ରାଜଧାନୀରେ ଭୟାବହ ଅଗ୍ନିକାଣ୍ଡ । ଦିଲ୍ଲୀ ସଙ୍ଗମ ବିହାର ଅଞ୍ଚଳରେ ଭୟଙ୍କର ଅଗ୍ନିକାଣ୍ଡ । ହୁତୁ ହୁତୁ ହୋଇ ଜଳିଲା ୪ ମହଲା କୋଠା। ଫଳରେ ୪ ଜଣଙ୍କ ମୃତ୍ୟୁ ହୋଇଥିବା ବେଳେ ଜଣେ ଗୁରୁତର ଭାବେ ଆହତ ହୋଇଛନ୍ତି । ଘଟଣାସ୍ଥଳରେ ଅଗ୍ନିଶମ ବାହିନୀ ପହଞ୍ଚି ନିଆଁକୁ ଆୟତ୍ତ କରିଛି।
ସୂଚନା ମୁତାବକ, ଶନିବାର ସନ୍ଧ୍ୟାରେ ଦିଲ୍ଲୀର ତିଗଡୀ ଏକ୍ସଟେନସନ ଅଞ୍ଚଳରେ ଥିବା ଏକ ଚାରି ମହଲା କୋଠାର ତଳ ମହଲାରେ ଥିବା ଏକ ଜୋତା ଦୋକାନରେ ନିଆଁ ଲାଗିଥିଲା। ଏହା ପରେ ଉପର ମହଲାକୁ ବ୍ୟାପି ସମଗ୍ର କୋଠାକୁ ଗ୍ରାସ କରିଥିଲା। ଦିଲ୍ଲୀ ଅଗ୍ନିଶମ ବାହିନୀର ଚାରୋଟି ଗାଡ଼ି ନିଆଁକୁ ନିୟନ୍ତ୍ରଣ କରିଥିଲା।ଦିଲ୍ଲୀ ଅଗ୍ନିଶମ ବାହିନୀ ସନ୍ଧ୍ୟା ୬ଟା ୨୭ ରେ ସୂଚନା ପାଇଥିଲା ଯେ ମଙ୍ଗଳ ମାର୍କେଟ ନିକଟରେ ଏକ ଘରେ ନିଆଁ ଲାଗିଯାଇଛି। ଅଗ୍ନିଶମ କର୍ମଚାରୀମାନେ ଘଟଣାସ୍ଥଳରେ ପହଞ୍ଚି ସଫଳତାର ସହ ନିଆଁ ଲିଭାଇଥିଲେ। ନିଆଁକୁ ନିୟନ୍ତ୍ରଣ କରାଯିବା ପରେ, ଅଗ୍ନିଶମ ବିଭାଗ ଦ୍ୱାରା କରାଯାଇଥିବା ତଦନ୍ତ ସମୟରେ ଘରୁ ତିନୋଟି ମୃତଦେହ ଉଦ୍ଧାର କରାଯାଇଥିଲା। ତେବେ ଅଗ୍ନିକାଣ୍ଡର ପ୍ରକୃତ କାରଣ ଏପର୍ଯ୍ୟନ୍ତ ଜଣାପଡିନଥିବା ବେଳେ ଘଟଣାର ତଦନ୍ତ ଜାରି ରହିଛି। ଅଗ୍ନିଶମ କର୍ମଚାରୀମାନେ ଘର ଭିତରୁ ଦୁଇଜଣଙ୍କୁ ଉଦ୍ଧାର କରି ଚିକିତ୍ସା ପାଇଁ ସ୍ଥାନୀୟ ହସ୍ପିଟାଲକୁ ପଠାଇଛନ୍ତି।
ସେପଟେ ଦିଲ୍ଲୀ ପୁଲିସ କହିଛି ଯେ, ଶନିବାର ସନ୍ଧ୍ୟା ୬ଟା ୨୪ରେ, ଏକ କଲ୍ ଆସିଥିଲା ଯେଉଁଥିରେ ସେମାନଙ୍କୁ ସୂଚନା ଦିଆଯାଇଥିଲା ଯେ ତିଗଡୀ ଏକ୍ସଟେନସନର ବି ବ୍ଲକରେ ଥିବା ଏକ ଚାରି ମହଲା କୋଠାରେ ନିଆଁ ଲାଗିଛି। ତିଗଡୀ ପୁଲିସ ଷ୍ଟେସନର ପୁଲିସ ଘଟଣାସ୍ଥଳରେ ପହଞ୍ଚି ଦେଖିଥିଲେ ଯେ ଚାରି ମହଲା କୋଠାରେ ଏକ ଭୟଙ୍କର ନିଆଁ ଲାଗି ରହିଛି, ଯାହା ଗ୍ରାଉଣ୍ଡ ଫ୍ଲୋରରେ ଥିବା ଏକ ଜୋତା ଦୋକାନରୁ ଆରମ୍ଭ ହୋଇଥିଲା। ଏହି ଘଟଣାରେ ଚାରି ଜଣଙ୍କର ମୃତ୍ୟୁ ହୋଇଛି ଏବଂ ଜଣେ ବ୍ୟକ୍ତି ହସ୍ପିଟାଲରେ ଭର୍ତ୍ତି ହୋଇଛନ୍ତି। ମୃତକଙ୍କ ମଧ୍ୟରୁ ଜଣେ ମାଲିକ ସତିନ୍ଦର ଭାବରେ ଚିହ୍ନଟ ହୋଇଛନ୍ତି। ବିସ୍ତୃତ ତଦନ୍ତ ପାଇଁ ଘଟଣାସ୍ଥଳକୁ କ୍ରାଇମ ଏବଂ ଫୋରେନସିକ୍ ଟିମକୁ ଡକାଯାଇଥିଲା।ପ୍ରକାଶ ଥାଉକି, ପୂର୍ବରୁ ନଭେମ୍ବର ୨୬ ତାରିଖରେ, ନାରୈନା ଶିଳ୍ପାଞ୍ଚଳର ଏକ ଚାରି ମହଲା ବିଶିଷ୍ଟ ଗୋଦାମରେ ଏକ ଭୟଙ୍କର ଅଗ୍ନିକାଣ୍ଡ ଘଟିଥିଲା ଏବଂ କିଛି ଘଣ୍ଟା ପରେ ଦୁଇଟି ଉପର ମହଲା ଭୁଶୁଡ଼ି ପଡ଼ିଥିଲା।