ମେକ୍ସିକୋରେ ବଡ଼ ଅଘଟଣ। ଜରୁରୀକାଳୀନ ଅବତରଣ ସମୟରେ ଏକ ଘରୋଇ ବିମାନ ଦୁର୍ଘଟଣାଗ୍ରସ୍ତ । ଫଳରେ ଅତି କମରେ ୭ ଜଣଙ୍କର ମୃତ୍ୟୁ ହୋଇଥିବା ସୂଚନା । ଏହି ଦୁର୍ଘଟଣା ଟୋଲୁକା ବିମାନବନ୍ଦରରୁ ୫ କିଲୋମିଟର ଦୂରରେ ଏବଂ ମେକ୍ସିକୋ ସିଟିରୁ ପ୍ରାୟ ୫୦ କିଲୋମିଟର ପଶ୍ଚିମରେ ଥିବା ଏକ ଶିଳ୍ପ କ୍ଷେତ୍ର ସାନ୍ ମାଟେଓ ଆଟେନକୋରେ ଘଟିଛି। ବିମାନଟି ମେକ୍ସିକୋର ପ୍ରଶାନ୍ତ ମହାସାଗର ଉପକୂଳରେ ଥିବା ଆକାପୁଲକୋରୁ ଉଡ଼ାଣ ଆରମ୍ଭ କରିଥିଲା। ମେକ୍ସିକୋର ନାଗରିକ ସୁରକ୍ଷା ସଂଯୋଜକ କହିଛନ୍ତି ଯେ, ଘରୋଇ ବିମାନରେ ୮ ଜଣ ଯାତ୍ରୀ ଏବଂ ଦୁଇ ଜଣ କ୍ରୁ ସଦସ୍ୟ ଥିଲେ, କିନ୍ତୁ ଦୁର୍ଘଟଣାର କିଛି ଘଣ୍ଟା ପରେ ମାତ୍ର ୭ ଜଣଙ୍କ ମୃତଦେହ ଉଦ୍ଧାର କରାଯାଇଥିଲା।ସେ କହିଛନ୍ତି ଯେ, ବିମାନଟି ଏକ ଫୁଟବଲ୍ ପଡ଼ିଆରେ ଅବତରଣ କରିବାକୁ ଚେଷ୍ଟା କରିଥିଲା କିନ୍ତୁ ନିକଟସ୍ଥ ଛାତ ଉପରେ ଧକ୍କା ଖାଇଥିଲା, ଯାହା ଫଳରେ ଏକ ବଡ଼ ଅଗ୍ନିକାଣ୍ଡ ଘଟିଥିଲା। ଦୁର୍ଘଟଣାର ତଦନ୍ତ ଚାଲିଛି। ସାନ୍ ମାଟେଓ ଆଟେନକୋର ମେୟର ଆନା ମୁନିଜ୍ ମିଲେନିଓ ଟେଲିଭିଜନକୁ କହିଛନ୍ତି ଯେ, ଅଗ୍ନିକାଣ୍ଡ ଯୋଗୁଁ ଅଞ୍ଚଳର ପ୍ରାୟ ୧୩୦ ଜଣଙ୍କୁ ସ୍ଥାନାନ୍ତର କରାଯାଇଛି।
ସେପଟେ ସାନ ମାଟେଓ ଆଟେନକୋର ମେୟର ଆନା ମୁନିଜ୍ କହିଛନ୍ତି ଯେ, ଅଗ୍ନିକାଣ୍ଡର ଭୟାବହତା ଯୋଗୁଁ, ଆଖପାଖରେ ଥିବା ପ୍ରାୟ ୧୩୦ ଜଣଙ୍କୁ ସ୍ଥାନାନ୍ତର କରାଯାଇଛି। ପ୍ରଶାସନ ସତର୍କତାମୂଳକ ପଦକ୍ଷେପ ସ୍ୱରୂପ ସମଗ୍ର ଅଞ୍ଚଳକୁ ଘେରାବନ୍ଦୀ କରିଛି। ସ୍ଥାନୀୟ ଲୋକମାନେ ଆତଙ୍କିତ ଅବସ୍ଥାରେ ଅଛନ୍ତି। ତଦନ୍ତ ସରିବା ପରେ ହିଁ ଦୁର୍ଘଟଣାର ପ୍ରକୃତ କାରଣ ଜଣାପଡିବ ବୋଲି ଅଧିକାରୀମାନେ କହିଛନ୍ତି।