ଅସୁରକ୍ଷିତ ଅନୁଗୁଳ । କଥା କଥାକେ ଗଡ଼ୁଛି ମୁଣ୍ଡ। ବଢିଗଲାଣି ଲୁଟେରାଙ୍କ ଦୌରାତ୍ମ୍ୟ, ହତ୍ୟା, ବଳାତ୍କାର, ମହିଳା ନିର୍ଯାତନା। ଜିଲ୍ଲାର ୨୫ଟି ଯାକ ଥାନାରେ ଆଇନଶୃଙ୍ଖଳା ବିଗିଡ଼ି ଚାଲିଛି । ପ୍ରତ୍ୟେକ ମାସରେ ହାରାହାରି ୩ରୁ ୪ଟି ହତ୍ୟାକାଣ୍ଡ ଘଟୁଥିବା ବେଳେ ୬ରୁ ୭ ବଳାତ୍କାର ମାମଲା ରୁଜୁ ହେଉଛି। ଅନୁଗୁଳ ଜିଲ୍ଲାରେ ଗତ ୧୬ ମାସର କ୍ରାଇମ୍ ରେକର୍ଡ୍ ହିଁ ଏହା ବୟାନ କରୁଛି ।
ସୂଚନା ମୁତାବକ, ସାମାନ୍ୟ ବଚସା ଜଘନ୍ୟ ହତ୍ୟାକାଣ୍ଡର ରୂପ ନେଉଛି। କେଉଁଠି ଜମିବାଡି ବିବାଦ ତ ଆଉ କେଉଁଠି ପରକୀୟା ପ୍ରୀତି ସନ୍ଦେହରୁ ମୁଣ୍ଡ ଗଡୁଛି। ଆଉ କେଉଁଠି ସାମାନ୍ୟ ମଦ ପିଆରୁ ଆରମ୍ଭ ହେଉଥିବା ଝଗଡ଼ା ଜୀବନ ନେଉଛି । ୨୪ ଜୁନ୍ରୁ ଗତ ସେପ୍ଟେମ୍ବର ପର୍ଯ୍ୟନ୍ତ ୧୬ ମାସରେ ଜିଲ୍ଲାରେ ଘଟିଛି ୫୯ଟି ହତ୍ୟାକାଣ୍ଡ । ଏମାନଙ୍କ ମଧ୍ୟରେ ୨୩ ଜଣ ମହିଳା ହତ୍ୟାର ଶିକାର ହୋଇଛନ୍ତି । ସେହିପରି ଏହି ୧୬ ମାସର ଅବଧି ମଧ୍ୟରେ ୧୦୪ଜଣ ବଳାତ୍କାରର ଶିକାର ହୋଇଛନ୍ତି। ମୋଟ୍ ପରିସଂଖ୍ୟାନକୁ ହିସାବ କଲେ, ପ୍ରତି ମାସରେ ୫ରୁ ଅଧିକ ମହିଳା, ଯୁବତୀ ଓ ନାବାଳିକା ବଳାତ୍କାର ଶିକାର ହେଉଛନ୍ତି । ସେମାନଙ୍କ ମଧ୍ୟରେ ରହିଛନ୍ତି ୨୩ ଜଣ ନାବାଳିକା । ଦିନକୁ ଦିନ ବଳାତ୍କାର ସଂଖ୍ୟା ବଢ଼ିଚାଲିଥିବା ବେଳେ ୩ ଜଣ ଗଣ ବଳାତ୍କାରର ଶିକାର ହୋଇଛନ୍ତି । ଜିଲ୍ଲାରେ ମହିଳା ହିଂସା ଉଦ୍ବେଗଜନକ ସ୍ଥିତିରେ । ଯୌତୁକ ଲୋଭରେ ନିର୍ଦ୍ଦୟ ହେଉଛନ୍ତି ଶାଶୁଘର ଲୋକ । କେଉଁଠି ଯୌତୁକ ନିର୍ଯାତନା ସହି ନପାରି ନବବଧୂ ଆତ୍ମହତ୍ୟା କରୁଛି ତ ଆଉ କେଉଁଠି ହତ୍ୟା କରି ଆତ୍ମହତ୍ୟାର ରୂପ ଦେଉଛନ୍ତି ଶାଶୁଘର ଲୋକେ । ଯୌତୁକ ଭଳି କୁତ୍ସିତ ପ୍ରଥାକୁ ଲୋକ ଜାବୁଡ଼ି ଧରିଥିବା ବେଳେ ଅନୁଗୁଳ ଜିଲ୍ଲାରେ ଯୌତୁକ ଜନିତ ନିର୍ଯାତନା ଉଦ୍ବେଗଜନକ ଭାବେ ବଢ଼ିଚାଲିଛି। ଗତ ୧୬ ମାସରେ ଜିଲ୍ଲାରେ ୨୨୮ଟି ଯୌତୁକ ଜନିତ ନିର୍ଯାତନା ମାମଲା ରୁଜୁ ହୋଇଛି । ୧୨ ଜଣ ମହିଳାଙ୍କ ଯୌତୁକ ଜୁଇରେ ଜୀବନ ଯାଇଛି । ସେପଟେ ୪୯୧ଟି ମହିଳା ହିଂସା ମାମଲା ରୁଜୁ ହୋଇଥିବା ସରକାରୀ ତଥ୍ୟ କହୁଛି ।
ଅନୁଗୁଳ ଜିଲ୍ଲାରେ ଅପରାଧ ସଂଖ୍ୟା ବଢ଼ୁଥିବା ବେଳେ ଧନଜୀବନ ବାଜିରେ ଲାଗୁଛି । ସେପଟେ ଜିଲ୍ଲା ପୁଲିସ୍ ପକ୍ଷରୁ ଅପରାଧ ଦମନ କ୍ଷେତ୍ରରେ ବିଭିନ୍ନ ପଦକ୍ଷେପ ଓ ଅଭିଯାନ ହାତକୁ ନିଆଯାଉଥିବା ଜଣେ ବରିଷ୍ଠ ଅଧିକାରୀ ପ୍ରକାଶ କରିଛନ୍ତି । ହତ୍ୟା ଓ ବଳାତ୍କାର ମାମଲାରେ ତ୍ୱରିତ କାର୍ଯ୍ୟାନୁଷ୍ଠାନ ନିଆଯାଉଛି । ଅଭିଯୁକ୍ତଙ୍କୁ ଗିରଫ କରାଯାଇ କୋର୍ଟ୍ଚାଲାଣ କରାଯାଉଛି । ଟେକ୍ନୋଲୋଜିର ଉପଯୋଗ କରି ଜିଲ୍ଲାରେ ସୁରକ୍ଷା ବ୍ୟବସ୍ଥାକୁ ବୃଦ୍ଧି କରାଯାଉଥିବା ବରିଷ୍ଠ ପୁଲିସ୍ ଅଧିକାରୀ ଜଣକ ପ୍ରକାଶ କରିଛନ୍ତି ।