କଟକର ପୂର୍ବତନ ବିଧାୟକ ମହମ୍ମଦ ମୋକିମଙ୍କ ନୂଆ ରାଜନୈତିକ ଦଳକୁ ନେଇ ଚାଲିଥିବା ଚର୍ଚ୍ଚାର ଏବେ ଅନ୍ତ ଘଟିବାକୁ ଯାଉଛି। ନିକଟରେ ଶ୍ରୀ ମୋକିମ ସୂଚନା ଦେଇଛନ୍ତି ଯେ, ତାଙ୍କର ନୂଆ ଦଳର ନାମ କ’ଣ ହେବ ସେ ନେଇ ଏପର୍ଯ୍ୟନ୍ତ କୌଣସି ଚୂଡ଼ାନ୍ତ ନିଷ୍ପତ୍ତି ନିଆଯାଇ ନାହିଁ। ପୂର୍ବରୁ ‘ଓଡ଼ିଶା ଜନତା କଂଗ୍ରେସ’ ନାମକୁ ନେଇ ଚର୍ଚ୍ଚା ହେଉଥିଲେ ହେଁ, ଏହାକୁ ସେ ସ୍ପଷ୍ଟ ଭାବେ ଖଣ୍ଡନ କରିଛନ୍ତି। ଆସନ୍ତା ମାର୍ଚ୍ଚ ମାସ ଶେଷ ସୁଦ୍ଧା ଦଳର ସମସ୍ତ ରୂପରେଖ ଓ ନାମ ଚୂଡ଼ାନ୍ତ ହୋଇଯିବ ଏବଂ ଏହା ପରେ ହିଁ ଆନୁଷ୍ଠାନିକ ଭାବେ ସୂଚନା ଦିଆଯିବ ବୋଲି ସେ କହିଛନ୍ତି।
ମୋକିମଙ୍କ କହିବା ଅନୁଯାୟୀ, ଦଳର ନାମ ପାଇଁ ‘ଓଡ଼ିଶା ଜନ କଂଗ୍ରେସ’, ‘ଲୋକ କଂଗ୍ରେସ’ କିମ୍ବା ‘ଓଡ଼ିଶା ଜନତା କଂଗ୍ରେସ’ ଭଳି କିଛି ନାମ ଉପରେ ବିଚାରବିମର୍ଶ ଚାଲିଛି। ଏହି ପ୍ରକ୍ରିୟାରେ ସେ ନିଜର ଶୁଭେଚ୍ଛୁ ଓ ସମର୍ଥକମାନଙ୍କ ମତାମତକୁ ଗୁରୁତ୍ୱ ଦେଉଛନ୍ତି। ତେବେ ଗୋଟିଏ କଥା ସ୍ପଷ୍ଟ ଯେ, ଦଳର ନାମରେ ‘ଓଡ଼ିଶା’ ଏବଂ ‘କଂଗ୍ରେସ’ ଶବ୍ଦ ନିଶ୍ଚିତ ଭାବେ ରହିବ। ଦଳର ଆଭିମୁଖ୍ୟ ସମ୍ପୂର୍ଣ୍ଣ ଭାବେ ଧର୍ମନିରପେକ୍ଷ ରହିବ ବୋଲି ସେ ଦୃଢୋକ୍ତି ପ୍ରକାଶ କରିଛନ୍ତି। ବର୍ତ୍ତମାନ ଦଳର ପଞ୍ଜୀକୃତ ପ୍ରକ୍ରିୟା ଜାରି ରହିଛି ଏବଂ ଏହା ସମ୍ପୂର୍ଣ୍ଣ ହେବା ପରେ ରାଜ୍ୟ ରାଜନୀତିରେ ଏକ ନୂଆ ବିକଳ୍ପ ଦେଖିବାକୁ ମିଳିବ।