ଆଉ ଦିନକ ପରେ ଖଣ୍ଡଗିରି ମେଳା । ସଜେଇ ହେଉଛି ଐତିହାସିକ ଖଣ୍ଡଗିରି ପାହାଡ଼ । ପାହାଡ଼ ପାଦଦେଶରେ ଯଜ୍ଞକୁଣ୍ଡ ସହ ସାଧୁସନ୍ଥଙ୍କ ରହିବା ପାଇଁ ଅସ୍ଥାୟୀ ଘର ଜୋର୍ସୋର ତିଆରି ଚାଲିଛି । ବାହାର ରାଜ୍ୟରୁ ଖେଳଣା, ଫୁଲ ବେପାରୀ ଓ ଦୋଳି ବେପାରୀମାନେ ମଧ୍ୟ ଆସି ମେଳି ବାନ୍ଧିଲେଣି । ଏପଟେ ଯାତ୍ରା ପାଇଁ ୭ଟି ପେଣ୍ଡାଲ ସଜ୍ଜା ଚାଲିଛି । ପ୍ରସିଦ୍ଧ ମାଘମେଳା ପୂର୍ବରୁ ଖଣ୍ଡଗିରି ଚଳଚଞ୍ଚଳ ହୋଇପଡ଼ିଛି ।
ସେଥିପାଇଁ ପାହାଡ଼ ପାଦଦେଶଠାରୁ ନେଇ ଜାଗମରା ରାସ୍ତା, ଖଣ୍ଡଗିରି ବାରି ଓ ବିଭିନ୍ନ ଯାତ୍ରା ପେଣ୍ଡାଲରେ ପ୍ରସ୍ତୁତି ଶେଷ ପର୍ଯ୍ୟାୟରେ ପହଞ୍ଚିଛି । ରବିବାରଠାରୁ ହୋମଯଜ୍ଞରେ ଖଣ୍ଡଗିରି ପାହାଡ଼ କମ୍ପିବ । ଏପର୍ଯ୍ୟନ୍ତ ପୁରୀ, ଢେଙ୍କାନାଳ ସହ ପଡ଼ୋଶୀ ପଶ୍ଚିମବଙ୍ଗ, ଛତିଶଗଡ଼, ଉତ୍ତରପ୍ରଦେଶରୁ ପ୍ରାୟ ୨୦୦ରୁ ଊଦ୍ଧ୍ୱର୍ ସାଧୁସନ୍ଥ ଖଣ୍ଡଗିରିକୁ ଆସିଛନ୍ତି । ଖଣ୍ଡଗିରି ମେଳା ପାଇଁ ବିଶ୍ୱ ସନାତନ ବୈଦିକ ଧର୍ମ ପରିଷଦ ପକ୍ଷରୁ ସମସ୍ତ ପ୍ରସ୍ତୁତି ଶେଷ କରାଯାଇଛି ।
ରବିବାର ବ୍ରାହ୍ମମୁହୂର୍ତ୍ତରେ ବେଦପାଠ, ସ୍ମୃତି ପ୍ରାର୍ଥନା, ଉପାସନା କରାଯିବ । ଏହାପରେ ଖଣ୍ଡଗିରିରେ ଅବସ୍ଥିତ ରାଧାକୁଣ୍ଡ, ସାମ କୁଣ୍ଡ, ଆକାଶ ଗଙ୍ଗା, ଗୁପ୍ତଗଙ୍ଗାରୁ କଳସ ଶୋଭାଯାତ୍ରା ହେବ । ପ୍ରତିଦିନ ବିଶିଷ୍ଟ ପ୍ରବଚକଙ୍କ ଦ୍ୱାରା ଧର୍ମଶାସ୍ତ୍ର ଉପରେ ଆଲୋଚନା କରାଯିବ । ମା’ ବାରଭୂଜାଙ୍କ ପାଖରେ ବୈଦିକ ବ୍ରାହ୍ମଣ ସମାଜ ପକ୍ଷରୁ ବିଶ୍ୱଶାନ୍ତି ଗୀତା ମହାଯଜ୍ଞ ସହ ନବଦିନାତ୍ମକ ରାମଚରିତ ମାନସ ପାରାୟଣ, ଗରିବ ବ୍ରାହ୍ମଣ ପିଲାଙ୍କ ସମୂହ ବ୍ରତ ହେବ । ଏଥିସହ ପାହାଡ଼ ଚାରିପାଖରେ ସାଧୁସନ୍ଥଙ୍କ ଦ୍ୱାରା ୧୦୮ କୁଣ୍ଡୀୟ କରାଯିବ । ପୋଦଦେଶରେ ଭଗବାନ ବିଷ୍ଣୁଙ୍କ ବିଶ୍ୱରୂପ ଓ କାଞ୍ଚି ଅଭିଯାନର ଝଲକ ଭକ୍ତଙ୍କୁ ଆକର୍ଷିତ କରିବ ।