ଦିଲ୍ଲୀରେ ଆତତାୟୀଙ୍କ କାରରୁ ବିସ୍ଫୋରଣ ପରେ ସାରା ଦେଶରେ ଏବେ ଭୟର ବାତାବରଣ ଖେଳିଯାଇଛି । ବିଭିନ୍ନ ରାଜ୍ୟର ଅନେକ ସମ୍ବେଦନଶୀଳ ପ୍ରତିଷ୍ଠାନକୁ ହାଇଆଲର୍ଟରେ ରଖାଯାଇଛି । ଏପରିସ୍ଥଳେ ଓଡ଼ିଶାର ରାଜଧାନୀ କେତେ ସୁରକ୍ଷିତ? ରାଜଧାନୀରେ ଦୀର୍ଘଦିନ ଧରି ରଖାଯାଇଥିବା ପୁରୁଣା କାରରେ କେହି ବିସ୍ଫୋରକ ସାମଗ୍ରୀ ରଖିଦେଲେ, କେତେବେଳେ ଯେ କ’ଣ ଅଘଟଣ ଘଟିବ, ଆକଳନ କରିହେବନି । ରାଜଧାନୀର ଅନେକ ଗଳିକନ୍ଦିରେ ଦୀର୍ଘଦିନ ଧରି ପଡ଼ିରହୁଛି କାର, ଟାଟାଏସି ଭଳି ୪ ଚକିଆ ଯାନ । କେଉଁଠି କାର ବନେଟ୍ରେ ମୋଟା ଅଳିଆ ଚଦର ବସିଲାଣି ତ କେଉଁଠି ଗାଡ଼ିର ସବୁ ପାର୍ଟସ୍ରେ କଳଙ୍କି ଲାଗିଗଲାଣି । ଏସବୁ ସନ୍ଦିଗ୍ଧ ଗାଡ଼ିର ମାଲିକ କିଏ? କିଏ କେତେବେଳେ ରଖିଲା ଆଉ କାହିଁକି? ପୁଲିସ ପାଖରେ ଏସବୁ ତଥ୍ୟ ନାହିଁ । କିନ୍ତୁ ଏସବୁ ପୁରୁଣା ଗାଡ଼ି ଏକପ୍ରକାରର ବିପଦ ପାଲଟିଲାଣି ।
ଏସବୁ ପୁରୁଣା ଗାଡ଼ି କେବଳ ରାଜଧାନୀର ଗଳିକନ୍ଦିରେ ନୁହେଁ, ବରଂ କିଛି ସମ୍ବେଦନଶୀଳ ପ୍ରତିଷ୍ଠାନ ଆଖପାଖରେ ମଧ୍ୟ ରଖାଯାଇଛି । ଖୋଦ୍ କମିଶନରେଟ ପୁଲିସ ପଛପାର୍ଶ୍ବ ରାସ୍ତାରେ ଦୀର୍ଘଦିନ ଧରି ଏକ ପୁରୁଣା କାର ପଡ଼ି ରହିଥିଲା । ଅବଶ୍ୟ, ମହିଳା କନଷ୍ଟେବଳଙ୍କ ମୃତ୍ୟୁ ପରେ ହଠାତ୍ ରାତାରାତି କାରକୁ ହଟାଇ ଦିଆଗଲା । କିନ୍ତୁ ନ’ ତାଲା ଅଫିସ ଗଳି ଓ ରାଜୀବ ଭବନ ଗଳିରେ ଦୀର୍ଘଦିନ ଧରି ରଖାଯାଇଥିବା ଏକାଧିକ ପରିତ୍ୟକ୍ତ କାର ସନ୍ଦେହ ବଢ଼ାଉଛି । ରାଜୀବ ଭବନ ଗଳିରେ କ୍ରାଇମ୍ବ୍ରାଞ୍ଚ ଏସ୍ଟିଏଫ୍ ଓ ଇଓଡବ୍ଲୁ ଅଫିସ, ସାଇବର କମ୍ପେ୍ଲସ ସହ ଏସ୍ଆଇଡବ୍ଲୁ, ସିକ୍ୟୁରିଟି ୱିଙ୍ଗ, ରାଜ୍ୟ ସଶସ୍ତ୍ର ପୁଲିସ ମୁଖ୍ୟାଳୟ, ପୁଲିସର କମାଣ୍ଡ ସେଣ୍ଟର ଆଣ୍ଡ କଣ୍ଟ୍ରୋଲ ରୁମ୍ ଓ ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ ସରକାରୀ କାର୍ଯ୍ୟାଳୟ ରହିଛି ।
ସାଧାରଣତଃ ବିମାନବନ୍ଦରରେ ଆତତାୟୀଙ୍କ ଆକ୍ରମଣର ଅଧିକ ଆଶଙ୍କା ଥାଏ । କିନ୍ତୁ ଭୁବନେଶ୍ୱର ବିମାନବନ୍ଦରରେ ଥିବା ସ୍ଥାୟୀ ପାର୍କିଂରେ ୫/୬ଟି କାର ମାସରୁ ଅଧିକ ସମୟ ଧରି ରଖାଯାଇଛି । କାର ମାଲିକ ସେଠାରେ ଗାଡ଼ି ରଖି ଦେଇ କେଉଁଆଡ଼େ ପଳାଇଛନ୍ତି । ଏହାଛଡ଼ା ବିମାନବନ୍ଦର ଟର୍ମିନାଲ-୨ର ବାମପାଶ୍ୱର୍ରେ ଥିବା ଅସ୍ଥାୟୀ ପାର୍କିଂରେ ପରିତ୍ୟକ୍ତ ଅବସ୍ଥାରେ ଏକ ଟ୍ରାଭେଲର ଥୁଆଯାଇଛି । ଉକ୍ତ ଜାଗାଟି ନିଛାଟିଆ ହୋଇଥିବାରୁ ସନ୍ଧ୍ୟା ହେଲେ, ଅନେକ ନିଶାଡ଼ି ସେଠାରେ ଆଡ୍ଡା ଜମାଉଛନ୍ତି ।