ଛତିଶଗଡର ବିଳାସପୁର ଜିଲ୍ଲାର ଲାଲଖଦାନ ଷ୍ଟେସନ ନିକଟରେ ଘଟିଛି ଭୟାବହ ଟ୍ରେନ୍ ଦୁର୍ଘଟଣା। କୋର୍ବା ଯାତ୍ରୀବାହୀ ଟ୍ରେନ୍ ଓ ଏକ ମାଲବାହୀ ଟ୍ରେନ୍ ମୁହାଁମୁହିଁ ଧକ୍କା ହେବାରୁ ଏପର୍ଯ୍ୟନ୍ତ ୧୧ ଜଣଙ୍କ ମୃତ୍ୟୁ ଓ ୨୪ରୁ ଅଧିକ ଆହତ ହୋଇଛନ୍ତି। ମୃତ୍ୟୁ ସଂଖ୍ୟା ବଢ଼ିପାରେ ବୋଲି ଅନୁମାନ କରାଯାଉଛି ।
ଖବର ଅନୁଯାୟୀ, ବିଳାସପୁରରୁ କୋର୍ବା ଯାଉଥିବା ଯାତ୍ରୀବାହୀ ଟ୍ରେନ୍ ବିପରୀତ ଦିଗରୁ ଆସୁଥିବା ମାଲବାହୀ ଟ୍ରେନ୍ କୁ ଧକ୍କା ଦେଇଥିଲା । ଧକ୍କାର ଘାତ ଏତେ ଭୟାବହ ଥିଲା ଯେ ଯାତ୍ରୀବାହୀ ଟ୍ରେନ୍ର କିଛି ବଗି ମାଲବାହୀ ଟ୍ରେନ୍ର ଉପରେ ଚଢ଼ିଗଲା ଓ ମାଲବାହୀ ଟ୍ରେନ୍ର ଏକାଧିକ ବଗି ଲାଇନଚ୍ୟୁତ ହୋଇଥିଲା।
ଦୁର୍ଘଟଣା ପରେ ରେଳ ଅଧିକାରୀ ଓ ସ୍ଥାନୀୟ ପ୍ରଶାସନ ତୁରନ୍ତ ଘଟଣାସ୍ଥଳରେ ପହଞ୍ଚି ଉଦ୍ଧାର ଓ ରିଲିଫ୍ କାର୍ଯ୍ୟ ଆରମ୍ଭ କରିଛନ୍ତି। ଆହତମାନଙ୍କୁ ନିକଟସ୍ଥ ହସ୍ପିଟାଲରେ ଭର୍ତ୍ତି କରାଯାଇଛି।
ଘଟଣା ପରେ ଏହି ରୁଟରେ ଚଳାଚଳ କରୁଥିବା ବହୁ ଟ୍ରେନ ବାତିଲ ଓ ମାର୍ଗ ପରିବର୍ତ୍ତନ କରାଯାଇଛି। ଦୁର୍ଘଟଣାର ତଦନ୍ତ ପାଇଁ ରେଳବାଇ ନିରାପତ୍ତା କମିସନ ନିଯୁକ୍ତ ହୋଇଛି। ମୃତ ଓ ଆହତ ଯାତ୍ରୀମାନଙ୍କ ପରିବାର ପାଇଁ ରେଳବାଇ ପକ୍ଷରୁ ସହାୟତା ରାଶି ଘୋଷଣା କରାଯାଇଛି।