ମହାକାଶର ଗଭୀର ଶୂନ୍ୟତାରେ ପୃଥିବୀ ଓ ଲାଲ୍ ଗ୍ରହ ମଧ୍ୟରେ ଏକ ନିରବ ପ୍ରାଚୀର ଠିଆ ହୋଇଛି । ଆଗାମୀ କିଛି ଦିନ ପାଇଁ ପୃଥିବୀର ରୋବୋଟିକ୍ ଦୂତମାନେ ମଙ୍ଗଳରେ ଏକୁଟିଆ ରହିବେ ଏବଂ ମିଶନ ନିୟନ୍ତ୍ରଣରେ ନିଜ ମାଲିକଙ୍କ ସହ ସମ୍ପର୍କ ସ୍ଥାପନ କରିପାରିବେ ନାହିଁ । ଏହା କୌଣସି ସାଇନ୍ସ-ଫିକ୍ସନ୍ ଥ୍ରିଲର୍ ଫିଲ୍ମର କାହାଣୀ ନୁହେଁ । ଏହା ଏକ ଦ୍ୱିବାର୍ଷିକ ମହାକାଶୀୟ ଘଟଣା, ଯାହା ସୌର ସଂଯୋଗ ନାମରେ ପରିଚିତ । ପ୍ରତି ୨୫ ମାସରେ ଗ୍ରହମାନଙ୍କର କକ୍ଷୀୟ ନୃତ୍ୟ ପୃଥିବୀ ଓ ମଙ୍ଗଳ ଗ୍ରହକୁ ସୂର୍ଯ୍ୟର ବିପରୀତ ପାର୍ଶ୍ୱକୁ ଆଣେ । ମଙ୍ଗଳ ଗ୍ରହ ସୂର୍ଯ୍ୟର ବିଶାଳ ଉଜ୍ଜ୍ୱଳ ଥାଳିଆ ପଛରେ ଗୁରୁଣ୍ଡୁଥିବା ଦେଖାଯାଏ । ଏହି ସଂରଚନା ଏକ ଅସ୍ଥାୟୀ ଶୂନ୍ୟସ୍ଥାନ ସୃଷ୍ଟି କରେ, ଯାହା ପୃଥିବୀ ସହ ସମସ୍ତ ଗୁରୁତ୍ୱପୂର୍ଣ୍ଣ ଯୋଗାଯୋଗକୁ ଅଟକାଇଦିଏ ।
ସୂର୍ଯ୍ୟ କେବଳ ଏକ ଆଲୋକ ପିଣ୍ଡୁଳା ନୁହେଁ, ଏହା ଏକ ବିଶୃଙ୍ଖଳିତ ରିଆକ୍ଟର୍ ଯାହା ଉତ୍ତପ୍ତ, ଆୟନଯୁକ୍ତ ଗ୍ୟାସ୍ର ଏକ ଅଶାନ୍ତ ବାତାବରଣ ଦ୍ୱାରା ଆବୃତ୍ତ । ଏହି ସୌର ବାତାବରଣ ଉକ୍ତ ରେଡିଓ ନିରବତାର ମୁଖ୍ୟ କାରଣ । ଆମେ ଆମ ଅର୍ବିଟର୍ ଓ ରୋଭର୍ଗୁଡ଼ିକୁ ସଙ୍କେତ ପଠାଇବାକୁ ଚେଷ୍ଟା କରୁଥିବା ବେଳେ ସୂର୍ଯ୍ୟର କୋରୋନା ରେଡିଓ ତରଙ୍ଗରେ ହସ୍ତକ୍ଷେପ କରେ ଏବଂ ତଥ୍ୟକୁ ସମ୍ପୂର୍ଣ୍ଣ ବିକୃତ ବା ଗିଳିଦିଏ । ଏହି ଅବଧିରେ ଇଞ୍ଜିନିୟରମାନେ ମହାକାଶ ଯାନକୁ ନିର୍ଦ୍ଦେଶ ପଠାଇବାକୁ ଚେଷ୍ଟା କଲେ, ବିକୃତ ନିର୍ଦ୍ଦେଶ ଯୋଗୁ ଯାନ ଖରାପ ହୋଇପାରେ । ଏଭଳି ବିପଦରୁ ରକ୍ଷା ପାଇବା ଲାଗି ୟୁରୋପୀୟ ମହାକାଶ ଏଜେନ୍ସି ଓ ନାସା ଭଳି ସଂସ୍ଥା ନିଜ ମହାକାଶଯାନକୁ ନିର୍ଦ୍ଦେଶ ଦେବା ସ୍ଥଗିତ ରଖିଛନ୍ତି । ନାସାର ପର୍ସିଭରାନ୍ସ ଭଳି ରୋଭର୍କୁ ଏହି ଅବଧିରେ କେବଳ ମୌଳିକ କାମ କରିବାକୁ ନିର୍ଦ୍ଦେଶ ମିଳିଛି । ସେହିପରି ଅର୍ବିଟର୍ମାନେ ମଧ୍ୟ ମଙ୍ଗଳ ଗ୍ରହର ପରିକ୍ରମା ଓ ତଥ୍ୟ ସଂଗ୍ରହ ଜାରି ରଖିଛନ୍ତି । କିନ୍ତୁ ଯୋଗାଯୋଗ ପୁନଃସ୍ଥାପନ ନ ହେବା ଯାଏ ନିଜ ଆଭ୍ୟନ୍ତର ହାର୍ଡ ଡ୍ରାଇଭ୍ରେ ସେମାନେ ତଥ୍ୟ ଗଚ୍ଛିତ ରଖିବେ ।
ଏହି ବାଧ୍ୟତାମୂଳକ ବିଚ୍ଛିନ୍ନତା ଅବଧି ଚଳିତ ମାସ ୨୧ ତାରିଖ ପର୍ଯ୍ୟନ୍ତ ଜାରି ରହିବ ବୋଲି ଅନୁମାନ କରାଯାଉଛି । ଏହି ସମୟରେ ସୂର୍ଯ୍ୟ ୧୪ ଲକ୍ଷ କିମି ଚଉଡ଼ା ଏକ ଢାଲ ଭାବେ ଠିଆ ହୋଇଛି, ଯାହା ଆମର ସବୁଠୁ ଉନ୍ନତ ଟେକ୍ନୋଲୋଜିକୁ ମଧ୍ୟ ନଷ୍ଟ କରିପାରେ । ଆମ ସୌରମଣ୍ଡଳ ଉପରେ ସୂର୍ଯ୍ୟର ପରମ ଶକ୍ତିର ଏହା ଉଦାହରଣ । ସୌର ଆଲୋକର ବଳୟ ମଧ୍ୟରୁ ମଙ୍ଗଳ ବାହାରିବା ପରେ ଏହି ନିରବତା ଭଙ୍ଗ ହେବ ।