ଆସନ୍ତା ଜାନୁଆରୀ ୨୧ ତାରିଖ ବୁଧବାର ଦାରୁବ୍ରହ୍ମଙ୍କ ପଦ୍ମ ବେଶ । ଶ୍ରୀମନ୍ଦିର ରତ୍ନସିଂହାସନରୁଢ଼ ଶ୍ରୀବିଗ୍ରହଙ୍କୁ ପଦ୍ମ ବେଶରେ ସୁଶୋଭିତ କରାଯିବ । ଶ୍ରୀବଳଭଦ୍ର, ଦେବୀ ସୁଭଦ୍ରା ଓ ଶ୍ରୀଜଗନ୍ନାଥ ପଦ୍ମବେଶରେ ଭକ୍ତଙ୍କୁ ଦର୍ଶନ ଦେବେ । ପଦ୍ମ ପୁଷ୍କରିଣୀରେ ପ୍ରସ୍ଫୁଟିତ ବିଶାଳ ପଦ୍ମ କେଶର ମଧ୍ୟରେ ଶ୍ରୀମୁଖ ଶୋଭାପାଇବ । ଏଣୁ ବଡ଼ ଛତା ମଠରେ ଆରମ୍ଭ ହୋଇଛି ପ୍ରସ୍ତୁତି ।
ପୂର୍ଣ୍ଣିମା ତିଥିରେ ଗୁରୁବାର ପଦ୍ମ ବେଶ ନିର୍ମାଣ ଅନୁକୂଳ ହୋଇଥିଲା । ମଠ ମହନ୍ତ, ପୂଜାରୀ ଓ ମୁଖ୍ୟ ବେଶ ନିର୍ମାଣକାରୀଙ୍କ ଉପସ୍ଥିତିରେ ବେଶ ପ୍ରସ୍ତୁତି ପାଇଁ ଆବଶ୍ୟକ ସୋଲ ଓ ବିଭିନ୍ନ ସରଞ୍ଜାମ ପୂଜା କରାଯାଇଛି । ମୁଖ୍ୟ ବେଶ ନିର୍ମାଣକାରୀ ତଥା ଦୟଣାମାଳି ସେବକ ବସନ୍ତ କୁମାର ରଣାଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ଠାକୁରଙ୍କ ଉଦ୍ଦେଶ୍ୟରେ ଶ୍ରୀମୁଖ ପଦ୍ମ, ପଦ୍ମଫୁଲ ଓ ଗଛ ଆଦି ତିଆରି ହେଉଛି । ଦେବତା ଶ୍ରୀମସ୍ତକରେ ଚୂଳମାନ ଲାଗି ହେବେ । ସେଦିନ ରାତ୍ର ଚନ୍ଦନଲାଗି ନୀତି ବଢ଼ିବା ପରେ ବଡ଼ସିଂହାରରେ ଠାକୁରେ ଏହି ବେଶ ହେବେ । ଭକ୍ତମାନେ ବିଳମ୍ବିତ ରାତି ପର୍ଯ୍ୟନ୍ତ ଠାକୁରଙ୍କୁ ଏହି ବେଶରେ ଦର୍ଶନ କରି ଧନ୍ୟ ହେବେ ।