ଟେଲିଗ୍ରାମର ମାଲିକ ପାଭେଲ ଡୁରୋଭ୍ ନିଜର ଦାନ କରିଥିବା ଶୁକ୍ରାଣୁରୁ ମା’ ହେଉଥିବା ମହିଳାଙ୍କୁ ସମ୍ପତ୍ତିରେ ଭାଗ ଦେବାକୁ ଘୋଷଣା କରିଛନ୍ତି । ପାଭେଲଙ୍କ ଉଚ୍ଚ-ଗୁଣବତ୍ତା ସମ୍ପନ୍ନ ଶୁକ୍ରାଣୁକୁ ମସ୍କୋର ଏକ ପ୍ରସିଦ୍ଧ ପ୍ରଜନନ କ୍ଲିନିକରେ ସୁରକ୍ଷିତ ରଖାଯାଇଛି । ତାଙ୍କ ଅଫର୍ ପରେ ତାଙ୍କ ଶୁକ୍ରାଣୁ ଜରିଆରେ ମା’ହେବାକୁ ମହିଳାଙ୍କ ଲମ୍ବା ଧାଡ଼ି ଲାଗିଛି । ଏହି ଅଫର୍ କେବଳ ୩୭ ବର୍ଷରୁ କମ୍ ବୟସର ମହିଳାଙ୍କ ପାଇଁ, ଯେଉଁମାନେ ପାଭେଲ ଦାନ କରିଥିବା ଶୁକ୍ରାଣୁରୁ ମା’ ହେବେ । ଏହି ମହିଳାଙ୍କୁ ପାଭେଲଙ୍କ ସମ୍ପତ୍ତିରେ ଅଧିକାର ପାଇବା ପାଇଁ ଡିଏନ୍ଏ ଟେଷ୍ଟ୍ ରିପୋର୍ଟ ଦେଖାଇବାକୁ ପଡ଼ିବ ।
ପରୀକ୍ଷଣ ସଫଳ ହେଲେ, ମହିଳାଙ୍କ ସନ୍ତାନଙ୍କୁ ପାଭେଲଙ୍କ ସମ୍ପତ୍ତିରେ ସମାନ ଅଧିକାର ମିଳିବ । ଏଥିସହିତ ଆଇଭିଏଫ୍ ଖର୍ଚ୍ଚ ମଧ୍ୟ ସେ ନିଜେ ଉଠାଇବେ । ପାଭେଲ କହିଛନ୍ତି, ପ୍ରଦୂଷଣ ଯୋଗୁ ବିଶ୍ୱରେ ସୁସ୍ଥ ଶୁକ୍ରାଣୁର ଅଭାବ ହେଉଛି । ସେଥିପାଇଁ ଭଲ ଗୁଣବତ୍ତାସମ୍ପନ୍ନ ଶୁକ୍ରାଣୁ ଦାନ କରିବା ତାଙ୍କର ସାମାଜିକ ଦାୟିତ୍ୱ । ଗତ ୧୫ ବର୍ଷ ହେଲା ପାଭେଲ ୧୨ ଭିନ୍ନ ଭିନ୍ନ ଦେଶରେ ଶୁକ୍ରାଣୁ ଦାନ କରିଛନ୍ତି । ଏହା ଦ୍ୱାରା ଅଦ୍ୟାବଧି ୧୦୦ରୁ ଅଧିକ ସନ୍ତାନ ଜନ୍ମ ହୋଇଛନ୍ତି । ଏଥିସହିତ ନିଜ ପାର୍ଟନର୍ଙ୍କଠୁ ମଧ୍ୟ ତାଙ୍କର ୬ ସନ୍ତାନ ଅଛନ୍ତି ।