବାନ ଶ୍ରୀକୃଷ୍ଣଙ୍କ ନାମ ସହିତ ହରିନାମର ପ୍ରଚାର ପ୍ରସାର କରିଆସୁଛନ୍ତି ।
ସମାନ ଭାବେ ଇସ୍କନ ପକ୍ଷରୁ ଏକ ଶଗଡ ଗାଡିରେ ସୁସଜ୍ଜିତ ବିମାନରେ ରାଧାକୃଷ୍ଣଙ୍କ ପ୍ରତିମୂର୍ତ୍ତି ସାଙ୍ଗକୁ ଇସ୍କନର ପ୍ରତିଷ୍ଠାତା ଶୈଲ ଶ୍ରୀ ପ୍ରଭୁପାଦଙ୍କ ପ୍ରତିମୂର୍ତ୍ତି ସ୍ଥାପନ କରାଯାଇ ସୁଦୂର କୋଲକାତାର ନବଦୀପ ଅଞ୍ଚଳରୁ ଯାତ୍ରା ଆରମ୍ଭ କରି କାକଟପୁର ଠାରେ ପହଞ୍ଚିଛନ୍ତି । କାକଟପୁରର ବିଭିନ୍ନ ଗାଁ ପରିକ୍ରମା କରିବା ବେଳେ ଏହା କାକଟପୁର ନିକଟ ବାଜପୁର ଗାଁ ଠାରେ ପହଞ୍ଚି ଥିଲା । ଏହି ଶଗଡଗାଡିଟି ଗ୍ରାମ ପରିକ୍ରମା କରିବା ବେଳେ ଗାଁର ଅଧିବାସୀମାନେ ଭାବ ଭକ୍ତିରେ ଠାକୁରଙ୍କୁ ପୂଜର୍ଚ୍ଚନା କରିବା ସହିତ ହରିନାମ ସଂକୀର୍ତ୍ତନରେ ନିଜକୁ ସାମିଲ କରିଥିଲେ ।
କାକଟପୁର ଅଞ୍ଚଳରେ ଶଗଡ଼ିଗାଡିରେ ଭଗବାନ ରାଧାକୃଷ୍ଣଙ୍କୁ ଦେଖିବା ପାଇଁ ଲୋକମାନେ ଶ୍ରଦ୍ଧା ଭକ୍ତିର ସହକାରେ ଗାଁ ରାସ୍ତାକୁ ଆସିବା ସହିତ ଧୂପଦୀପ ଥାଳି ଧରି ବନ୍ଦାପନା କରିଥିଲେ । ସୁସଜ୍ଜିତ ବିମାନରେ ରାଧାକୃଷ୍ଣଙ୍କ ସହିତ ଶଗଡ଼ ଗାଡିକୁ ଟାଣି ନେଉଥିବା ଦୁଇଟି ବଳଦ ଲୋକମାନଙ୍କର ଆକର୍ଷଣର କେନ୍ଦ୍ରବିନ୍ଦୁ ପାଲଟିଥିଲା । ଏହି ଦୁଇଟି ସୁନ୍ଦର ବଳଦ ଭଗବାନଙ୍କୁ କାନ୍ଧରେ ବୋହି ବୋହି ସୁଦୂର ନବଦୀପରୁ କାକଟପୁର ପର୍ଯ୍ୟନ୍ତ ଆଣି ପହଞ୍ଚାଇଛନ୍ତି ।
ଭଗବାନଙ୍କୁ ଦର୍ଶନ କରିବା ପାଇଁ ଆମକୁ ମନ୍ଦିର ଯିବାକୁ ପଡିଥାଏ କିନ୍ତୁ ସାକ୍ଷାତ ଭଗବାନ ଦର୍ଶନ ଦେବା ପାଇଁ ସୁଦୂର ନବଦୀପରୁ ଭକ୍ତଙ୍କ ପାଖକୁ ଆସିଥିବା ଦେଖି ଗ୍ରାମବାସୀମାନେ ବନ୍ଦାପନା କରିଥିଲେ । ହରିନାମ ସଂକୀର୍ତ୍ତନରେ ଆବାଳ ବୃଦ୍ଧବନିତା ନିଜକୁ ସାମିଲ କରି ନୃତ୍ୟ କରିଥିଲେ । ଭକ୍ତ ଏବଂ ଭଗବାନଙ୍କ ମିଳନର ଏହି ଅପୂର୍ବ ଦୃଶ୍ୟ ବାଜପୁର ଗାଁରେ ଏକ ଆଧ୍ୟାତ୍ମିକ ପରିବେଶ ସୃଷ୍ଟି କରିଥିଲା ।