ଜାପାନର ପଶ୍ଚିମ ଦ୍ୱୀପ କ୍ୟୁଷୁରେ ଏକ ଭୟଙ୍କର ଅଗ୍ନି ଉଦ୍ଗୀରଣ ହୋଇଛି । ଆଗ୍ନେୟଗିରିର ନାଁ ସାକୁରାଜିମା, ଯାହା କାଗୋଶିମା ସହର ନିକଟସ୍ଥ ଦକ୍ଷିଣ ଦିଗରେ ଅବସ୍ଥିତ । ଗତ ରବିବାର ସାକୁରାଜିମା ଆଗ୍ନେୟଗିରିରେ ୩ ଥର ବିସ୍ଫୋରଣ ହେଲା, ଯାହା ଦ୍ୱାରା ଧୂଆଁ ଓ ପାଉଁଶ ବାୟୁମଣ୍ଡଳରେ ୪.୪ କିମି ଉପରକୁ ଉଠିଲା । ଏଥିଯୋଗୁ କୋଗିଶିମା ବିମାନବନ୍ଦରରୁ ୩୦ ଉଡ଼ାଣ ବାତିଲ କରାଗଲା ।
ପ୍ରଥମ ବିସ୍ଫୋରଣ ରବିବାର ରାତି ପ୍ରାୟ ୧ଟାରେ, ୨ୟ ୨.୩୦ରେ ଏବଂ ୩ୟ ସକାଳ ୮.୫୦ରେ ହୋଇଥିଲା । ପାଉଁଶର ବାଦଲ ଏତେ ଉଚ୍ଚକୁ ଉଠିଲା ଯେ ଆକାଶରେ କଳା ବାଦଲ ଛାଇଗଲା । ଗତ ୧୩ ମାସରେ ପ୍ରଥମ ଥର ୪ କିମି ଉପରକୁ ପାଉଁଶ ଉଠିଲା । ଏହା ପୂର୍ବରୁ ୨୦୧୯ରେ ସାକୁରାଜିମା ଆଗ୍ନେୟଗିରିରୁ ୫.୫ କିମି ଉଚ୍ଚକୁ ପାଉଁଶ ଉଠିଥିଲା । ସ୍ଥାନୀୟ ଲୋକଙ୍କୁ ଘରେ ରହିବାକୁ ଓ ମାସ୍କ ପିନ୍ଧିବାକୁ ପରାମର୍ଶ ଦିଆଯାଇଛି ।
ସାକୁରାଜିମା ଜାପାନର ଅନ୍ୟତମ ସବୁଠୁ ସକ୍ରିୟ ଆଗ୍ନେୟଗିରି । ଏଥିରେ ନିୟମିତ ଛୋଟ ଛୋଟ ବିସ୍ଫୋରଣ ହୁଏ । କିନ୍ତୁ ବଡ଼ ବିସ୍ଫୋରଣ ମାମଲା ଖୁବ୍ କମ୍ । ବର୍ଷ ତମାମ ଏହା ସକ୍ରିୟ ରହୁଥିବାରୁ ସ୍ଥାନୀୟ ଲୋକେ ସର୍ବଦା ପ୍ରସ୍ତୁତ ଥାନ୍ତି । ରିଙ୍ଗ୍ ଅଫ୍ ଫାୟାର କୁହାଯାଉଥିବା କ୍ଷେତ୍ରରେ ଜାପାନ ଅବସ୍ଥିତ । ଏଠାରେ ଭୂକମ୍ପ ଓ ଅଗ୍ନି ଉଦ୍ଗୀରଣ ଅଧିକ ହୁଏ । କ୍ୟୁଷୁ ଦ୍ୱୀପରେ ଅନେକ ଆଗ୍ନେୟଗିରି ଅବସ୍ଥିତ, କିନ୍ତୁ ସାକୁରାଜିମା ସବୁଠୁ ଚର୍ଚ୍ଚିତ । ୧୯୧୪ରେ ଏଠାରେ ବଡ଼ ବିସ୍ଫୋରଣ ହୋଇଥିଲା, ଯେଉଁଥିରେ ପୂରା ଦ୍ୱୀପ ମୁଖ୍ୟ ଭୂମି ସହ ଯୋଡ଼ିହେଲା ।