ଆସନ୍ତା ଫେବୃଆରୀ ୭ରୁ ଭାରତ ଏବଂ ଶ୍ରୀଲଙ୍କାରେ ଆରମ୍ଭ ହେବାକୁ ଯାଉଥିବା ଟି-୨୦ ବିଶ୍ୱକପ୍-୨୦୨୬ ପୂର୍ବରୁ ଏକ ବଡ଼ ଖବର ସାମ୍ନାକୁ ଆସିଛି। ବାଂଲାଦେଶ କ୍ରିକେଟ୍ ବୋର୍ଡ (BCB) ନିଜ ମ୍ୟାଚ୍ଗୁଡ଼ିକୁ ଭାରତରୁ ଅନ୍ୟତ୍ର ସ୍ଥାନାନ୍ତର କରିବା ପାଇଁ କରିଥିବା ଅନୁରୋଧକୁ ଆନ୍ତର୍ଜାତୀୟ କ୍ରିକେଟ୍ କାଉନସିଲ୍ (ICC) ସ୍ପଷ୍ଟ ଭାବେ ପ୍ରତ୍ୟାଖ୍ୟାନ କରିଛି।
ରିପୋର୍ଟ ଅନୁଯାୟୀ, ବାଂଲାଦେଶରେ ହିନ୍ଦୁମାନଙ୍କ ଉପରେ ହେଉଥିବା ଅତ୍ୟାଚାରକୁ ନେଇ ଭାରତରେ ବ୍ୟାପକ ଜନଅସନ୍ତୋଷ ଦେଖାଦେଇଥିଲା। ଏହି କାରଣରୁ ସୁରକ୍ଷା ଦୃଷ୍ଟିରୁ ବାଂଲାଦେଶ ତାଙ୍କ ମ୍ୟାଚ୍ଗୁଡ଼ିକୁ ଶ୍ରୀଲଙ୍କା ସ୍ଥାନାନ୍ତର କରିବାକୁ ICC କୁ କହିଥିଲା। ମାତ୍ର ଏକ ଭର୍ଚୁଆଲ୍ ବୈଠକରେ ICC ସ୍ପଷ୍ଟ କରିଛି ଯେ, ଭାରତରେ ବାଂଲାଦେଶ ଖେଳାଳିଙ୍କ ପ୍ରତି କୌଣସି ସୁରକ୍ଷା ବିପଦ ନାହିଁ। ତେଣୁ ବାଂଲାଦେଶକୁ ନିର୍ଦ୍ଧାରିତ କୋଲକାତା ଓ ମୁମ୍ବାଇ ଭେନ୍ୟୁରେ ହିଁ ଖେଳିବାକୁ ପଡ଼ିବ। ଯଦି ବାଂଲାଦେଶ ଖେଳିବାକୁ ମନା କରେ, ତେବେ ସେମାନଙ୍କୁ ପଏଣ୍ଟ ହରାଇବାକୁ ପଡ଼ିବ ବୋଲି ଚେତାବନୀ ଦିଆଯାଇଛି।
ଏହି ବିବାଦର ମୂଳ କାରଣ ହେଉଛି ଆଇପିଏଲ୍ (IPL) ରେ ବାଂଲାଦେଶୀ ତାରକା ମୁସ୍ତାଫିଜୁର ରହେମାନଙ୍କୁ କୋଲକାତା ନାଇଟ୍ ରାଇଡର୍ସ (KKR) ଦଳରୁ ବାଦ୍ ଦେବା। ପ୍ରାୟ ୯.୨୦ କୋଟି ଟଙ୍କାରେ କିଣାଯାଇଥିବା ମୁସ୍ତାଫିଜୁରଙ୍କୁ ଛାଡ଼ିବା ପାଇଁ BCCI ନିର୍ଦ୍ଦେଶ ଦେଇଥିଲା। ବାଂଲାଦେଶରେ ସଂଖ୍ୟାଲଘୁଙ୍କ ଉପରେ ହେଉଥିବା ହିଂସା ଯୋଗୁଁ ଭାରତୀୟ ପ୍ରଶଂସକଙ୍କ ମଧ୍ୟରେ କ୍ରୋଧ ଦେଖି ଏହି ପଦକ୍ଷେପ ନିଆଯାଇଥିଲା। ଏହାର ପ୍ରତିକ୍ରିୟାରେ ବାଂଲାଦେଶ ସରକାର ଆଇପିଏଲ୍ ପ୍ରସାରଣ ଉପରେ ରୋକ୍ ଲଗାଇବା ସହ ବିଶ୍ୱକପ୍ ବର୍ଜନ କରିବାକୁ ଧମକ ଦେଇଥିଲେ। ମାତ୍ର ICC ର ଏହି କଠୋର ଆଭିମୁଖ୍ୟ ପରେ ବାଂଲାଦେଶ ଏବେ ଅଡୁଆରେ ପଡ଼ିଛି।