ଘନ କୁହୁଡ଼ି ଯୋଗୁଁ ବାତିଲ ହେଲା ଲକ୍ଷ୍ନୌ T20 ମ୍ୟାଚ । ଭାରତ ୨-୧ରେ ସିରିଜ ଆଗୁଆ । ଅହମ୍ମଦାବାଦରେ ହେବ ଫାଇନାଲ୍ ଲଢ଼େଇ । ଲକ୍ଷ୍ନୌର ଏକାନା ଷ୍ଟାଡିୟମରେ ଭାରତ ଓ ଦକ୍ଷିଣ ଆଫ୍ରିକା ମଧ୍ୟରେ ଚତୁର୍ଥ ଟି-୨୦ ମ୍ୟାଚ୍ ଘନ କୁହୁଡ଼ି ଯୋଗୁଁ ବାତିଲ ହୋଇଯାଇଛି । ଗତକାଲି ସନ୍ଧ୍ୟାରେ ଏହି ମ୍ୟାଚ୍ ଖେଳାଯିବାର ଥିଲା । କିନ୍ତୁ ପରିସ୍ଥିତି ଏପରି ଥିଲା ଯେ ଗୋଟିଏ ବଲ୍ ପଡିବା ତ ଦୂରର କଥା, ଟସ୍ ମଧ୍ୟ ହୋଇପାରିନଥିଲା । ଷ୍ଟାଡିୟମରେ କୁହୁଡ଼ି ଏତେ ମାତ୍ରାରେ ଥିଲା ଯେ ପଡିଆ ଭିତରେ କିଛି ସ୍ପଷ୍ଟ ଦେଖାଯାଉନଥିଲା । ଏହା ସହିତ ବାୟୁ ପ୍ରଦୂଷଣ-AQI ୪୦୦ରୁ ଅଧିକ ଥିବାରୁ ଖେଳିବା ବିପଜ୍ଜନକ ଥିଲା ।
ଭାରତୀୟ ଟିମର ଅଲରାଉଣ୍ଡର ହାର୍ଦ୍ଦିକ ପାଣ୍ଡ୍ୟା ମୁହଁରେ ମାସ୍କ ପିନ୍ଧି ଅଭ୍ୟାସ କରୁଥିବାର ଦେଖାଯାଇଥିଲା । ଅମ୍ପାୟାରମାନେ ପ୍ରାୟ ୩ ଘଣ୍ଟା ଅପେକ୍ଷା କରିବା ସହ ୬-୭ ଥର ପଡିଆ ଯାଞ୍ଚ କରିଥିଲେ । କିନ୍ତୁ ପାଗରେ କୌଣସି ସୁଧାର ନ ଆସିବାରୁ ଶେଷରେ ମ୍ୟାଚ୍ କୁ ବାତିଲ ଘୋଷଣା କରାଯାଇଥିଲା । ଫଳରେ ଷ୍ଟାଡିୟମରେ ଉପସ୍ଥିତ ହଜାର ହଜାର ଦର୍ଶକ ନିରାଶ ହୋଇ ଫେରିଥିଲେ । ୫ ମ୍ୟାଚ୍ ବିଶିଷ୍ଟ ଏହି ସିରିଜରେ ଭାରତ ବର୍ତ୍ତମାନ ୨-୧ରେ ଆଗୁଆ ରହିଛି । ଶେଷ ତଥା ନିର୍ଣ୍ଣାୟକ ମ୍ୟାଚ୍ ଆସନ୍ତାକାଲି ଅହମ୍ମଦାବାଦର ନରେନ୍ଦ୍ର ମୋଦୀ ଷ୍ଟାଡିୟମ୍ ରେ ଖେଳାଯିବ। ଭାରତ ଏହି ମ୍ୟାଚ୍ ଜିତି ସିରିଜ୍ କବଜା କରିବାକୁ ଚେଷ୍ଟା କରିବ । ଶୀତ ଦିନେ ଉତ୍ତର ଭାରତରେ ରାତି ମ୍ୟାଚ୍ ଆୟୋଜନ କରିବା ନେଇ କ୍ରିକେଟ୍ ବୋର୍ଡ (BCCI)ର କାର୍ଯ୍ୟସୂଚୀ ଉପରେ ଏବେ ପ୍ରଶ୍ନ ଉଠୁଛି । କୁହୁଡ଼ି ପାଇଁ ମ୍ୟାଚ୍ ବାତିଲ ହେବା ଅନ୍ତର୍ଜାତୀୟ କ୍ରିକେଟରେ ଏକ ବିରଳ ଘଟଣା ।