ଭୁବନେଶ୍ୱର: ଗତବର୍ଷ ଘଟିଥିବା ଜଣେ ନାବାଳିକାଙ୍କୁ ଅପହରଣ କରି ଦୁଷ୍କର୍ମ କରିଥିବା ମାମଲାରେ ବଡ଼ଗଡ଼ ଥାନା ପୁଲିସ ୨ ଜଣଙ୍କୁ ଗିରଫ କରି କୋର୍ଟ ଚାଲାଣ କରିଛି। ଅଭିଯୁକ୍ତଦ୍ବୟ ହେଲେ ପେସାଦାର ଅପରାଧୀ ଦେବୀପ୍ରସାଦ ଜେନା (ଓରଫ ବୁବୁ) ଓ ଅମ୍ଳାନ ମହାନ୍ତି। ପୁଲିସ ସୂତ୍ରରୁ ଜଣାପଡ଼ିଛି, ଏହି ଘଟଣାରେ ବୁବୁଙ୍କ କିଛି ସହଯୋଗୀ ଏପର୍ଯ୍ୟନ୍ତ ଫେରାର ଅଛନ୍ତି। ସୂଚନା ମୁତାବକ, ୨୦୨୪ ଜାନୁଆରିରେ ଜଣେ ନାବାଳିକା ଟ୍ୟୁସନ୍ ପଢ଼ି ଘରକୁ ଫେରୁଥିବା ବେଳେ, ବଡ଼ଗଡ଼ ଅଞ୍ଚଳରେ ଛକି ରହିଥିବା ବୁବୁ ଓ ତାଙ୍କ ସାଙ୍ଗମାନେ ତାଙ୍କୁ ଜୋର-ଜବରଦସ୍ତ କାରରେ ଟେକି ନେଇଥିଲେ। କାରକୁ ନେଇ ପୁରୀ ବାଇପାସ୍ ପହଞ୍ଚିବା ପରେ, ସେମାନେ ପୀଡିତାଙ୍କୁ ଜୋରପୂର୍ବକ ନିଶା ପିଇବାକୁ ଦେଇ ସଂଜ୍ଞାହୀନ କରିଥିଲେ। ଏହାପରେ ସେମାନେ କାର ଭିତରେ ନାବାଳିକାଙ୍କୁ ଦୁଷ୍କର୍ମ କରିଥିଲେ ଏବଂ ତାଙ୍କର ନଗ୍ନ ଭିଡିଓ ସୁଟ୍ କରିଥିଲେ। ସଂଜ୍ଞା ଫେରିଲାପରେ ପୀଡିତାଙ୍କୁ ଛାଡ଼ି ଦେଇଥିଲେ, କିନ୍ତୁ ଏହା କାହାକୁ କହିଲେ ଭିଡିଓ ଭାଇରାଲ୍ କରିବା ଏବଂ ହତ୍ୟା କରିଦେବା ଧମକ ଦେଇଥିଲେ।ପୀଡିତା ଭୟରେ ପ୍ରଥମେ କିଛି କହିପାରିନଥିଲେ। କିନ୍ତୁ ଅଭିଯୁକ୍ତମାନେ ତାଙ୍କୁ ସର୍ବଦା ମାନସିକ ନିର୍ଯାତନା ଦେଇ ଆସୁଥିବାରୁ, ବର୍ଷେକାଳ ନିରବ ରହିବା ପରେ ଶେଷରେ ସେ ନୂଆପଲ୍ଲୀ ଥାନାରେ ଅଭିଯୋଗ କଲେ। ପରବର୍ତ୍ତୀରେ ସେ ଡିସିପିଙ୍କ ଦ୍ୱାରସ୍ଥ ହୋଇଥିଲେ। ଘଟଣା ବଡ଼ଗଡ଼ ଥାନା ଅଞ୍ଚଳରେ ଘଟିଥିବାରୁ, ମାମଲାକୁ ସେଠାକୁ ସ୍ଥାନାନ୍ତର କରାଗଲା। ବଡ଼ଗଡ଼ ପୁଲିସ ତଦନ୍ତ ଆରମ୍ଭ କରି, ଦୁଇ ଅଭିଯୁକ୍ତଙ୍କୁ ଗିରଫ କରି କୋର୍ଟ ଚାଲାଣ କରିଛି।
