ଅନୁଗୋଳ ବ୍ଲକ୍ ଅନ୍ତର୍ଗତ ନୂଆସାହି, କାଙ୍ଗୁଲା ଓ ଗୋପୀନାଥପୁର ଅଞ୍ଚଳରେ ହାତୀପଲ ଆତଙ୍କ ସୃଷ୍ଟି କରିଛନ୍ତି। ଜଙ୍ଗଲ ଛାଡ଼ି ଗାଁ ମୁହାଁ ହୋଇ ଆସିଥିବା ପ୍ରାୟ ୪୦ରୁ ଅଧିକ ହାତୀ ଏବେ ଧାନ ଫସଲକୁ ଦଳାଚକଟା କରି ଚାଷୀମାନଙ୍କ ଧାନ ବିଲକୁ ନଷ୍ଟ କରୁଛନ୍ତି । ଯାହାକୁ ନେଇ ଗ୍ରାମବାସୀ ମଧ୍ୟରେ ଭୟ ଓ ଅସନ୍ତୋଷ ଦେଖାଦେଇଛି । ହାତୀପଲ ରାତିରେ ନାଲକୋ ସ୍ମେଲ୍ଟର ପ୍ଲାଣ୍ଟ ସୀମା ଅଞ୍ଚଳ ଦେଇ ଗୋପୀନାଥପୁର ଓ କାଙ୍ଗୁଲାରେ ପ୍ରବେଶ କରିଥିଲେ। ଏହି ସମୟରେ ସେମାନେ ଶହଶହ ହେକ୍ଟର ଧାନ ଫସଲ ନଷ୍ଟ କରିଥିବା ଅଭିଯୋଗ ହୋଇଛି । ରାତି ହେଲେ ଗ୍ରାମବାସୀମାନେ ହାତୀଙ୍କ ଉପଦ୍ରବରେ ରାତି ସାରା ଭୟରେ ଉଜାଗର ରହୁଛନ୍ତି ।
ଜଙ୍ଗଲରେ ଖାଦ୍ୟ ଅଭାବ ଯୋଗୁଁ ହାତୀମାନେ ଏବେ ଗାଁ ଓ ସହର ମୁହାଁ ହେଉଛନ୍ତି । ହାତୀ ଦାଉରୁ ପ୍ରଶାସନ ଓ ବନ ବିଭାଗ ତୁରନ୍ତ ପଦକ୍ଷେପ ନେଇ ହାତୀ ପଲଙ୍କୁ ଅନ୍ୟତ୍ର ଘଉଡେଇବା ସହ ଆବସକୀୟ କ୍ଷତିପୂରଣ ଦେବାପାଇଁ ଗ୍ରାମବାସୀ ଦାବି କରିଛନ୍ତି ।