ବଲାଙ୍ଗୀର ଜିଲ୍ଲା ସିନ୍ଧେକେଲା ଥାନା ପୁଟୁପଡା ଗାଁରେ ମାଙ୍କଡ଼ ଆତଙ୍କ । ମାଙ୍କଡ଼ ଆକ୍ରମଣରେ ଜଣେ ୫ ବର୍ଷୀୟା ନାବାଳିକା ଗୁରୁତର ହୋଇଛନ୍ତି । ଝିଅଟିକୁ ଗୁରୁତର ଅବସ୍ଥାରେ ତାଙ୍କୁ ଟିଟିଲାଗଡ଼ ସ୍ୱାସ୍ଥ୍ୟ କେନ୍ଦ୍ରକୁ ସ୍ଥାନାନ୍ତର କରାଯାଇଛି । ମାସକ ପୂର୍ବରୁ ମାଙ୍କଡ଼ ପୁଟୁପଡା ଗାଁର ସଲ୍ୟ ବଛା ଓ ଦୁଇ ଜଣ ମହିଳା, ଭାନପୁର ଗାଁର କିଛି ଲୋକଙ୍କୁ ଆକ୍ରମଣ କରିଥିବା ବେଳେ ଗୁରୁବାର ସକାଳୁ ଜଣେ ନାବାଳିକାଙ୍କୁ ଆକ୍ରମଣ କରିଛନ୍ତି ।
ସୂଚନା ମୁତାବକ, ଗୁରୁବାର ସକାଳ ୯ଟା ୩୦ରେ ପୁଟୁପଡା ଗାଁର ୫ ବର୍ଷୀୟା ନାବାଳିକା ପାଠ ପଢିବା ପାଇଁ ଶିଶୁ ବାଟିକା ଯାଉଥିଲେ । ଏହି ସମୟରେ ୧୦ରୁ ୧୫ ମାଙ୍କଡ଼ ଗଛ ଡାଳ ଉପରେ ଥିଲେ । ସ୍କୁଲ ଯିବା ବେଳେ ଝିଅଟିକୁ ଦେଖି ଗଛ ତଳକୁ ଓହ୍ଲାଇ ଆସି ଝିଅର ଡାହାଣ ଗୋଡ଼କୁ କାମୁଡି ଦେଇଥିଲେ । ଯାହା ଫଳରେ ଝିଅଟି ଆହତ ହୋଇ ରାସ୍ତାରେ ପଡ଼ି ଯାଇଥିଲା । ଏହି ଦେଖି ସେହି ରାସ୍ତା ଦେଇ ଯିବା ଆସିବା କରୁଥିବା ଲୋକ ନାବାଳିକାଙ୍କୁ ଉଦ୍ଧାର କରି ପରିବାର ଲୋକଙ୍କୁ ଜଣାଇଥିଲେ । ପରିବାର ଲୋକ ଖବର ପାଇ ତୁରନ୍ତ ଚିକିତ୍ସା ପାଇଁ ସିନ୍ଧେକେଲା ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ନେଇ ଚିକିତ୍ସା କରିଛନ୍ତି । ଝିଅଟିର ସ୍ୱାସ୍ଥ୍ୟାବସ୍ଥା ଅଧିକ ଗୁରୁତର ଥିବାରୁ ତାଙ୍କୁ ଟିଟିଲାଗଡ଼ ସ୍ୱାସ୍ଥ୍ୟ କେନ୍ଦ୍ରକୁ ସ୍ଥାନାନ୍ତର କରାଯାଇଛି । ତେବେ ଏନେଇ ବଙ୍ଗୋମୁଣ୍ଡା ରେଞ୍ଜର ପି.ଏନ କୁମ୍ଭାରକୁ ଯୋଗାଯୋଗ କରିବାରୁ ସେ କହିଛନ୍ତି ଯେ, ମୁଁ ସୁରକ୍ଷା ଗାର୍ଡମାନଙ୍କୁ ପଠାଉଛି । ତୁରନ୍ତ ମାଙ୍କଡ଼ମାନଙ୍କୁ ଘଉଡ଼ାଇବା ପାଇଁ ବନ୍ଦୋବସ୍ତ କରିବେ ବୋଲି ପ୍ରତିକ୍ରିୟା ଦେଇଛନ୍ତି।