ପୁରୀ ଶ୍ରୀଜଗନ୍ନାଥ ମନ୍ଦିର ପ୍ରଶାସନ ଅଧୀନରେ ଥିବା ଭକ୍ତ ନିବାସଗୁଡ଼ିକରେ ୪ ଚକିଆ ଯାନ ରଖିଲେ ୨୪ ଘଣ୍ଟାକୁ ୫୦୦ ଟଙ୍କା ପାର୍କିଂ ଫି ଦେବାକୁ ପଡ଼ିବ । ଏନେଇ ଶ୍ରୀଜଗନ୍ନାଥ ମନ୍ଦିର ପକ୍ଷରୁ ନିର୍ଦ୍ଦେଶନାମା ବାହାରିବା ପରେ ଏହାକୁ ନେଇ ଅନେକ ଯାତ୍ରୀ ଅସନ୍ତୋଷ ପ୍ରକାଶ କରିଛନ୍ତି । ମଙ୍ଗଳବାର ଏନେଇ ନିର୍ଦ୍ଦେଶନାମା ବାହାରିଥିବା ବେଳେ ଗୁରୁବାର ଠାରୁ ଲାଗୁ ହୋଇଛି । ନୂଆବର୍ଷ ଆରମ୍ଭରେ ଯାତ୍ରୀଙ୍କୁ ଏହି ନୂଆ କଷ୍ଟ ଦେଇଛି ପ୍ରଶାସନ ।
ଶ୍ରୀମନ୍ଦିର ଅନତି ଦୂରରେ ବଡ଼ଦାଣ୍ଡ ପାଶ୍ୱର୍ରେ ନୀଳାଚଳ ଭକ୍ତ ନିବାସ, ନୀଳାଦ୍ରି ଭକ୍ତ ନିବାସ, ପୁରୁଷୋତ୍ତମ ଭକ୍ତ ନିବାସ, ଶ୍ରୀଗୁଣ୍ଡିଚା ଭକ୍ତ ନିବାସ ରହିଛି । ଏଠାରେ ଯାତ୍ରୀଙ୍କ ରହଣି ଶୁଳ ଖୁବ୍ ଅଧିକ ହୋଇଥିବା ବେଳେ ଏବେ ଏଠାରେ ୪ ଚକିଆ ଯାନ ନିମନ୍ତେ ଅହେତୁକ ପାର୍କିଂ ଫି ଦେବାକୁ ପଡ଼ିବ । ଯାହା ଅସନ୍ତୋଷର କାରଣ ହୋଇଛି । ସାଧାରଣତଃ ୨୪ ଘଣ୍ଟା ଗାଡ଼ି ପାର୍କିଂ ନିମନ୍ତେ ୫୦ରୁ ୧୦୦ ଟଙ୍କା ଭିତରେ ଆଦାୟ ହୋଇଥାଏ । ହେଲେ ଏହି ପରିମାଣକୁ ୫୦୦ ଟଙ୍କା କରାଯିବା ଯାତ୍ରୀଙ୍କ ଚିନ୍ତା ବଢ଼ାଇଛି । ସେପଟେ ଯାତ୍ରୀମାନେ ଭକ୍ତ ନିବାସରେ ରହଣି ନିମନ୍ତେ ଅଧିକ ଶୁଳ୍କ ଦେଉଥିବା ବେଳେ ଏହାବାଦ୍ ପାର୍କିଂ ନିମନ୍ତେ ଶୁଳ୍କ ଦେବାକୁ ପଡ଼ୁଥିବା ଜାଣିବା ପରେ ଏହା ଅସନ୍ତୋଷ ସୃଷ୍ଟି କରିଛି ।