ପଞ୍ଜାବର ସିରହିନ୍ଦ ନିକଟରେ ଆଜି ଲୁଧିଆନାରୁ ଦିଲ୍ଲୀ ଯାଉଥିବା ଗରିବ ରଥ ଏକ୍ସପ୍ରେସ ଟ୍ରେନରେ ଅଗ୍ନିକାଣ୍ଡ ଘଟିଛି । ଟ୍ରେନର ତିନୋଟି ଏସି ବଗି ଜଳିଗଲା । ସିରହିନ୍ଦ ଷ୍ଟେସନରୁ ଅମ୍ବାଲା ଅଭିମୁଖେ ପ୍ରାୟ ଅଧ କିଲୋମିଟର ଦୂରରେ ଏହି ଘଟଣା ଘଟିଥିଲା ।
ସୂଚନା ଅନୁସାରେ, ଟ୍ରେନର ଗୋଟିଏ ବଗିରୁ ଧୂଆଁ ବାହାରୁଥିବା ଦେଖି ଟ୍ରେନକୁ ତତ୍କ୍ଷଣାତ୍ ଅଟକାଇ ଦିଆଯାଇଥିଲା । ପରେ ନିଆଁ ଅନ୍ୟ ଦୁଇଟି ବଗିକୁ ମଧ୍ୟ ବ୍ୟାପିଯାଇଥିଲା । ଯାତ୍ରୀମାନଙ୍କୁ ସମୟରେ ସୁରକ୍ଷିତ ଭାବେ ବାହାର କରାଯାଇଥିଲା ଏବଂ କୌଣସି ଆହତ ହୋଇନାହାନ୍ତି ବୋଲି ଖବର ମିଳିଛି ।
ସିରହିନ୍ଦ ଜିଆରପି ଏସଏଚଓ ରତନ ଲାଲ କହିଛନ୍ତି, “ଗୋଟିଏ କୋଚ୍ରୁ ଧୂଆଁ ବାହାରୁଥିବା ଦେଖିବା ସହିତ ଟ୍ରେନକୁ ଅଟକାଇ ଦିଆଯାଇଥିଲା । ଯାତ୍ରୀମାନଙ୍କୁ ସମୟରେ ନିରାପଦ ଭାବେ ଚାଲାଯିବାକୁ ସହଯୋଗ କରାଯାଇଥିଲା । ଅଗ୍ନିକାଣ୍ଡରେ ଟ୍ରେନର ତିନୋଟି ବଗି କ୍ଷତିଗ୍ରସ୍ତ ହୋଇଛି । ଘଟଣାର ସଠିକ କାରଣ ତଦନ୍ତ ପରେ ଜଣାପଡ଼ିବ।”
ଏହି ଘଟଣା ସମ୍ପର୍କରେ ରେଳ ମନ୍ତ୍ରଣାଳୟ କହିଛି, “ଆଜି ସକାଳେ ପଞ୍ଜାବର ସିରହିନ୍ଦ ଷ୍ଟେସନରେ ୧୨୨୦୪ ଅମୃତସର-ସହରସା ଗରିବ ରଥ ଏକ୍ସପ୍ରେସ ଟ୍ରେନରେ ଅଗ୍ନିକାଣ୍ଡ ଘଟିଛି । ବର୍ତ୍ତମାନ ସୁଦ୍ଧା କୌଣସି ମୃତାହତ ଖବର ମିଳିନାହିଁ । ଅଗ୍ନିଶମ ବାହିନୀ ନିଆଁକୁ ନିୟନ୍ତ୍ରଣରେ ଆଣିଛି।