ହୁତୁହୁତୁ ହୋଇ ଜଳିଗଲା ଘର। ନିଆଁ ଲାଗି ଜଳିଗଲା ଘରର ଆସବାବପତ୍ର ସହ ଅତି ଆବଶ୍ୟକୀୟ ସାମଗ୍ରୀ । ତେବେ ଯାଜପୁର ଜିଲ୍ଲା ପାଣିକୋଇଲି ପଞ୍ଚାୟତ ଅନ୍ତର୍ଗତ ଚିତରା ସାହିରେ ଏହି ଘଟଣା ଘଟିଛି।
ସୂଚନା ମୁତାବକ, ଆଜି ସକାଳ ସମୟରେ କୌଣସି କାରଣ ବଶତଃ ଚିତରା ସାହିର ଏକ ଚାଳ ଛପର ଘରେ ନିଆଁ ଲାଗିଯାଇଥିଲା । ନିଆଁ ଲାଗିବାର କାରଣ ଅସ୍ପଷ୍ଟ ରହିଥିବାବେଳେ ସ୍ଥାନୀୟ ଲୋକେ ଉକ୍ତ ନିଆଁକୁ ଆୟତ୍ତ କରିବାକୁ ଚେଷ୍ଟା କରୁଥିଲେ । ଏନେଇ ଖବର ପାଇ ଘଟଣାସ୍ଥଳରେ ଯାଜପୁର ରୋଡ଼ ଓ ବୈତରଣୀ ରୋଡ ଅଗ୍ନିଶମ ଗାଡି ପହଞ୍ଚି ନିଆଁଙ୍କୁ ଆୟତ୍ତ କରୁଥିବା ଜଣାପଡିଛି। ଉକ୍ତ ପରିବାରଟି ଗରିବ ଶ୍ରେଣୀରେ ହୋଇଥିବାକୁ ସରକାରୀ ସହାୟତା ପାଇଁ ଗ୍ରାମବାସୀମାନେ ଦାବୀ କରିଛନ୍ତି।